މޯލްޑިވްސް ޒަކާތު ހައުސްގެ ފަރާތުން މިއަހަރު ދޫކުރުމަށް ހަމަޖެހިފައިވާ މަތީ ތައުލީމުގެ ސްކޮލަޝިޕާއި ހާއްސަ ސްކޮލަޝިޕް ޕްރޮގުރާމަށް ކުރިމަތިލުމުގެ މުއްދަތު އެ އިދާރާއިން އިތުރުކޮށްފި އެވެ.

ޒަކާތު ހައުސްއިން ހާމަކުރި ގޮތުގައި، މި ފުރުސަތަށް އެދި ހުށަހެޅުމުގެ ސުންގަޑި މިހާރު ވަނީ އަންނަ އޮގަސްޓް މަހުގެ 16 ވާ ހުކުރު ދުވަހުގެ މެންދުރުފަހު 14:00 އާ ހަމައަށް އިތުރުކޮށްފައެވެ. މި މުއްދަތު އިތުރުކުރުމުގެ މައިގަނޑު މަގުސަދަކީ، ޝަރުތު ހަމަވާ ފަރާތްތަކުގެ ތެރެއިން މިހާތަނަށް ފޯމު ހުށަނާޅާ ތިބި ފަރާތްތަކަށް އެ ފުރުސަތުގެ ބޭނުން ހިފުމަށް އިތުރު ފުރުސަތެއް ދިނުމެވެ.

މިދިޔަ މެއި މަހުގެ 17 ވަނަ ދުވަހު ހުޅުވާލި މި ސްކޮލަޝިޕް ޕުރޮގުރާމަކީ ރާއްޖެއާއި ރާއްޖޭން ބޭރުން މާސްޓާސް (ލެވެލް 9) އަދި ޕީއެޗްޑީ (ލެވެލް 10) އަށް ކިޔަވަން ބޭނުންވާ ދިވެހި ދަރިވަރުންނަށް މާލީ އެހީތެރިކަން ފޯރުކޮށްދިނުމަށް ހުޅުވާލާފައިވާ ފުރުސަތެކެވެ.

މި ޕްރޮގްރާމުގެ ދަށުން ޖުމުލަ 40 ފުރުސަތު ހުޅުވާލާފައިވެއެވެ. އޭގެ ތެރޭގައި ހިމެނެނީ:

1. ރާއްޖޭގައި ކިޔެވުމަށް: 10 ފުރުސަތު
2. ރާއްޖޭން ބޭރުގައި ކިޔެވުމަށް: 20 ފުރުސަތު
3. ސައުދީ އަރަބިއްޔާއާއި މިސްރުގައި މިހާރު ކިޔަވަމުންދާ ދަރިވަރުންނަށް (ސްޓައިޕެންޑާއެކު): 5 ފުރުސަތު
4. އަންހެނުންގެ ސިއްހަތާ ގުޅުންހުރި ދާއިރާތަކުން އަންހެން ޑޮކްޓަރުން ތަމްރީނުކުރުމަށް: 5 ފުރުސަތު

މީގެ އިތުރުން، އިސްލާމީ ދާއިރާތަކުގެ ބޭރުން އެހެނިހެން ދާއިރާތަކުން ކިޔެވުމަށް އެދޭ ފަރާތްތަކަށް ޕްރޮޕޯސަލް ހުށަހެޅުމުގެ ހާއްސަ ފުރުސަތެއްވެސް ވަނީ ހުޅުވާލާފަ އެވެ. މިގޮތަށް ހުށަހަޅާ ފަރާތްތަކުން، އެ ދާއިރާއަކުން ކިޔެވުމުގެ ސަބަބުން ދިވެހި އިސްލާމީ މުޖުތަމައުގެ ކުރިއެރުމަށާއި ތަރައްގީއަށް ކުރާނެ ފައިދާ ސާފުކޮށް ބަޔާންކޮށްދޭންޖެހޭނެ އެވެ.

މި ފުރުސަތަށް އެދި ހުށަހަޅަން ބޭނުންވާ ޕްރޮޕޯސަލް ޓެމްޕްލޭޓާއި އިތުރު މައުލޫމާތު ޒަކާތު ހައުސްގެ ރަސްމީ ވެބްސައިޓުން ލިބެން ހުންނާނެ ކަމަށް ޒަކާތު ހައުސްއިން ފާހަގަކުރި އެވެ.