މަގާމުގެ ނުފޫޒާއި އިހުތިޔާރު ނަހަމަ ގޮތުގައި ބޭނުންކޮށްގެން ހޯދާ މަންފާއަކީ އިންސާނާގެ ދިރިއުޅުން އަބާއްޖަވެރިކޮށްލާނެ ކަމެއްގެ ގޮތުގައި ސިފަކޮށް، އެފަދަ އަމަލުތަކުން ދުރުހެލިވުމަށް މުޅި އިސްލާމީ އުންމަތަށް މިއަދުގެ ހުކުރު ހުތުބާގައި ގޮވާލައިފިއެވެ.
"ކޮރަޕްޝަނާއި ރިޝްވަތުގެ ނުބައި ވަބާ" މި މައުޟޫއުށް ރާއްޖޭގެ އެކި ކަންކޮޅުތަކުގައި މިއަދު އިއްވި ހުތުބާގައި ބަޔާންކޮށްފައިވާ ގޮތުގައި، ކޮރަޕްޝަނަކީ މަގާމުގެ ނުފޫޒު ނުވަތަ ލިބިފައިވާ އިހުތިޔާރެއް ނަހަމަ ގޮތުގައި ބޭނުންކޮށްގެން، އަމިއްލަ ފައިދާއެއް ހޯދުމަށް ނުވަތަ ހޯދައިދިނުމަށް ކުރެވޭ ހިޔާނާތްތެރި އަމަލެކެވެ. މިއީ މާތް ﷲ ނަހީކުރައްވާފައިވާ، އަދި އެކަލާނގެ ކޯފާއަށް ހުށަހެޅޭނެ ބޮޑުވެގެންވާ ފާފައެކެވެ.
ހުތުބާގައި ބަޔާންކުރި ގޮތުގައި، އިންސާނާގެ ފިތުރަތަކީ އަދުލުވެރިކަމާއި އިންސާފަށް ލޯބިކުރުން ކަމަށްވީ ހިނދު، ކޮރަޕްޝަނަކީ އިޖުތިމާއީ ނިޒާމު ފުނޑުފުނޑުކޮށްލާ ބަލިމަޑުކަމެކެވެ. މިފަދަ އަމަލުތަކުގެ ސަބަބުން ބިން ފަސާދަވެ، ނަފުސުގެ އިއްޒަތް ގެއްލިގެންދެއެވެ. މާތް ﷲ ވަހީކުރައްވާފައިވާ ބަސްފުޅެއްގެ މާނައިގައިވަނީ، ބިމުގައި ފަސާދަ އުފެއްދުމަށް އެދިނޫޅުމަށާއި، ފަސާދަކުރާ މީހުންދެކެ ﷲ ލޯބިވެވޮޑިގެން ނުވާކަމަށެވެ.
Advertisement
ކޮރަޕްޝަނުގެ އެންމެ ނުރައްކާތެރި ބާވަތަކީ ރިޝްވަތުކަން ފާހަގަކުރަމުން ހުތުބާގައި ބުނީ، ރިޝްވަތު ދޭ މީހާއާއި ހިފާ މީހާއަށް މާތް ރަސޫލާ ﷺ ލައުނަތް ލައްވާފައިވާ ކަމަށެވެ. އަދި ކިތަންމެ ކުޑަ އަމާނާތަކަށް ހިޔާނާތްތެރިވި ކަމުގައިވިޔަސް، ގިޔާމަތް ދުވަހު އެ ހިޔާނާތަކާ އެކު އެ މީހަކު މަހުޝަރު ކުރެވޭނެކަމުގެ އިންޒާރު ހުތުބާގައި ދީފައިވެއެވެ.
ނަހަމަ މަންފާއަށް ދަހިވެތިވުމުގެ ނަތީޖާއަކީ އިޖުތިމާޢީ ޢަދުލުވެރިކަން ނެތިދިއުމާއި، ފަގީރުކަން އިތުރުވުމާއި، ގައުމުގެ އިގުތިސާދީ ތަނބުތައް ވެއްޓުމެވެ. "މުއްސަނދިކަމަކީ މުދާ ގިނަވުމެއް ނޫން، އެހެނެއްކަމަކު އެއީ ނަފުސުގެ ފުދުންތެރިކަން،" ކަމަށް ބަޔާންކުރާ ހަދީޘްފުޅަށް ރިއާޔަތްކޮށް، ހުތުބާގައި ނަސޭހަތްތެރިވީ ދީނާއި ނަފުސުގެ ކަރާމާތް ހަރާމް މަންފާއަށް ވިއްކާނުލުމަށެވެ.
ހުތުބާ ނިންމާލަމުން ގޮވާލާފައިވަނީ، ދުނިޔެވީ ހަޔާތުގެ ބާއްޖަވެރިކަމާއި އާހިރަތުގެ ފަލާހާއި ކާމިޔާބަށް އެދޭނަމަ، ކޮރަޕްޝަނާއި ރިޝްވަތުގެ ނޭއްގާނީ އަމަލުތަކުން ދުރުހެލިވުމަށެވެ. އަދި މުއުމިނުންނަކީ ކޮންމެ ކަމެއްގައިވެސް މާތް ﷲގެ ރުހިވޮޑިގަތުން އިސްކުރާ ބަޔަކަށް ވުމަށެވެ.
މިއަދުގެ ހުތުބާއަކީ މުޖުތަމައުގައި އަށަގަންނަމުންދާ ނޭދެވޭ އާދަތަކާ ދެކޮޅަށް ރައްޔިތުން ހޭލުންތެރިކުރުވުމަށް ދީފައިވާ މުހިންމު މެސެޖެކެވެ.
