އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލުކުރެއްވުމަށް ވޮޝިންގްޓަނަށް ކުރައްވާ ރަސްމީ ދަތުރުގައި ފުރައިފިއެވެ. ނަމަވެސް، މި ދަތުރު ފެށުމުގައި އާންމުކޮށް އަމަލުކުރާ އުސޫލުތަކާ ޚިލާފަށް، ސިއްރު އަދި ކުއްލި ސަލާމަތީ ފިޔަވަޅުތަކެއް ވަނީ އަޅާފައެވެ.
އިސްރާއީލުގެ މީޑިއާތަކުން ރިޕޯޓުކޮށްފައިވާ ގޮތުގައި، ނަތަންޔާހޫ ދަތުރުކުރި "ވިންގް އޮފް ޒަޔަން" ރަސްމީ މަތިންދާބޯޓު ފުރާފައިވަނީ އާންމުކޮށް ބޭނުންކުރާ ބެން ގޫރިއަން އިންޓަނޭޝަނަލް އެއާޕޯޓުގެ ބަދަލުގައި، ދެކުނު އިސްރާއީލުގެ ނެގެވް ސަހަރާގައި އޮންނަ ނެވަޓިމް އަސްކަރީ އެއާބޭސްއިންނެވެ. އޭނާ ފުރި ކަން ބޮޑުވަޒީރުގެ އޮފީހުން ކަށަވަރުކޮށްދިނީވެސް ބޯޓު ނައްޓާލި ފަހުންނެވެ. މީގެ އިތުރުން، މި ދަތުރުގައި އެއްވެސް ނޫސްވެރިއަކު ބޯޓަށް އަރުވާފައެއް ނުވެއެވެ.
މިފަދަ ސިއްރު ގޮތަކަށް ނަތަންޔާހޫ ފުރާފައި ވަނީ އީރާނުން ދީފާނެ ކަމަށް ބެލެވޭ ސަލާމަތީ ނުރައްކަލަކާ ގުޅިގެން ކަމަށް އިސްރާއީލުގެ ޗެނަލް 12 އިން ވަނީ ބުނެފައެވެ. މި ނުރައްކާތަކާ ހުރެ އިސްރާއީލުގެ ކެބިނެޓް ބައްދަލުވުންވެސް ދާދިފަހުން ވަނީ ބިންގަރާހަކަށް ބަދަލުކޮށްފައެވެ.
Advertisement
އީރާނުގެ މައްސަލަ އެޖެންޑާގެ ކުރީގައި
ފުރު ކުރިން ނަތަންޔާހޫ ދެއްވި ވީޑިއޯ ބަޔާނެއްގައި ބުނީ، ޓްރަމްޕްއާއެކު ބާއްވާ ބައްދަލުވުމުގައި އެންމެ އިސްކަމެއް ދޭނީ އީރާނުގެ މައްސަލައަށް ކަމަށެވެ.
ޚަބަރުތައް ބުނާގޮތުން ނަތަންޔާހޫ ޓްރަމްޕްއަށް ހުށަހަޅަނީ އީރާނުގެ ނިއުކްލިއާ ޕްރޮގްރާމާއި ބެލިސްޓިކް މިސައިލް އުފެއްދުން އަލުން ފަށާފައިވާ މިންވަރު ދައްކުވައިދޭ އެންމެ ފަހުގެ އިންޓެލިޖެންސް މައުލޫމާތުތަކެވެ. އިސްރާއީލުގެ މަގްސަދަކީ އީރާނަށް ނިއުކްލިއާ ހަތިޔާރު ލިބުން ހުއްޓުވުމެވެ.
ވައިޓް ހައުސްގައި ބޭއްވުމަށް ހަމަޖެހިފައިވާ މި ބައްދަލުވުމަކީ ޓްރަމްޕްގެ ދެވަނަ ދައުރުގައި މި ދެ މީހުން ބާއްވާ 8 ވަނަ ބައްދަލުވުމެވެ. މި ދަތުރުގައި ނަތަންޔާހޫ، ދާދިފަހުން އަވަހާރަވި އެމެރިކާގެ ސެނެޓަރ ލިންޑްސޭ ގްރަހަމްގެ ޖަނާޒާގައިވެސް ބައިވެރިވާނެއެވެ.
