މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ އެންމެ އިސްވެރިޔާ ނުވަތަ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް، ގދ. ގައްދޫ، ކޯޒީރައުންޑް ފާތިމަތު އަމީޒާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައްޔަންކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުގައި މިދިޔަ ބުރާސްފަތި ދުވަހު ބޭއްވެވި ރަސްމިއްޔާތެއްގައި އަމީޒާ އެ މަގާމަށް އައްޔަންކުރެއްވީ، އޭނާ އެ މަޤާމަށް އައްޔަންކުރުމަށް ފެންނަކަމަށް ރައްޔިތުންގެ މަޖިލީހުން ރުހުން ދެއްވުމާ ގުޅިގެންނެވެ. މަޖިލީހުގެ ކޮމިޓީ މަރުހަލާގައި އަމީޒާއަށް %92.44 މާކްސް ލިބިވަޑައިގެންފައިވާއިރު، އޭނާއަކީ އެ މަޤާމަށް ޝަރުތުހަމަވާ ގާބިލު ބޭކަނބަލެއް ކަމަށް މަޖިލީހުގެ ހުރިހާ މެންބަރުން ވަނީ އިއްތިފާގުވެފައެވެ.

ކޮމިޝަނަރ ޖެނެރަލް އޮފް ޓެކްސޭޝަންގެ މަގާމު ހުސްވީ، ކުރިން އެ މަޤާމުގައި ހުންނެވި ޙަސަން ޒަރީރު އިސްތިއުފާ ދެއްވުމާ ގުޅިގެންނެވެ. ޒަރީރު އެ މަޤާމުން އިސްތިއުފާ ދެއްވީ ރައީސުލްޖުމްހޫރިއްޔާ ޑރ. މުޢިއްޒުގެ ކެބިނެޓުގެ މިނިސްޓަރ އޮފް ފައިނޭންސްގެ މަޤާމަށް އޭނާ އައްޔަންކުރެއްވުމުންނެވެ.

އަމީޒާއަކީ މީރާގައި 16 އަހަރަށްވުރެ ދިގު މުއްދަތެއްގައި ޚިދުމަތްކުރައްވާފައިވާ، ތަޖުރިބާކާރު ބޭކަނބަލެކެވެ. މި މަޤާމަށް އައްޔަންކުރެއްވުމުގެ ކުރިން އޭނާ ހުންނެވީ މީރާގެ ޑެޕިއުޓީ ކޮމިޝަނަރ ޖެނެރަލްގެ މަޤާމުގައެވެ. އޭނާގެ ޚިދުމަތުގެ ދައުރުގައި ޓެކްސްގެ ސިޔާސަތުތައް އިޞްލާޙުކުރުމާއި، މުއައްސަސާގެ ހިންގުން ހަރުދަނާކުރުމުގެ އިތުރުން، ދައުލަތަށް ލިބޭ އާމްދަނީ އިތުރުކުރުމުގެ ރޮނގުން ފާހަގަކޮށްލެވޭ މަސައްކަތްތަކެއް ވަނީ ކުރައްވާފައެވެ.

ޚާއްޞަކޮށް، މީރާގެ އެންފޯސްމަންޓް ޑިވިޜަންގެ އިސްވެރިއެއްގެ ހައިސިއްޔަތުން، ޑޭޓާ އެނަލިޓިކްސް ބޭނުންކުރައްވައިގެން، ނުލިބި ހުރި ޓެކްސް އާއި ޓެކްސް ނޫން އާމްދަނީ ހޯދުމަށް އަމީޒާ ވަނީ ނުހަނު ގިނަ މަސައްކަތްތަކެއް ކުރައްވާފައެވެ.

ތަޢުލީމީ ގޮތުން ބަލާއިރު، ފާތިމަތު އަމީޒާ ވަނީ އިންޓަނޭޝަނަލް އިސްލާމިކް ޔުނިވަރސިޓީ މެލޭޝިއާއިން މާސްޓަރ އޮފް ސައިންސް އިން އެކައުންޓިންގ ހާސިލުކުރައްވާފައެވެ. އަދި އޮކްސްފޯޑް ބްރޫކްސް ޔުނިވަރސިޓީއިން ބެޗެލަރސް ޑިގްރީ އިން އެޕްލައިޑް އެކައުންޓިންގ ފުރިހަމަކުރައްވާފައިވެއެވެ.

މީރާގެ ތާރީޚުގައި ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް އަންހެން ބޭކަނބަލަކު އައްޔަންކުރެވުނު މިއީ ފުރަތަމަ ފަހަރެވެ.