ފީފާ ވޯލްޑްކަޕް 2026 ގެ ގަދަ 16 ގެ މިރޭ ފަތިހު އެމެރިކާ އާއި ބެލްޖިއަމް ބައްދަލުކުރާނެއެވެ. މެޗު ކުޅޭނީ ފަތިހު 5 ޖަހާއިރުގައެވެ.

ސިޔާސީ ގޮތުންނާއި ދުނިޔޭގެ މަސްރަހުގައި ހިނގާ ކަންކަމުގެ ސަބަބުން ގިނަ ބަޔަކު މި މެޗުގައި އެމެރިކާ ބަލިވާތަން ދެކެން ބޭނުންވާއިރު، މި ކުރިމަތިލުން ވެގެންދާނީ މުޅި މުބާރާތުގައިވެސް ފެންނާނެ އެންމެ ފޯރިގަދަ އެއް މެޗަށެވެ. މެޗު ކުޅުމަށް ހަމަޖެހިފައިވަނީ އެމެރިކާގެ ލުމެން ފީލްޑް ސްޓޭޑިއަމްގައެވެ.

މިރޭގެ މެޗަށް ނުކުންނައިރު ދެޓީމުގެ ފަރާތުން ފާހަގަކޮށްލެވޭ މުހިއްމު ބައެއް ކަންތައްތައް:

ބެލްޖިއަމް:

އެޓޭކިންގް ވަރުގަދަ ނަމަވެސް ޑިފެންސް ބަލިކަށި

ފޯވާޑް ލައިނުގެ ނުރައްކާ: ބެލްޖިއަމްގެ އެޓޭކްގައި ކެވިން ޑި ބްރޭނާ ފަދަ ތަޖުރިބާކާރު ކުޅުންތެރިން ތިބުމުން އެމެރިކާގެ ޑިފެންސަށް ބޮޑު ނުރައްކަލަކަށް ވާނެއެވެ.

ޑިފެންސްގެ ބަލިކަށިކަން: ކުރީ މެޗުތަކުގައި ބެލްޖިއަމްގެ ބެކްލައިނުން ހެދި ގޯސްތަކުގެ ފައިދާ އެމެރިކާއިން ހިފާފާނެ ކަމުގެ ބިރު އެބައޮތެވެ.

އެމެރިކާ:

ހޯމް އެޑްވާންޓޭޖް: އަމިއްލަ ގައުމުގައި ކުޅޭތީ އެމެރިކާއަށް ސަޕޯޓަރުންގެ ބޮޑު އެހީތެރިކަމެއް ލިބޭނެއެވެ.

ބަލޯގަންގެ މައްސަލަ: އެމެރިކާގެ މުހިއްމު ފޯވާޑް ފޮލަރިން ބަލޯގަން އަށް ދެއްކި ރަތްކާޑުގެ ސަބަބުން ކުރި ސަސްޕެންޝަން ވަނީ އުވާލާފައެވެ. އޭނާ މިރޭ ކުޅޭނެއެވެ. މިއީ އެމެރިކާއަށް ލިބޭނެ ބޮޑު ހިތްހަމަޖެހުމެކެވެ.