ދިވެހިރާއްޖޭގެ ކަޅު ބާޒާރުގައި އެމެރިކާ ޑޮލަރުގެ އަގު ފުރަތަމަ ފަހަރަށް 22 ދިވެހި ރުފިޔާއަށް ހަދައި، ބާޒާރު ކޮންޓްރޯލްކުރާ ބަޔަކު ގައުމު ސުންނާފަތިކުރަން ފަށައިފިއެވެ. މިއީ މަރުކަޒީ ބޭންކު (އެމްއެމްއޭ) ގެ ރަސްމީ ރޭޓު ކަމަށްވާ 15.42 ރުފިޔާއަށްވުރެ މާ ބޮޑު އަގެކެވެ.
އިގްތިސާދީ މާހިރުން ހާމަކުރާ ގޮތުގައި، މި ބަދަލަކީ ގައުމުގައި ޑޮލަރު ނެތިގެން ދިމާވި ކަމެއް ނޫނެވެ. މިއީ ރާއްޖެއަށް ފަތުރުވެރިން އަންނަ ނިސްބަތް ދަށްވާ ދުވަސްވަރުގެ ނާޖާއިޒު ފައިދާ ނަގައި، އާންމު ރައްޔިތުން ފެލައިލުމަށްފަހު އަމިއްލަ ޖީބު ބޮޑުކުރަން ކަޅު ބާޒާރުގެ ނުފޫޒުގަދަ ވިޔަފާރިވެރިން ގަސްތުގައި ހިންގާ ޖަރީމާއެކެވެ.
މި ރޭވުންތެރި އަމަލުގެ އެންމެ ބޮޑު ހެއްކަކީ، ރާއްޖޭގެ ބޭންކިން ނިޒާމަށް ވަންނަ ބޭރު ފައިސާގެ ނިސްބަތް ދަށަށް ނުދާކަން އެމްއެމްއޭގެ ތަފާސްހިސާބުތަކުން ފެންނަން އޮތުމެވެ. ސަރުކާރުން އެކުލަވާލި އާ ބޭރު ފައިސާގެ ގަވާއިދުގެ ދަށުން، ރިސޯޓުތަކުންނާއި ބޮޑެތި ވިޔަފާރިތަކުން ބޭންކުތަކަށް ޑޮލަރު މާރުކުރަންޖެހޭ މިންވަރު ވަނީ ވަރަށް ބޮޑަށް އިތުރުވެފައެވެ. ނަމަވެސް، ކަޅު ބާޒާރުގައި ނުފޫޒު ގަދަކޮށްގެން ތިބި ބަޔަކު ދަނީ ޑޮލަރު ބާޒާރަށް ނެރުމުގެ ބަދަލުގައި، އެ ފައިސާ ފޮރުވައި ހިފަހައްޓަމުންނެވެ. އަދި ބާޒާރުގައި ޑޮލަރު ލިބެން ނެތް ކަމަށް ދައްކައި، ދޮގު އަޑުތައް ފަތުރައިގެން އަގު މައްޗަށް ޖައްސަމުންދަނީ ހަމައެކަނި އެ މީހުންގެ އަމިއްލަ ފައިދާ އިތުރުކުރުމުގެ ދަހިވެތިކަމުގައެވެ.
Advertisement
މި ދަނޑިވަޅަކީ ފަތުރުވެރިކަމުގެ އޮފް-ސީޒަން ކަމަށްވުމުން، ކަޅު ބާޒާރުގެ ވިޔަފާރިވެރިން މި ހާލަތުގެ ބޭނުން ހިފަނީ ރައްޔިތުން ރަހީނުކުރުމުގެ ހަތިޔާރެއްގެ ގޮތުގައެވެ.
މުދާ އިމްޕޯޓު ކުރަންޖެހޭ ކުދި އަދި މެދުފަންތީގެ ވިޔަފާރިވެރިންނަށް މަޖުބޫރުވެގެން ކަޅު ބާޒާރުން ޑޮލަރު ގަންނަން ޖެހޭ ހާލަތު ދެނެގަނެ، މި ބޮޑުން ދަނީ އެއްވެސް ރަހުމެއް ނެތް ބޮޑު ފައިދާއެއް ނަގަމުންނެވެ.
ބޭންކުތަކުން މުހިންމު ބޭނުންތަކަށް ޑޮލަރު ދޫކުރަމުންދާއިރު ވެސް، ބާޒާރުގެ އަގު 22 ރުފިޔާއަށް މައްޗަށް ޖެއްސުމަކީ ގައުމުގެ އިގްތިސާދަށް ދޭ ވަރަށް ބޮޑު ހިޔާނާތެކެވެ.
މި ނާއިންސާފު އަމަލުގެ ސަބަބުން މުޅި ގައުމާއި އާންމު ރައްޔިތުން މިވަނީ ބޮޑު ތަކުލީފެއްގެ ތެރެއަށް ވައްދާލާފައެވެ.
ރާއްޖެއަކީ ކާބޯތަކެއްޗާއި ބޭހަށް ދަންދެން ބޭރުން އެތެރެކުރާ ގައުމަކަށް ވުމުން، ނުބައި ވިޔަފާރިވެރިންގެ ކަޅު ބާޒާރުގެ މި ބޮޑު އަގާއެކު ބާޒާރުގައި ހުރިހާ ތަކެއްޗެއްގެ އަގު އިންތިހާއަށް އުފުލި، އާންމު ރައްޔިތުމީހާގެ ދިރިއުޅުން މިވަނީ ބުރައަކަށް ވެފައެވެ. މިއީ ހަގީގީ މާލީ ދަތިކަމެއްގެ ސަބަބުން ދިމާވި ކަމެއް ނޫންކަމާއި، މިއީ ހަމައެކަނި ރައްޔިތުންގެ ލެއިން ބޮޑު ފައިދާ ނަގަން ބަޔަކު ހިންގާ ޖަރީމާއެއްކަން މިއަދު އާންމުންނަށް ވަނީ ސާފުވެފައެވެ.
