ބޭންކް އޮފް މޯލްޑިވްސް (ބީއެމްއެލް) އިން ވޭތުވެދިޔަ ދެ އަހަރާއި ބައިގެ ތެރޭގައި ކަސްޓަމަރުންނަށް ރެކޯޑް އަދަދަކަށް ޑޮލަރު ވިއްކާފައިވާކަން އެ ބޭންކުން ހާމަކޮށްފިއެވެ.
ބޭންކުން މިއަދު އާންމުކުރި ތަފާސްހިސާބުތަކުން ދައްކާގޮތުގައި، 2024 ވަނަ އަހަރުގެ ޖަނަވަރީ މަހުން ފެށިގެން 2026 ވަނަ އަހަރުގެ ޖޫން މަހުގެ ނިޔަލަށް ބީއެމްއެލްއިން ވަނީ ކަސްޓަމަރުންނަށް ޖުމްލަ 1.7 ބިލިއަން ޑޮލަރު ވިއްކާފައެވެ. މިއީ އޭގެ ކުރީގެ ދެ އަހަރާއި ބައިގެ މުއްދަތާ (ޖުލައި 2021 އިން ޑިސެންބަރު 2023 އަށް) އަޅައިބަލާއިރު 77 އިންސައްތަ ނުވަތަ 741 މިލިއަން ޑޮލަރުގެ ބޮޑު އިތުރުވުމެކެވެ. ކުރީގެ އެ މުއްދަތުގައި ވިއްކާފައިވަނީ 957 މިލިއަން ޑޮލަރެވެ.
މިގޮތުން ވިއްކި ފައިސާގެ ތެރޭގައި ކާޑު މުއާމަލާތްތަކާއި، ޓެލްގްރެފިކް ޓްރާންސްފަރ (ޓީޓީ)، ތަޢުލީމު، ބޭސްފަރުވާ އަދި ދަތުރުފަތުރުގެ ބޭނުންތައް ހިމެނެއެވެ.
Advertisement
ކާޑު މުއާމަލާތްތަކާއި ޓީޓީ:
ދިވެހި ރުފިޔާ އެކައުންޓުތަކުން ކުރި ކާޑު މުއާމަލާތްތަކަށް ވޭތުވެދިޔަ ދެ އަހަރާއި ބައިގެ ތެރޭގައި 870 މިލިއަން ޑޮލަރު ވިއްކާފައިވެއެވެ. މިއީ ކުރީގެ ދެ އަހަރާއި ބައިގެ މުއްދަތާ އަޅައިބަލާއިރު ދެގުނަ އިތުރު އަދަދެކެވެ. 2021 ވަނަ އަހަރު މި ބޭނުމަށް މަހެއްގެ މައްޗަށް އެވްރެޖްކޮށް 10.7 މިލިއަން ޑޮލަރު ވިއްކާފައިވާއިރު، މިއަހަރު އެވްރެޖްކޮށް މަހަކު 37.8 މިލިއަން ޑޮލަރު ވިއްކަމުންދެއެވެ.
މީގެ އިތުރުން، 2023 ވަނަ އަހަރު ޓީޓީ ފޮނުވުމަށް މަހެއްގެ މައްޗަށް އެވްރެޖްކޮށް 10.2 މިލިއަން ޑޮލަރު ވިއްކާފައިވާއިރު، މިއަހަރު އެ އަދަދު ވަނީ މަހަކު 28 މިލިއަން ޑޮލަރަށް އުފުލިފައެވެ.
ތަޢުލީމާއި ބޭސްފަރުވާ:
ރާއްޖޭން ބޭރުގައި ކިޔަވާ ކުދިންނާއި ބޭސްފަރުވާގެ ބޭނުންތަކަށް ވިއްކާ ފައިސާގެ މިންވަރުވެސް ވަނީ ވަރަށް ބޮޑަށް އިތުރުވެފައެވެ. 2023 ވަނަ އަހަރު މި ބޭނުންތަކަށް މަހަކު 2.9 މިލިއަން ޑޮލަރު ވިއްކާފައިވާއިރު، 2024 ގައި އެ އަދަދު 4 މިލިއަނަށް އަދި 2025 ގައި 5 މިލިއަން ޑޮލަރަށް ވަނީ އަރާފައެވެ. މިއަހަރު ބޭންކުން އަންނަނީ މަހެއްގެ މައްޗަށް އެވްރެޖްކޮށް 5.8 މިލިއަން ޑޮލަރު ވިއްކަމުންނެވެ.
ދަތުރުފަތުރުގެ ބޭނުންތައް:
ދަތުރުވެރިންނަށް ނަގުދު ފައިސާގެ ގޮތުގައި ވިއްކި ޑޮލަރުގެ މިންވަރުވެސް ވަނީ 70 އިންސައްތަ އިތުރުވެފައެވެ. ޖަނަވަރީ 2021 އިން ޑިސެންބަރު 2023 އަށް 155 މިލިއަން ޑޮލަރު ވިއްކާފައިވާއިރު، ޖަނަވަރީ 2024 އިން ޖޫން 2026 އަށް 264 މިލިއަން ޑޮލަރު ވަނީ ވިއްކާފައެވެ. މިއަހަރުގެ ފުރަތަމަ 6 މަސްދުވަހު ބޭންކުން ވަނީ މަހަކަށް އެވްރެޖްކޮށް 8.5 މިލިއަން ޑޮލަރު ދަތުރުވެރިންނަށް ވިއްކާފައެވެ.
ބޭންކުން މަހެއްގެ މައްޗަށް ބޭރު ފައިސާ ވިއްކާ މިންވަރު ފާއިތުވި ފަސް އަހަރު ތެރޭގައި ވަނީ ގާތްގަނޑަކަށް ހަތަރު ގުނަ އިތުރުވެފައެވެ. 2021 ވަނަ އަހަރު މަހަކު އެވްރެޖްކޮށް 21 މިލިއަން ޑޮލަރު ވިއްކާފައިވާއިރު، 2026 ވަނަ އަހަރުގެ ފުރަތަމަ ހަ މަސްދުވަހު އެ އަދަދު ވަނީ 80 މިލިއަން ޑޮލަރަށް އަރާފައެވެ.
މިއަދަދުތަކުން ދައްކައިދެނީ ރާއްޖޭގެ ބޭރު ފައިސާގެ ބޭނުންތައް ފުއްދައިދިނުމުގައި ބީއެމްއެލްއިން ބަހައްޓާ ސާބިތުކަމެވެ. ބޭރު ފައިސާގެ ޑިމާންޑް އިތުރުވަމުންދާއިރު، ކަސްޓަމަރުންގެ ޒަރޫރީ ބޭނުންތަކަށް ޑޮލަރު ފޯރުކޮށްދިނުމަށް އަބަދުވެސް އިސްކަންދޭނެ ކަމަށް ބޭންކުން ބުނެފައިވެއެވެ.
