އެމެރިކާ އާއި އީރާނާ ދެމެދު އުފެދިފައިވާ ހަމަނުޖެހުންތައް ބޮޑުވެ، ޔަމަނުގައި ހަރަކާތްތެރިވާ އީރާނަށް ތާއީދުކުރާ ހޫތީ ހަނގުރާމަވެރިން ސައުދީ އަރަބިއްޔާއާ ދެކޮޅަށް ކަނޑުގެ ބްލޮކޭޑެއް އިއުލާންކޮށްފިއެވެ.

ހޫތީންގެ އަސްކަރީ ތަރުޖަމާނު ޔަހްޔާ ސަރީ ވިދާޅުވި ގޮތުގައި، މި ފިޔަވަޅަކީ ސައުދީން ޔަމަނަށް ކުރިމަތިކުރުވާފައިވާ ދަތިކުރުންތަކަށް ރައްދުދިނުމުގެ ގޮތުން "ލޮލަކަށް ލޮލެއް" އުސޫލުން ވަގުތުން ވަގުތަށް ތަންފީޒުކުރަން ފެށި ބްލޮކޭޑެކެވެ.

މި ނިންމުމާއެކު، ރެޑް ސީ (ރަތްކަނޑު) ގެ ދެކުނު ދޮރާށި ކަމަށްވާ ބާބުލް މަންދަބް ކަނޑުއޮޅިން ސައުދީގެ އުޅަނދުތައް ދަތުރުކުރުން މަނާކުރާނެ ކަމަށް ހޫތީން ބުނެފައިވާއިރު، ސައުދީ އަރަބިއްޔާގެ ހާރިޖީ ވުޒާރާއިން ވަނީ މިކަން ކުށްވެރިކޮށް، ބައިނަލްއަގުވާމީ ގާނޫނުތަކާ އެއްގޮތްވާ ގޮތުގެ މަތިން އެގައުމުގެ އުޅަނދުތައް ހިމާޔަތްކުރުމަށް ބޭނުންވާ ހުރިހާ ފިޔަވަޅެއް އަޅާނެ ކަމަށް ބުނެފައެވެ.

މި ހަމަނުޖެހުންތަކުގެ ތެރެއިން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް އިން ވަނީ ކުވައިތުގައި ހުންނަ އެމެރިކާގެ އަސްކަރީ މަރުކަޒުތަކަށް އަމާޒުކޮށް ވަރުގަދަ މިސައިލް އަދި ޑްރޯން ހަމަލާތަކެއް ދީފައެވެ. މި ހަމަލާތަކުގައި އަލީ އަލް ސާލެމް އެއާ ބޭސްގައި ހުރި އެމެރިކާގެ އެންމެ ޒަމާނީ އެމްކިއު9 ރިޕާ މަރުކާގެ ދެ ހޭންގަރަކަށާއި، އަސްކަރީ މުވާސަލާތީ ނިޒާމުތަކަށް ބޮޑެތި ގެއްލުންތަކެއް ދީފައިވާ ކަމަށް އީރާނުގެ ދައުލަތުގެ މީޑިއާތަކުން ރިޕޯޓުކޮށްފައިވެއެވެ. މި ހަމަލާތަކުގެ ސަބަބުން އެ ބޭސްގައި ހުރި ބައެއް ޑްރޯންތަކުގައި ރޯވެ އަނދާފައިވާ ކަމަށް ވެސް އައިއާރްޖީސީ އިން ބުނާއިރު ކުވައިތުގެ އަސްކަރިއްޔާއިން ވެސް ވަނީ އެގައުމުގެ ވައިގެ ދިފާއީ ނިޒާމުން ބައެއް ނުރައްކާތެރި ޑްރޯންތައް ވައްޓާލާފައިވާ ކަމަށް ކަށަވަރުކޮށްދީފައެވެ.

މި ފަހުގެ ކުރިމަތިލުންތަކުގެ ސަބަބުން މުޅި މެދުއިރުމަތީގެ މަސްރަހު ނުތަނަވަސްވެ، ބައިނަލްއަގުވާމީ ހަކަތައާއި ވިޔަފާރީގެ ބާޒާރަށް ވަނީ ބޮޑު ލޮޅުމެއް އަރާފައެވެ. ހާއްސަކޮށް ހޫތީންގެ ކަނޑުގެ ބްލޮކޭޑުގެ ސަބަބުން ދުނިޔޭގެ އެންމެ ބޮޑު ތެޔޮ އެކްސްޕޯޓްކުރާ ސައުދީ އަރަބިއްޔާއިން ރަތްކަނޑުގެ ބަނދަރުތައް މެދުވެރިކޮށް ކުރާ ތެލުގެ ވިޔަފާރިއަށް ބުރޫއަރާނެ ކަމުގެ ބިރު ވަނީ ބޮޑުވެފައެވެ.