ތިމާވެއްޓާ ރައްޓެހި އަދި ދެމެހެއްޓެނިވި މާލީ އެހީތެރިކަން ފޯރުކޮށްދިނުމުގެ ދާއިރާއިން ދޭ 'އެކްސެލެންސް އިން ގްރީން އެންޑް ސަސްޓެއިނަބަލް ފައިނޭންސް' އެވޯޑް ބޭންކް އޮފް މޯލްޑިވްސް (ބީ.އެމް.އެލް) އަށް ލިބިއްޖެއެވެ.
މި އެވޯޑް ބީއެމްއެލްއަށް އަރުވާފައިވަނީ މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) އިން އަލަށް ތައާރަފްކުރި 'މޯލްޑިވްސް ފައިނޭންޝަލް ސެކްޓަރ އެވޯޑްސް' ހަފްލާގައެވެ. މި ހަފްލާއަކީ އެމް.އެމް.އޭގެ 45 ވަނަ އަހަރީ ދުވަހާ ގުޅުވައިގެން، ރާއްޖޭގެ މާލީ ދާއިރާ ތަރައްޤީކޮށް ޒަމާނީ ކުރުމަށް ފާހަގަކޮށްލެވޭ ފަދަ ހިދުމަތްތަކެއް ކޮށްދީފައިވާ މުއައްސަސާތަކާއި ފަރުދުންގެ އަގުވަޒަންކުރުމުގެ ގޮތުން ބޭއްވި ހާއްސަ ރަސްމިއްޔާތެކެވެ.
'އެކްސެލެންސް އިން ގްރީން އެންޑް ސަސްޓެއިނަބަލް ފައިނޭންސް' ދާއިރާއިން ބީއެމްއެލް އަށް މި އެވޯޑް ދީފައިވަނީ ތިމާވެއްޓާ ރައްޓެހި، މޫސުމަށް އަންނަ ބަދަލުތަކަށް ސަމާލުކަންދޭ، އަދި ދެމެހެއްޓެނިވި އުސޫލުތަކުގެ މައްޗަށް ބިނާވެފައިވާ މާލީ ހިދުމަތްތަކާއި މަޝްރޫއުތައް ކުރިއެރުވުމަށް އެ ބޭންކުން ކުރަމުންދާ މަސައްކަތްތަކުގެ ސަބަބުންނެވެ.
Advertisement
ބޭންކް އޮފް މޯލްޑިވްސް އަށް މި ޝަރަފުވެރި އެވޯޑް ލިބުމުގެ މައިގަނޑު ސަބަބެއްގެ ގޮތުގައި އެމް.އެމް.އޭ އިން ފާހަގަކުރީ، ރާއްޖޭގެ ނާޒުކު ތިމާވެށި ހިމާޔަތްކުރުމަށް ކުރިއަށްގެންދާ އެކި ހަރަކާތްތަކަށް ބޭންކުން މެދުނުކެނޑި އެހީތެރިކަން ފޯރުކޮށްދެމުންދާތީއެވެ. އަދި ތިމާވެއްޓާ ރައްޓެހި އިންވެސްޓްމަންޓްތަކަށް މަގުފަހިކޮށްދީ، ދެމެހެއްޓެނިވި އިގްތިސާދީ ތަރައްގީއަކަށް ބޭންކުން ދޭ އެއްބާރުލުން އެވޯޑް ޕެނަލުން ވަނީ ފާހަގަކޮށްފައެވެ.
މޫސުމަށް އަންނަ ބަދަލުތަކުގެ ނުރައްކާ ބޮޑުވެފައިވާ މި ދަނޑިވަޅުގައި، ދެމެހެއްޓެނިވި ތަރައްޤީއާއި މޫސުމީ ކަންކަމަށް ކެތްތެރިވުމުގެ ޤާބިލުކަން އިތުރުކުރުމަށް ދިވެހި ސަރުކާރުން މިހާރު ވަނީ ހާއްސަ އިސްކަމެއް ދީފައެވެ. މި މަގްސަދު ހާސިލުކުރުމަށްޓަކައި 'ގްރީން ފައިނޭންސް' ނުވަތަ ތިމާވެއްޓާ ރައްޓެހި މާލީ ނިޒާމެއް ބިނާކުރުމަކީ މުހިންމު ކަމެކެވެ. މީގެ ސަބަބުން ވިޔަފާރިތަކާއި ފަރުދުން ތިމާވެއްޓާ ރައްޓެހި އުސޫލުތަކަށް އަހުލުވެރިވުމަށް ބޮޑު ބާރަކަށް ވެގެންދެއެވެ.
މޯލްޑިވްސް ފައިނޭންޝަލް ސެކްޓަރ އެވޯޑްސް ތައާރަފްކުރުމުގެ ބޭނުމަކީ ރާއްޖޭގެ މާލީ ދާއިރާއަށް އައު އީޖާދުތައް ތައާރަފްކޮށް، ދެމެހެއްޓެނިވި އުސޫލުން ހިދުމަތް ދޭ ފަރާތްތަކަށް ހިތްވަރު ދިނުމެވެ. ބީއެމްއެލްއަށް ލިބުނު މި ކާމިޔާބީއަކީ ގައުމުގެ ދެމެހެއްޓެނިވި ތަރައްގީގެ ލަނޑުދަނޑިތައް ހާސިލުކުރުމުގައި މާލީ އިދާރާތަކުން އަދާކުރާ ޒިންމާދާރު ދައުރު ރަމްޒުކޮށްދޭ ކަމެކެވެ.
