މެދުއިރުމަތީގެ މަސްރަހު ނުރައްކާތެރި ދަރަޖައަކަށް ހޫނުވެފައިވާ ދަނޑިވަޅެއްގައި، އެމެރިކާގެ ސެންޓްރަލް ކޮމާންޑް އާއި ސައުދީ އަރަބިއްޔާގެ ދިފާއީ ބާރުތައް ގުޅިގެން އިރުމަތީ އިރާގުގައި ހަރަކާތްތެރިވާ އިރާނުގެ މަދަދުލިބޭ ހަތިޔާރުއެޅި މިލިޝިއާ ޖަމާއަތްތަކަށް ވަރުގަދަ ވައިގެ ހަމަލާތަކެއް ދީފި އެވެ.

މި ރައްދު ހަމަލާތައް ދޭންޖެހުނީ އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް ގެ ސީދާ އިރުޝާދުގެ ދަށުން، ފާއިތުވި 72 ގަޑިއިރު ތެރޭގައި އިރާގުގެ ތެރެއިން ސައުދީގެ ހަކަތަ އުފައްދާ މަރުކަޒުތަކަށާއި އެމެރިކާ ސިފައިންނަށް އަމާޒުކޮށް 30 އަށްވުރެ ގިނަ ޑްރޯން ހަމަލާ ދިނުމާ ގުޅިގެންނެވެ. ހާއްސަކޮށް ސައުދީގެ އީސްޓަން އަދި ރިޔާޟް ރީޖަންގެ ތެޔޮ ރިޒާވްތަކަށް ދިން ހަމަލާތަކާ ގުޅިގެން ކަމަށާއި، ސައުދީ އާއި އެމެރިކާގެ ހަނގުރާމަމަތީ ބޯޓުފަހަރުން ވަނީ އިރާގުގެ ބަޞަރާ، ދިޔާލާ އަދި ކިރްކުކް ޕްރޮވިންސްގެ ސައިޓުތަކަށް ބޮންއަޅާފައި ކަމަށް ސައުދީން ބުނެއެވެ.

މި ވަރުގަދަ ވައިގެ ހަމަލާތަކުގައި އިރާނަށް ބޯލަނބާ ޕޮޕިއުލާ މޮބިލައިޒޭޝަން ފޯސަސް (ޕީއެމްްެފް) ގެ މަދުވެގެން 20 ހަނގުރާމަވެރިން މަރުވެ، އެތައް ބަޔަކު ޒަހަމްވެފައިވާ ކަމަށް އިރާގުގެ ރިޕޯޓުތައް ބުނެ އެވެ.

އެމެރިކާ އާއި ސައުދީގެ އަސްކަރިއްޔާއިން ބުނާގޮތުގައި މި ހަމަލާތަކުގައި އެ މިލިޝިއާ ޖަމާއަތްތަކުން ހަތިޔާރު ރައްކާކުރާ މައިގަނޑު ގުދަންތަކާއި، ޑްރޯންތައް ތައްޔާރުކުރާ ލޮޖިސްޓިކްސް މަރުކަޒުތައް ވަނީ އެއްކޮށް ސުންނާފަތިކޮށްލާފައެވެ. ނަމަވެސް، މި ހަމަލާތަކާ ގުޅިގެން އިރާގު ސަރުކާރުން ވަނީ ކަންބޮޑުވުން ފާޅުކޮށް، މިއީ އެގައުމުގެ މިނިވަންކަމާއި ސިޔާދަތަށް އަރައިގަތުން ކަމަށް ބުނެ އެމެރިކާ އާއި ސައުދީގެ އަމަލުތައް ހަރުކަށި އިބާރާތުން ކުށްވެރިކޮށްފަ އެވެ.