ގައުމީ ވާޖިބު އަދާކުރުމުގެ މަތިވެރި ޚިދުމަތުގައި ދެމިތިއްބަވަނިކޮށް ފުރާނަ ގުރުބާންކުރި ފުލުހުންގެ އަގުވަޒަންކޮށް، އެބޭފުޅުންގެ ހަނދާންތައް އާކުރުމުގެ ގޮތުން ބާއްވާ "ޕޮލިސް މެމޯރިއަލް ޑޭ" ފާހަގަކުރުމުގެ ޚާއްސަ ރަސްމިއްޔާތު އިސްކަންދަރު ކޮށީގައި މިއަދު ބާއްވައިފިއެވެ. މި ރަސްމިއްޔާތު ޝަރަފުވެރިކޮށްދެއްވީ ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު އަލީ އިޙްސާންއެވެ. މި ރަސްމިއްޔާތުގައި ކޮމިޝަނަރ އޮފް ޕޮލިސް އަޙްމަދު މުޙައްމަދުއާއި، ޑެޕިއުޓީ ކޮމިޝަނަރ ފަރުހާދު ފިކުރީގެ އިތުރުން ފުލުހުންގެ މުއައްސަސާގެ އިސް ބޭފުޅުން ބައިވެރިވެވަޑައިގެންނެވިއެވެ.

މި ރަސްމިއްޔާތުގެ ތެރެއިން، ގައުމީ ސަލާމަތާއި ރައްޔިތުންގެ ރައްކާތެރިކަމަށްޓަކައި މަސައްކަތް ކުރަނިކޮށް ޝަހީދުވި ފުލުހުންގެ ހަނދާނުގައި ޚާއްސަ ހިމޭންކަމުގެ ސުކޫތެއް ގެނެވުނެވެ.

މީގެ އިތުރުން، މި ދުވަހުގެ މުނާސަބަތާ ގުޅުވައިގެން ފުލުހުންގެ މައި މަރުކަޒުތަކުގައި ވަނީ ފުލުހުންގެ ދިދަ ބައިދަނޑިއަށް ތިރިކޮށްފައެވެ.

މި ދުވަސް ފާހަގަކުރުމުގެ އެންމެ ބޮޑު ބޭނުމަކީ ގައުމަށްޓަކައި ފުރާނައިން ގުރުބާންވި ބަތަލުންގެ ޒިކުރާ އާލާކޮށް، އެބޭފުޅުންގެ އާއިލާތަކަށް މުއައްސަސާގެ ފަރާތުންދޭ އަހައްމިއްޔަތު ހާމަކުރުމެވެ. "ޕޮލިސް މެމޯރިއަލް ޑޭ" އަކީ 2012 ޖުލައި 23 ވިލޭރޭ ކ. ކާށިދޫގައި ރަސްމީ ވާޖިބު އަދާކުރައްވަމުން ގެއަށް ވަޑައިގަންނަވަނިކޮށް ރަހުމްކުޑަ ހަމަލާއެއްދީ ޝަހީދުކޮށްލި ސާޖަންޓް އާދަމް ހަލީމްގެ ހަނދާނުގައި ފާހަގަކުރަން ފެށި ދުވަހެކެވެ. އޭނާގެ ވަކިވުމާ ގުޅިގެން، ކޮމިޝަނަރ އޮފް ޕޮލިސްގެ ނިންމެވުމުގެ މަތިން ކޮންމެ އަހަރެއްގެވެސް ޖުލައި މަހުގެ 23 ވަނަ ދުވަހަކީ ފުލުހުންގެ ހަނދާނީ ދުވަހުގެ ގޮތުގައި ކަނޑައަޅައި، 2013 ވަނަ އަހަރުން ފެށިގެން މި ދުވަސް އަންނަނީ ރަސްމީކޮށް ފާހަގަކުރަމުންނެވެ.

މި ދުވަހުގެ މުނާސަބަތާ ދިމާކޮށް އިސްކަންދަރު ކޮށީގައި ފުލުހުންގެ މުވައްޒަފުންނަށް ޚާއްސަކޮށްގެން ލޭ ހަދިޔާކުރުމުގެ ކެމްޕޭނެއްވެސް ވަނީ ކުރިއަށް ގެންގޮސްފައެވެ. މިއީ މުޖުތަމައުގައި ތިބި ލޭ ބޭނުންވާ ބަލިމީހުންނަށް އެހީތެރިވުމަށާއި، އިންސާނިއްޔަތުކަން ދިރުވުމުގެ ގޮތުން ފުލުހުން އިސްނަގައިގެން ހިންގި ޚާއްސަ ހަރަކާތެކެވެ.