މާލޭގެ އުތުރު ފަރާތު ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ފުރަތަމަ ފިޔަވަހީގެ މަސައްކަތް ބާރު ދުވެލީގައި ކުރިއަށްދާކަމަށާއި، ތާރު އެޅުމުގެ މަސައްކަތަށް ވާންޖެހޭ އެންމެ ފަހުގެ ތައްޔާރީތައް ވަމުންދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އިން ހާމަކޮށްފިއެވެ.
މާލޭގެ އުމްރާނީ ތަރައްޤީގެ މި މުހިންމު މަޝްރޫޢުގެ ތާރު އެޅުމަށް ބޭނުންވާ މެޝިނަރީޒް މިހާރު ވަނީ ސައިޓަށް ގެންގޮސްފައެވެ. އެމް.ޓީ.ސީ.ސީ އިން މަޢުލޫމާތު ދޭ ގޮތުގައި، މަގުގެ ސެގްމެންޓް 4 އަދި 5 ގެ ސަބް-ބޭސްގެ މަސައްކަތް މާދަމާ ފެށުމަށް ވަނީ ހަމަޖެހިފައެވެ. އަދި އަންނަ ހަފުތާގެ ތެރޭގައި އެގްރިގޭޓް ބޭސް ކޯސް (ABC) އެޅުމާއި ތާރު އެޅުމުގެ އަމަލީ މަސައްކަތް ފެށޭނެއެވެ.
މީގެ އިތުރުން، މަޝްރޫޢުގެ ތެރޭގައި ހިމެނޭ ޝީޓް ޕައިލް ޖެހުމުގެ ބާކީ ހުރި މަސައްކަތްތައް އަންނަ ހަފުތާގެ ކުރީކޮޅަށް ނިންމާލެވޭނެ ކަމަށް ބެލެވެއެވެ. ހަމައެއާއެކު، ހިނގާ މީހުންނަށް ޚާއްޞަ ސައިޑްވޯކް ހެދުމާއި، ޕާކިންގ ޒޯންތަކުގައި ކާބްސްޓޯން ހަރުކުރުމުގެ މަސައްކަތްވެސް ތާވަލާ އެއްގޮތަށް ދަނީ ކުރިއަށެވެ. އަދި އެއްގަމު ތޮށީގެ ކެޕިންގ ކޮންކްރީޓް މަސައްކަތުގެ އެންމެ ފަހު މަރުޙަލާވެސް އަންނަ ހަފުތާގައި ފެށުމަށް ވަނީ ތައްޔާރުވެފައެވެ.
Advertisement
2025 ވަނަ އަހަރު 144.5 މިލިއަން ރުފިޔާއަށް ހަވާލުކުރެވުނު މި މަޝްރޫޢަކީ މާލޭގެ އުތުރު ފަރާތު ބޮޑުތަކުރުފާނު މަގުގެ 1،088 މީޓަރުގެ ސަރަޙައްދެއް ތަރައްޤީކުރުމުގެ ބޮޑު މަޝްރޫޢެކެވެ. މީގެ ދަށުން ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް މަގު ފުޅާކޮށް، ހަތަރު ލޭނަށް ބަދަލުކުރެވޭނެއެވެ. އަދި ޒަމާނީ ފެންވަރުގެ ސައިޑްވޯކްތަކާއި، ވަރުގަދަ އެއްގަމު ތޮއްޓެއްގެ އިތުރުން، ފެންބޮޑުވުމުގެ މައްސަލައަށް ހައްލެއް ހޯދުމަށްޓަކައި ޒަމާނީ ފެންހިންދާ ނިޒާމެއްވެސް ގާއިމުކުރެވޭނެއެވެ.
މި މަޝްރޫޢުގެ ބައެއް ސަރަޙައްދުތައް މިހާރު ނިމި އާންމުންނަށް ހުޅުވާލާފައިވާއިރު، އޭގެ ސަބަބުން މާލޭގެ މާރުކޭޓު ސަރަޙައްދާއި ބަނދަރު ސަރަޙައްދުގެ ޓްރެފިކް ތޮއްޖެހުމަށް ބޮޑު ލުޔެއް ވަނީ ލިބިފައެވެ. މި މަޝްރޫޢު އެއްކޮށް ނިމުމުން، މާލޭގެ އިޤްތިޞާދީ މަރުކަޒީ ސަރަޙައްދުގައި ދަތުރުފަތުރުކުރުމާއި މުދާ އުފުލުމަށް ބޮޑެތި ފަސޭހަތަކެއް ލިބި، ރައްޔިތުންނަށް ރައްކާތެރި އަދި ފުރިހަމަ އުމްރާނީ ވަސީލަތްތަކެއް ކަށަވަރުވެގެންދާނެއެވެ.
