ފީފާ ވޯލްޑް ކަޕް 2026 ގެ ގަދަ 16 ގައި މިރޭ ކެނެޑާއާ ދެކޮޅަށް ނުކުންނަ މެޗުން މޮޅުވާނެ ކަމަށް ގިނަ ބަޔަކު ބުރަވަނީ މޮރޮކޯ އެވެ. ދުނިޔޭގެ ރޭންކިންގެ 6 ވަނައިގައި އޮތް މޮރޮކޯ އާއި ކެނެޑާ ބައްދަލުކުރާ މި ފޯރިގަދަ މެޗު ކުޅުމަށް ހަމަޖެހިފައިވަނީ އެމެރިކާގެ ހޫސްޓަންގައެވެ.

ފުޓްބޯޅަ އެނަލިސްޓުން ލަފާކުރާ ގޮތުގައި މިރޭ މޮރޮކޯ މޮޅުވުމުގެ ފުރުސަތު 53 ޕަސަންޓަށް ވުރެ ބޮޑެވެ.

އެނަލިސްޓުން ބުރަވާ ގޮތުގައި މިރޭ މޮރޮކޯގެ އިސްމާއިލް ސައިބާރީ ގޯލެއް ޖެހުމުގެ ފުރުސަތު ބޮޑުކަމަށް ބެލެވޭއިރު، ކެނެޑާގެ ފަރާތުން އެންމެ ނުރައްކާ ކުރާނެ ކަމަށް ބެލެވެނީ ޖޮނަތަން ޑޭވިޑް އެވެ.

ދެޓީމުގެ ފޯނަށް ބަލާއިރު މޮރޮކޯ އެންމެ ފަހުން ކުޅުނު 33 މެޗުން ވެސް ބަލިވެފައި ނުވާ އިރު ގަދަ 16 އަށް ދަތުރުކުރީ ވަރުގަދަ ނެދަލެންޑްސް ޕެނަލްޓީ ޖަހައިގެން ބަލިކުރުމަށްފަހުއެވެ.

މުބާރާތް ބާއްވާ އެއް ގައުމުގެ ގޮތުގައި ކުޅޭ ކެނެޑާ ވަނީ ގަދަ 32 ގައި ދެކުނު އެފްރިކާ ބަލިކޮށް، ތާރީޚުގައި ފުރަތަމަ ފަހަރަށް ގަދަ 16 އިން ޖާގަ ހޯދާފައެވެ.

މޮރޮކޯގެ ވަރުގަދަ ސްކޮޑާއި ތަޖުރިބާއަށް ބަލާއިރު، މިރޭގެ މެޗު ކާމިޔާބުކޮށް ކުއާޓާ ފައިނަލަށް ދިއުމުގެ ފުރުސަތު އެ ޓީމަށް ވަރަށް ބޮޑެވެ.