ކީރިތި ގުރްއާން ތިލާވަތުކުރުމަކީ ހިތަށާއި ރޫޙަށް ދިރުން ގެނެސްދޭ، ބަލިތަކަށް އޮތް ޝިފާއެއް: ހުތުބާ

ކީރިތި ޤުރްއާނަކީ އިންސާނާގެ ހިތަށާއި ރޫޙަށް ދިރުން ގެނެސްދޭ މާތް އަޅުކަމެއް ކަމަށާއި، އެއީ ޖިސްމާނީ އަދި ނަފުސާނީ ބަލިތަކަށް އޮތް މަތިވެރި ޝިފާއެއްކަން މިއަދުގެ ހުކުރު ހުތުބާގައި ބަޔާންކޮށްފިއެވެ.

މިއަދު އިއްވި ހުކުރު ހުތުބާ ހާއްސަކޮށްފައިވަނީ ކީރިތި ގުރުއާން ތިލާވަތުކުރުމުގެ މަތިވެރިކަމުގެ މައްޗަށެވެ. ހުތުބާގައި ބަޔާންކުރި ގޮތުގައި، އެންމެ މަތިވެރި އަދި އެންމެ ބަރަކާތްތެރި ފޮތަކީ ކީރިތި ގުރްއާނެވެ. އެއީ ކޮންމެ ހެޔޮކަމަކާއި ބާއްޖަވެރިކަމެއްގެ އަސްލު ކަމަށާއި، ހުރިހައި ކާމިޔާބީއެއްގެ ސިއްރަކީ ވެސް އެ ފޮތެވެ.

"އެ ފޮތުގެ އުސޫލުތަކުގައި ހިފަހައްޓައި، އޭގެ މާނަތަކާ މެދު ފިކުރުކޮށް، އެ ފޮތް ކިޔެވުމުގައި ދެމިހުންނަ މީހަކީ، ގެއްލުމެއްނުވާނޭ ފައިދާހުރި ވިޔަފާރިއެއްގައި ދެމިހުރި މީހެއް،" މާތް ﷲގެ ވަހީބަސްފުޅަކާ ހަވާލާދީ ހުތުބާގައި ބުނެފައިވެއެވެ.

ކީރިތި ގުރުއާން ކިޔަވައި އެއަށް ޢަމަލުކުރާ މީހާއަށް ގިޔާމަތް ދުވަހު އެ ފޮތް ޝަފާއަތްތެރިވާނެކަން ފާހަގަކުރަމުން ހުތުބާގައި ބުނީ، ގުރްއާނުން ކިޔަވާ ކޮންމެ އަކުރަކަށް ދިހަ ހެޔޮކަމުގެ ސަވާބު ލިބޭނެ ކަމަށެވެ. އަދި ގުރްއާން ކިޔަވައި އެ އުނގެނި އުނގަންނައިދޭ މީހުންގެ ވަށައިގެން މަލާއިކަތްބޭކަލުން ހާސިރުވެ، އެބައިމީހުންނަށް ރަހުމަތްލެއްވުމަށް އެދި ދުއާކުރައްވާނެ ކަމަށް ވެސް ބުނެފައިވެއެވެ.

ހުތުބާގައި އިތުރަށް ބަޔާންކޮށްފައިވާ ގޮތުގައި، ގުރުއާން ތިލާވަތުކުރުމަކީ އިންސާނާގެ ހަށިގަނޑަށާއި، ރޫހަށާއި، ހިތަށް ނުހަނު ފައިދާހުރި ހެޔޮ ބަދަލުތަކެއް ގެނުވައިދޭ ކަމެކެވެ. އިމާމް އިބްނުލް ގައްޔިމްގެ ބަސްފުޅަކާ ހަވާލާދީ ހުތުބާގައި ބުނީ، ހިތުގެ ބާރުގަދަވީ ވަރަކަށް ހަށިގަނޑުގެ ބާރާއި ދިރުން ވެސް އިތުރުވާނެ ކަމަށެވެ. އަދި ޒިކުރުކުރުމުން އިންސާނާއަށް ލިބޭ ބާރުވެރިކަމުގެ ސަބަބުން، ކުރިން އުނދަގޫވާނެ ކަމަށް ހީވި ކަންކަން ވެސް ފަސޭހަކަމާއެކު ފުރިހަމަކުރުމުގެ ތައުފީގު ލިބޭނެއެވެ.

ގުރުއާން ކިޔެވުމުގައި ފަރިތަ މީހުންނާއި، އުނދަގުލާއެކު އަޅައަޅައިގަނެގެން ކިޔަވާ މީހުންނަށް ވެސް މާތް ﷲގެ ހަސުރަތުން މަތިވެރި ދަރުމަ ލިބޭނެކަން ހުތުބާގައި ހަނދާންކޮށްދިނެވެ. އެގޮތުން އުނދަގުލާއެކު ކިޔަވާ މީހާއަށް ދެ ދަރުމަ ހުރިކަން ރަސޫލާގެ ހަދީޘްފުޅުން އެނގެން އޮތްކަން ފާހަގަކުރިއެވެ.

ހުތުބާގައި ނިންމާލަމުން ވަނީ، ހުރިހައި ހެޔޮކަމެއް ވަނީ މާތް ﷲގެ ފޮތުގައި ހިފެހެއްޓުމާއި އެ ފޮތް މަތިވެރިކުރުމުގައި ކަމަށްވާތީ، ގުރުއާނަށް ތަގުވާވެރިވުމަށް ހުރިހާ މުސްލިމުންނަށް ނަސޭހަތްތެރިވެފައެވެ. އަދި އެ ފޮތް ދޫކޮށްލުމަކީ ހުރިހާ ނުބައިކަމެއްގެ އަސްލުކަމުގައި ވެސް ބަޔާންކުރިއެވެ.