މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އަށް ނިމިދިޔަ ޖޫން މަހުގެ ތެރޭގައި މަސްކިރުވި ދޯނިތަކަށް 11.3 މިލިއަން ރުފިޔާ ދޫކޮށްފި އެވެ. މިއީ އެ ކުންފުންޏަށް މަސްކިރުވި ޖުމްލަ 517 ދޯންޏަކަށް ދޫކުރި ފައިސާ އެވެ.

މިފްކޯއިން އާންމުކޮށްފައިވާ ތަފާސްހިސާބުތަކަށް ބަލާއިރު، ޖޫން މަހު އެ ކުންފުންޏަށް ޖުމްލަ 568 ޓަނުގެ މަސް ވަނީ ކިރުވާފަ އެވެ. މީގެ ތެރޭގައި ހިމެނެނީ 196 ދޯންޏަކުން ކިރުވި 484.4 ޓަނުގެ ކަޅުބިލަމަހާއި، ތަފާތު ސައިޒުތަކުގެ ބޮޑުކަންނެއްޔެވެ.

ތަފްސީލީ ގޮތެއްގައި ބަލާއިރު، ކިރުވި ކަޅުބިލަމަހަށް 9.3 މިލިއަން ރުފިޔާ ވަނީ ދޫކޮށްފަ އެވެ. އަދި 10 ކިލޯއިން މަތީގެ 16.6 ޓަނުގެ ކަންނެއްޏަށް 331,440 ރުފިޔާ ދޫކޮށްފައިވާއިރު، 15 ކިލޯއިން މަތީގެ 67 ޓަނުގެ ކަންނެއްޏަށް 1.7 މިލިއަން ރުފިޔާ ވަނީ ދޫކޮށްފައެވެ. މި ހިސާބުތަކުން ދައްކާ ގޮތުގައި ޖޫން މަހު މަސްވެރިންނަށް ދޫކުރި ޖުމްލަ ފައިސާގެ އަދަދަކީ 11,332,391 ރުފިޔާ އެވެ.

އެގޮތުން، މަސްވެރިން ބާނާ މަހަށް 48 ގަޑިއިރުގެ ތެރޭގައި ފައިސާ ދޫކުރުމަކީ މި ސަރުކާރުން ނުހަނު އިސްކަމެއް ދެއްވައިގެން ކުރިއަށްގެންދަވާ މުހިންމު ސިޔާސަތެކެވެ. ރައީސް މުޢިއްޒު ވެރިކަމާ ހަވާލުވެވަޑައިގެންނެވިއިރު، ކުރީ ސަރުކާރުން މަސްވެރިންނަށް ދޫނުކޮށް 250 މިލިއަނެއްހާ ރުފިޔާ އޮތް ނަމަވެސް، އެމަނިކުފާނުގެ ވެރިކަމުގެ ފުރަތަމަ އަހަރުގެ ތެރޭގައި އެ ފައިސާ ވަނީ ދޫކޮށް ނިންމާފަ އެވެ.

ސަރުކާރުގެ އަމާޒަކީ މަސްވެރިންނަށް ހަމައަގު ހޯދައިދީ، ފައިސާ ދޫކުރުމުގެ އިންތިޒާމުތައް އިތުރަށް ހަރުދަނާކުރުމެވެ. މިގޮތުން މިފްކޯއިން މިހާރު މަސް ގަންނަ އަގުތަކަށް ބަލާއިރު، 10 ކިލޯއާއި 15 ކިލޯގެ މަސް ކިލޯއެއް 20 ރުފިޔާއަށް ގަންނަމުންދާއިރު، 15 ކިލޯއިން މަތީގެ މަސް ކިލޯއެއް ގަންނަނީ 25 ރުފިޔާއަށެވެ.

މަސްވެރިންނަށް ދިމާވާ ދަތިތައް ހައްލުކުރުމަށް ސަރުކާރުން އަންނަނީ މުހިންމު މަސައްކަތްތަކެއް ކުރަމުންނެވެ. އެގޮތުން 2024 ވަނަ އަހަރުގެ މަސްވެރިންގެ ދުވަހާ ގުޅުވައި، މަސްކިރުވާތާ 48 ގަޑިއިރުގެ ތެރޭގައި ފައިސާ ލިބޭނެ އިންތިޒާމު މިހާރު ވަނީ ހަމަޖައްސާފަ އެވެ.