މާލޭ ނޯތު ހާބަރުގެ "އޭ ޒޯން" ގައި އަޅާ އޮޑިދޯނިފަހަރަށް ފެނާއި ކަރަންޓުގެ ހިދުމަތް ލިބޭނެ އިންތިޒާމު މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ގާއިމުކޮށް، އެ ހިދުމަތް ރަސްމީކޮށް ދޭން ފަށައިފި އެވެ.
މި ހިދުމަތް މިއަދު އިފުތިތާހުކޮށްފައިވާއިރު، އެންމެ ފުރަތަމަ މި ހިދުމަތް ދީފައިވަނީ "އިހައްދޫ" ބޯޓަށެވެ. މިއީ މާލޭ ނޯތު ހާބަރު ބޭނުންކުރާ އޮޑިދޯނިފަހަރަށް ކުރިމަތިވާ ނެ ދަތިތަކަށް ހައްލެއް ހޯދައިދިނުމުގެ ގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ކުރިއަށް ގެންދިޔަ މަޝްރޫއެކެވެ. ރައީސް މިގޮތަށް އެންގެވީ ބޮޑުތަކުރުފާނު މަގު ތަރައްގީ ކުރުމުގެ މަޝްރޫއުގެ ދެވަނަ ސެގްމެންޓް ނިންމައި، އެ ސަރަހައްދު އަލުން ހުޅުވުމާ ގުޅިގެން ރައްޔިތުންނަށް ދޭ ހިދުމަތްތައް ފުޅާކުރުމުގެ މަގުސަދުގަ އެވެ.
އެމްޕީއެލުން ބުނި ގޮތުގައި، މި މަސައްކަތް އަމަލީ ގޮތުން ފަށާފައިވަނީ މިއަހަރުގެ މާރިޗު މަހުގެ ތެރޭގަ އެވެ. މީގެ ކުރިން ނޯތު ހާބަރުގެ "އޭ ޒޯން" އިން ފެނާއި ކަރަންޓުގެ ހިދުމަތެއް ނުލިބެ އެވެ. އޭރު މި ހިދުމަތްތައް ލިބެމުން އައީ ހަމައެކަނި "ބީ ޒޯން" އަދި "ސީ ޒޯން" އިންނެވެ.
Advertisement
މި އާ ނިޒާމުގެ ދަށުން "އޭ ޒޯން" އިން އެއްފަހަރާ 48 އުޅަނދަށް ކަރަންޓުގެ ހިދުމަތް ފޯރުކޮށްދެވޭނެ އެވެ. އަދި ފެނުގެ ހިދުމަތް ދިނުމަށްޓަކައި އެ ސަރަހައްދުގައި 16 ޕޮއިންޓެއް ވަނީ ގާއިމުކޮށްފަ އެވެ. މި ޚިދުމަތުގެ ސަބަބުން އަތޮޅުތެރެއިން މާލެއަށް މުދާ ހިފައިގެން އަންނަ ބޯޓުފަހަރަށް ބޮޑެތި ލުއިފަސޭހަތަކެއް ލިބިގެންދާނެ ކަމަށް އެމްޕީއެލުން ފާހަގަކުރެ އެވެ.
ބޮޑުތަކުރުފާނުމަގު ޒަމާނީ ފެންވަރަށް ތަރައްގީ ކުރުމުގެ ދެވަނަ ފިޔަވަހީގެ ދަށުން، ލޯކަލް މާރުކޭޓުން ފެށިގެން ނޯތު ހާބަރާ ހަމައަށް 250 މީޓަރުގެ ސަރަހައްދެއްގައި ވަނީ ތާރު އަޅާފަ އެވެ. އަދި ފަޅުތެރެއިން ބައެއް ހިއްކައިގެން މަގަށް 6 މީޓަރުގެ ސަރަހައްދެއް އިތުރުކޮށް، އެ ސަރަހައްދު ވަނީ މިދިޔަ ފެބްރުވަރީ މަހުގެ 16 ވަނަ ދުވަހު އާންމު ދަތުރުފަތުރަށް ހުޅުވާލާފަ އެވެ.
