ޕްލާސްޓިކް ކޮތަޅުން ނަގަމުންދާ ފީއަށް ލުއިދިނުމަށާއި، ކުނި މެނޭޖުކުރުމުގެ ނިޒާމު ހަރުދަނާކުރުމަށް ސަރުކާރުގެ ފަރާތުން ކުނި މެނޭޖުކުރުމުގެ ގާނޫނަށް މުހިންމު އިސްލާހެއް ހުށަހަޅައިފިއެވެ. ރައްޔިތުންގެ މަޖިލީހަށް މި ބިލު ހުށަހެޅުއްވީ އުނގޫފާރު ދާއިރާގެ މެމްބަރު އިބްރާހިމް ޝިފާޒެވެ.

ބިލުގެ ފުރަތަމަ ކިޔުން މިހާރު ވަނީ މަޖިލީހުގައި އިއްވާފައެވެ. މި ބިލުގެ ސަބަބުން ކުނި މެނޭޖްކުރުމުގެ ދާއިރާއަށް ދެމެހެއްޓެނެވި އަދި ޖުމްލަ ވަށާޖެހޭ ހައްލެއް ލިބިގެންދާނެ ކަމަށް ބެލެވެއެވެ.

މި އިސްލާހުގެ ދަށުން ރައްޔިތުންނަށް ލިބޭ އެންމެ ބޮޑު ލުޔަކީ 50 ކޮތަޅަށްވުރެ ގިނަ އަދަދެއްގެ ޕްލާސްޓިކް ކޮތަޅު ހިމެނޭ ކޮތަޅުބޮނޑިން ދެ ރުފިޔާ ނެގުން ހުއްޓާލުމަށް ހިމަނާފައިވުމެވެ. މީގެ ސަބަބުން ޕްލާސްޓިކް ކޮތަޅުން ނަގާ ފީގެ ގޮތުގައި ދައުލަތަށް ލިބޭ އާމްދަނީއަށް ބަދަލު އައިސް، އާމްދަނީ ދަށްވާނެއެވެ. މީގެ އިތުރުން، ރާއްޖެއަށް ބޭރުން ކުނި އެތެރެކުރުން އެއްކޮށް މަނާކުރުމަށް ވެސް މި ބިލުގައި ވަނީ ހަރުދަނާ އުސޫލުތަކެއް ކަނޑައަޅާފައެވެ.

ބިލު ހުށަހެޅުމުގެ މައިގަނޑު މަޤްސަދަކީ ކުނި މެނޭޖްކުރުމުގެ ޤާނޫނު ތަންފީޒުކުރާ އިދާރާތަކުގެ ދައުރު މިހާރަށްވުރެ ސާފުކޮށް ބަޔާންކުރުމެވެ. އަދި މިހާރު ޤާނޫނު ތަންފީޒުކުރުމުގައި ދިމާވާ ދަތިތައް ހައްލުކޮށް، ކުނި މެނޭޖްކުރުމުގެ ކަންކަން ދެމެހެއްޓެނެވި ގޮތެއްގައި ރާވާ ހިންގުމަށް މަގުފަހިކުރުން ހިމެނެއެވެ. މީގެ އިތުރުން، އިޤްތިޞާދީ އަދި ސިނާއީ މަސައްކަތްތައް ކުރާ ތަންތަނުގައި ކުނި މެނޭޖްކުރުމުގެ ހާއްސަ ސިޔާސަތުތަކެއް އެކުލަވާލުން ވެސް ބިލުގައި ހިމެނެއެވެ.

އައު އިސްލާހުގައިވާ ގޮތުން ކުނި މެނޭޖްކުރާ އިރު ޤައުމީ މާސްޓަރ ޕްލޭނާއި، ސިޓީތަކުގެ ކުނި މެނޭޖްކުރުމުގެ ޕްލޭނާ އެއްގޮތަށް ކަންކަން ކުރަންޖެހޭނެއެވެ. ހަމައެހެންމެ، ކުނި މެނޭޖްކުރުމުގެ ނިޒާމް ފަރުމާކޮށް ޤާއިމްކުރުމާއި، ކުނި މެނޭޖްކުރާ މަރުކަޒުތަކުގެ މިންގަނޑުތައް ކަނޑައެޅުން ވެސް ހިމެނެއެވެ. އަދި ކުނި މެނޭޖްކުރުމުގައި ބޭނުންކުރާ ވަސީލަތްތައް ހުންނަންޖެހޭ ފެންވަރު މި ބިލުގެ ސަބަބުން ކަނޑައެޅިގެންދާނެއެވެ.