ޔޫރަޕިއަން ޔޫނިއަން (އީޔޫ) އާއި ބެލްޖިއަމަށް ރާއްޖޭން ކަނޑައަޅާފައި ހުންނަވާ ސަފީރުކަމުގެ މަޤާމަށް ކުރީގެ ބަންޑާރަނައިބު ފާތިމަތު ދިޔާނާ ސައީދު އައްޔަންކުރަން ރައްޔިތުންގެ މަޖިލީހަށް ފޮނުވައިފިއެވެ. ދިޔާނާ އެ މަޤާމަށް އައްޔަންކުރުމާމެދު ގޮތެއް ނިންމަވައިދެއްވުމަށް އެދިވަޑައިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވާފައިވާ ސިޓީފުޅު މިއަދު ވަނީ މަޖިލީހުގެ ޖަލްސާގައި އިއްވަވާފައެވެ.
އެކަމާމެދު މަޖިލީހުން ގޮތެއް ނިންމުމުގެ ކުރިން ދިރާސާކުރުމަށްޓަކައި، އެ މައްސަލަ މިހާރު ވަނީ މަޖިލީހުގެ ޚާރިޖީ ގުޅުންތަކުގެ ކޮމިޓީއަށް ފޮނުވާފައެވެ.
ސަފީރުކަމުގެ މަޤާމަށް އައްޔަންކުރެއްވުމުގެ ކުރިން، ރައީސް މުޢިއްޒު ވަނީ މިއަހަރުގެ އެޕްރީލް މަހުގެ ތެރޭގައި ދިޔާނާ އެމްބެސެޑާ-އެޓް-ލާޖްގެ މަޤާމަށް އައްޔަންކުރައްވާފައެވެ.
Advertisement
ދިޔާނާ ސައީދަކީ ރާއްޖޭގެ ޤާނޫނީ އަދި ސިޔާސީ ދާއިރާގައި ފާހަގަކޮށްލެވޭ ބޭފުޅެކެވެ. އޭނާ ވަނީ ޤައުމީ އަދި ބައިނަލްއަޤްވާމީ ފެންވަރުގައި މުހިންމު މަޤާމުތަކެއް ފުރުއްވާފައެވެ.
ދިޔާނާ ސައީދު ވަނީ އޮސްޓްރޭލިއާގެ ޔުނިވަރސިޓީ އޮފް ޓެސްމޭނިއާއިން ބެޗްލަރ އޮފް ލޯ ހާސިލްކުރައްވާފައެވެ. އަދި ޖަޕާނުގެ އޮސާކާ ޔުނިވަރސިޓީން މާސްޓަރ އޮފް ލޯ ހާސިލްކުރައްވާފައިވެއެވެ. އެކަމަނާ ބަންޑާރަ ނައިބު ކަން ކުރެއްވީ ކުރީގެ ރައީސް މުޙައްމަދު ނަޝީދުގެ ވެރިކަމުގައެވެ.
ދިޔާނާ އަކީ ދެކުނު އޭޝިއާގެ ސަރަޙައްދީ ޖަމްޢިއްޔާ (ސާކް) ގެ ސެކްރެޓަރީ ޖެނެރަލްކަން ފުރުއްވި ފުރަތަމަ އަންހެން ބޭފުޅާއެވެ. އަދި އެއީ އެ މަޤާމަށް އައްޔަންކުރެވުނު އެންމެ ޒުވާން ސެކްރެޓަރީ ޖެނެރަލްވެސް މެއެވެ.
ރައީސް ޑރ. މުޙައްމަދު ވަޙީދުގެ ވެރިކަމުގައި ދިޔާނާ ވަނީ މިނިސްޓަރ އޮފް ޖެންޑާ އެންޑް ހިއުމަން ރައިޓްސްގެ މަޤާމުވެސް ފުރުއްވާފައެވެ.
ދިޔާނާއަކީ ރާއްޖޭގައި މަލްޓި-ޕާޓީ ސިސްޓަމް ތަޢާރަފްވީއްސުރެ ސިޔާސީ ގޮތުން އިސްކޮށް ޙަރަކާތްތެރިވެވަޑައިގެންފައިވާ ބޭފުޅެކެވެ. އޭނާ ވަނީ ޑީއާރުޕީގެ އިތުރުން ޖުމްހޫރީ ޕާޓީގެ އަންހެނުންގެ ގޮފީގެ ރައީސްކަންވެސް ކުރައްވާފައެވެ.
އީޔޫ އަދި ބެލްޖިއަމްގެ ސަފީރުކަމަށް ދިޔާނާ އައްޔަންކުރުމުގެ މައްސަލަ މަޖިލީހުގެ ކޮމިޓީން ދިރާސާކުރުމަށްފަހު، ފާސްކުރުމަށް ތަޅުމަށް ފޮނުވާނެއެވެ.
