އިންސާނުންގެ ގުނަވަން ޓްރާންސްޕްލާންޓް ކުރުމާ ގުޅޭ ބިލު ތަންފީޒުކުރުމުގައި ދިމާވެދާނެ ދަތިތަކަކަށް ރިއާޔަތްކުރައްވައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަނބުރާ ފޮނުއްވާލެއްވި ބިލު މަޖިލީހުން އަލުން ދިރާސާކޮށް މިއަދު ފާސްކޮށްފި އެވެ.

މި ބިލަކީ މިދިޔަ މެއި މަހުގެ 14 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާއިން ފާސްކޮށް، ތަސްދީގުކުރެއްވުމަށް ރައީސުލްޖުމްހޫރިއްޔާއަށް ފޮނުއްވާފައިވާ ބިލެކެވެ. ނަމަވެސް، ބިލު ފާސްވެގެން އައިއިރު މަޖިލީހުން ގެނައި ބަދަލުތަކުގެ ސަބަބުން، އަމަލީގޮތުން ބިލު ތަންފީޒުކުރުމުގައި ގޮންޖެހުންތަކެއް ހުރިކަމަށް ފެނިވަޑައިގަންނަވާތީ ރައީސް ވަނީ ބިލު އަނބުރާ ފޮނުއްވާލައްވާފަ އެވެ.

ރައްޔިތުންގެ މަޖިލީހުގެ އިޖުތިމާއީ ކޮމިޓީން ބިލު އަލުން ދިރާސާކޮށް ގެނައި މައިގަނޑު އިސްލާހުތަކާއެކު، މިއަދުގެ ޖަލްސާގައި މި ބިލު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 58 މެންބަރުންގެ އިއްތިފާގުންނެވެ.

ބިލަށް ގެނެވުނު މުހިންމު އިސްލާހުތަކުގެ ތެރޭގައި، ގުނަވަން ހަދިޔާކުރާ މީހުންގެ ޝަރުތުތަކުގެ ތެރެއަށް ދެ ކަމެއް އަލުން ވަނީ އިތުރުކޮށްފައެވެ. އެއީ ގުނަވަން ހަދިޔާކުރާ މީހަކީ ދައުލަތުގެ ބެލުމުގެ ދަށުގައި ހުރި މީހެއް ކަމުގައި ނުވުމާއި، ކުށުގެ ތުހުމަތެއްގައި ނުވަތަ ޝަރުއީ ހުކުމެއް ތަންފީޒުކުރަމުންދާ މީހަކަށް ނުވުމެވެ.

ރައީސުލްޖުމްހޫރިއްޔާ މަޖިލީހަށް ފޮނުއްވި ސިޓީގައި ފާހަގަކުރައްވާފައިވަނީ، ބަންދުގައި ތިބޭ މީހުންނަކީ އެމީހުންގެ މިނިވަންކަން ގައިދުވެފައިވާ ބަޔަކަށްވާއިރު، އެއްވެސް މަޖުބޫރުކަމެއް ނެތި ފުރިހަމަ ރުހުމުގައި ގުނަވަން ހަދިޔާކުރުމުގެ އިހްތިޔާރު އެފަދަ ފަރާތްތަކަށް އޮތްކަން ކަށަވަރުކުރުމަކީ ގާނޫނީ ގޮތުން ގިނަ ގޮންޖެހުންތަކެއް ކުރިމަތިވެދާނެ ކަމެއް ކަމަށެވެ.

މީގެ އިތުރުން، ކޮމިޓީ މަރުހަލާގައި ވަނީ ރުހުމާ ނުލައި ގުނަވަން ނެގުމާއި ގާނޫނާ ހިލާފަށް ޓްރާންސްޕްލާންޓް ކުރުމުގެ އަދަބުތަކަށްވެސް ބަދަލު ގެނެސްފައެވެ. އެގޮތުން، ކުރިން ބިލުގައި އޮތް ޤިސާސް ހިފުމާއި ދިޔަ ދިނުމުގެ ބައި އުނިކޮށް، އެފަދަ ކުށެއް ކުރާ މީހަކު 150,000 އާއި 250,000 ރުފިޔާއާ ދެމެދުގެ އަދަދަކުން ޖޫރިމަނާކުރުމާއެކު، 12 މަހާއި 18 މަހާ ދެމެދުގެ މުއްދަތަކަށް ޖަލަށްލުމަށް ވަނީ ކަނޑައަޅާފަ އެވެ.

މި ގާނޫނަށް އަމަލުކުރަން ފަށާނީ ބިލު ތަސްދީގުކުރާ ތާރީހުން ފެށިގެން 180 ދުވަސް ހަމަވާ ދުވަހުން ފެށިގެންނެވެ. އަދި ގާނޫނަށް އަމަލުކުރަން ފަށާތާ 60 ދުވަހުގެ ތެރޭގައި "އޯގަން ޓްރާންސްޕްލާންޓް ކައުންސިލް" އުފައްދަންޖެހޭނެ ކަމަށްވެސް ބިލުގައި ބަޔާންކޮށްފައިވެ އެވެ.