ފީފާ ވޯލްޑް ކަޕްގެ ގަދަ 16 ގެ ބުރުގައި އެމެރިކާގެ މައްޗަށް ބެލްޖިއަމްއިން ހޯދި ބޮޑު ކާމިޔާބީއާއެކު، އެމެރިކާ މުބާރާތުން ކަޓައިފިއެވެ. އެމެރިކާގެ ރައީސް ޑޮނަލްޑް ޓްރަމްޕް ސީދާ ފީފާގެ ރައީސް ޖިއާނީ އިންފަންޓީނޯއަށް ގުޅުއްވައި ނުފޫޒު ފޯރުއްވުމުން، އެމެރިކާގެ ތަރި ފޯލަރިން ބަލޮގުންއަށް ދެއްކި ރަތްކާޑުގެ ސަސްޕެންޝަން ފީފާއިން އޮތީ އުވާލާފައެވެ. މި ނިންމުމާއެކު އޭނާއަށް މެޗުގައި ކުޅުމުގެ ފުރުސަތު ލިބުނު ނަމަވެސް، އެމެރިކާގެ ޓީމަށް ބެލްޖިއަމް ހުއްޓުވޭ ގޮތެއް ނުވިއެވެ.
މި މެޗުން ބެލްޖިއަމް މޮޅުވީ 4-1 ގެ ބޮޑު ނަތީޖާއަކުންނެވެ. މެޗުގެ ފުރަތަމަ މިނެޓުން ފެށިގެން ބެލްޖިއަމްއިން ކުޅުން ކޮންޓްރޯލް ކުރިއިރު، އެމެރިކާގެ ޑިފެންސަށް ވަނީ ބޮޑެތި ގޯސްތަކެއް ހެދިފައެވެ. ބެލްޖިއަމްގެ ފަރާތުން ފެނުނު މޮޅު ކުޅުމާއެކު، އެމެރިކާގެ އަމިއްލަ ދަނޑުގައި އެ ޓީމު ބަލިކޮށް، ބެލްޖިއަމް ވަނީ ކުއާޓާ ފައިނަލުގެ ޖާގައެއް ކަށަވަރު ކޮށްފައެވެ.
އެމެރިކާގެ ސިއެޓްލްގެ ލޫމެން ފީލްޑްގައި ކުޅުނު ފޯރިގަދަ މެޗުގެ ފުރަތަމަ 19 ވަނަ މިނެޓުގައި ބެލްޖިއަމްއަށް ގޯލް ކާމިޔާބުކޮށްދިނީ ހޭންސް ވަނާކެންއެވެ.
Advertisement
އެމެރިކާގެ ކޮޅަށް ބެލްޖިއަމް އިން މެޗުގެ 19 ވަނަ މިނެޓުގައި ލަނޑު ޖަހާ މަންޒަރު.
އޭގެ ފަހުން 34 ވަނަ މިނެޓުގައި ޗާލްސް ޑި ކެޓެލެއާ ވަނީ ބެލްޖިއަމްގެ ދެވަނަ ލަނޑު ޖަހައި، ލީޑު ފުޅާކޮށްދީފައެވެ. އެމެރިކާއިން އުންމީދެއް ހޯދީ ފުރަތަމަ ހާފުގެ އިތުރުވަގުތުގެ ތެރޭގައި (45+1 މިނެޓުގައި) މަލިކް ޓިލްމަން ޖެހި ލަނޑުންނެވެ.
ނަމަވެސް ދެވަނަ ހާފުގައި ބެލްޖިއަމްއިން ވަނީ އެމެރިކާގެ ޑިފެންސް މުޅިން “ރޫޅާލާފައެވެ”. މެޗުގެ 52 ވަނަ މިނެޓުގައި ޗާލްސް ޑި ކެޓެލެއާ އޭނާގެ ދެވަނަ ލަނޑު ޖަހައި ނަތީޖާ 3-1 އަށް ބަދަލުކުރިއެވެ. ބެލްޖިއަމްގެ ތަޖުރިބާކާރު ފޯވާޑް ރޮމެލޫ ކުލާކޫ ވަނީ މެޗުގެ 73 ވަނަ މިނެޓުގައި ބެލްޖިއަމްގެ ހަތަރުވަނަ ލަނޑު ޖަހައި އެމެރިކާ މުބާރާތުން ކަޓުވާލިކަން ކަށަވަރުކޮށްދީފައެވެ.
އެމެރިކާ ކޮޅަށް ގޯލު ޖެހުމަށް ފަހު ލުކާކޫ އުފާފާޅުކުރަނީ
މި މެޗުގެ ކުރިން ބޮޑު ހޫނުގަނޑެއް އުފެދުނީ ބޮސްނިއާ މެޗުގައި ބަލޮގުންއަށް ދެއްކި ރަތްކާޑުގެ ސަސްޕެންޝަން ފީފާއިން އުވައިލުމުންނެވެ. ޓްރަމްޕް ވަނީ މިއީ ރެފްރީގެ ވަރަށް ގޯސް ނިންމުމެއް ކަމަށް ވިދާޅުވެ، ފީފާގެ ރައީސްއާ ފޯނުން ވާހަކަދައްކަވައި، އެ ނިންމުން މުރާޖައާ ކުރުމަށް އެދިވަޑައިގެންފައެވެ. ފީފާގެ ބައެއް އުސޫލުތަކުގެ ބޭނުން ހިފައި، އެއް އަހަރުގެ ޕްރޮބޭޝަނެއްގެ ދަށުން ބަލޮގުންގެ ސަސްޕެންޝަން ފީފާއިން ފަސްކޮށްދިނެވެ.
މި ނިންމުމާ ގުޅިގެން ޔޫރަޕްގެ ފުޓްބޯޅަ އިދާރާ (ޔޫއެފާ) އާއި ބެލްޖިއަމްގެ ފުޓްބޯޅަ ފެޑެރޭޝަނުން ވަނީ ވަރަށް ބޮޑަށް ހޫނުވެ، ފާޑުކިޔާފައެވެ. ޔުއެފާއިން ބުނިގޮތުގައި ފީފާއިން އެ ނިންމި ނިންމުމަކީ ފުޓްބޯޅައިގެ ރަތް ރޮނގު ހުރަސްކުރުމެކެވެ. ބެލްޖިއަމްގެ އެޕީލް ފީފާއިން ބޭރުކޮށްލުމާ ގުޅިގެން، ބެލްޖިއަމްގެ ބޮޑުވަޒީރުވެސް ވަނީ މިއީ ސިޔާސީ ނުފޫޒުން ނިންމި ނިންމުމެއް ކަމަށް ދޭހަވާ ގޮތަށް ސޯޝަލް މީޑިއާގައި ފާޑުވިދާޅުވެފައެވެ.
މެޗަށްފަހު ބެލްޖިއަމްގެ ކުޅުންތެރިންނާއި ސަޕޯޓަރުން ވަނީ ޓްރަމްޕަށާއި އެމެރިކާއަށް ވަރަށް ބޮޑަށް މަލާމާތް ކޮށްފައެވެ. އެގޮތުން މެޗުގެ ފަހު ލަނޑަށްފަހު ބެލްޖިއަމްގެ ކުޅުންތެރިން ދަނޑުމަތީގައި ޓްރަމްޕްގެ މަޝްހޫރު ނެށުން ނަށައި އުފާފާޅުކުރިއެވެ. އަދި ބެލްޖިއަމް ފުޓްބޯޅަ އެސޯސިއޭޝަނުން ސޯޝަލް މީޑިއާގައި "މި ނިންމުންވެސް ބަދަލުކޮށްބަލަ" ޖަހައި، ޓްރަމްޕްގެ ނުފޫޒަށް ވަރުގަދަ ރައްދެއް ދީފައި ވެއެވެ.
