މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން، އަމިއްލަ އިސްނެގުމުގެ މަތިން އާންމުކުރަންޖެހޭ އެންމެހާ މައުލޫމާތުތައް ހާމަކުރި ސަރުކާރު ހިއްސާވާ ފުރަތަމަ ކުންފުނި (އެސްއޯއީ) އަކަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ވެއްޖެއެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނު (އާރުޓީއައި ގާނޫނު) ގެ 37 ވަނަ މާއްދާގައި ބަޔާންކޮށްފައިވާ ގޮތުގެ މަތިން، ދައުލަތުގެ މުއައްސަސާތަކުން އަމިއްލަ އިސްނެގުމުގެ މަތިން 13 ބާވަތެއްގެ މައުލޫމާތު އާންމުކުރަން ޖެހެއެވެ. އެޗްޑީސީން މިހާރު ވަނީ އެ ކޯޕަރޭޝަންގެ ރަސްމީ ވެބްސައިޓުގައި މިކަމަށް ހާއްސަ އިންފޮމޭޝަން ޑައިރެކްޓްރީއެއް ގާއިމުކޮށް، އެ ހުރިހާ މައުލޫމާތެއް އާންމުންނަށް ފެންނާނެހެން ހާމަކޮށްފައެވެ.

އާންމުކުރި މައުލޫމާތުތަކުގެ ތެރޭގައި އެޗްޑީސީގެ މަސްއޫލިއްޔަތުތަކާއި، އޮނިގަނޑާއި ވާޖިބުތަކުގެ އިތުރުން، ކުންފުނީގެ އަހަރީ ބަޖެޓާއި ކުރަން ރާވާފައިވާ ހަރަދުތަކުގެ ތަފްސީލު ހިމެނެއެވެ. މީގެ އިތުރުން، މުވައްޒަފުންނަށް ވަކިވަކިން ދޭ އުޖޫރައާއި، ކުންފުނީގެ ނިންމުންތައް ނިންމުމުގައި އަމަލުކުރާ މަރުހަލާތަކާއި ޒިންމާދާރުކުރުވުމުގެ ނިޒާމު ރޭވިފައިވާ ގޮތް ވެސް މިހާރު އާންމުންނަށް ބަލާލެވޭނެއެވެ.

މިއީ ރައްޔިތުންގެ މަސްލަހަތަށްޓަކައި، މަދުވެގެން އަހަރަކު އެއްފަހަރު އާންމުކުރަންޖެހޭ މައުލޫމާތުތަކެކެވެ. ސަރުކާރު ހިއްސާވާ ކުންފުނިތަކުގެ ތެރެއިން މިފަދަ ނިންމުމެއް އެންމެ ފުރަތަމަ ނިންމި ކުންފުންޏަށް ވުމަކީ އެޗްޑީސީއަށް ލިބޭ ވަރަށް ބޮޑު ފަހުރެއް ކަމަށް އެ ކުންފުނިން ފާހަގަކުރެއެވެ.

ފާހަގަކޮށްލެވޭ ގޮތުގައި، ގާނޫނުގައިވާ ގޮތުގެ މަތިން ދައުލަތުގެ އިދާރާތަކުން އަމިއްލައަށް އިސްނަގައިގެން ހާމަކުރަންޖެހޭ މައުލޫމާތުތައް ސަރުކާރުގެ ވުޒާރާތަކުން މިހާރު ވަނީ އާންމުކުރަން ފަށާފައެވެ. މިއީ 2014 ވަނަ އަހަރު އާރުޓީއައި ގާނޫނަށް އަމަލުކުރަން ފެށި ފަހުން، މިގޮތަށް ދައުލަތުގެ އިދާރާތަކުން ފުޅާ ދާއިރާއެއްގައި މައުލޫމާތު ހާމަކުރަން ފެށި ފުރަތަމަ ފަހަރެވެ.

އެޗްޑީސީން ބުނީ އެ ކުންފުނީގެ އަމާޒަކީ އަބަދުވެސް ވީހާވެސް ހާމަކަންބޮޑު ގޮތެއްގައި ކުންފުނީގެ ކަންކަން ކުރިއަށް ގެންގޮސް، ރައްޔިތުންނަށް އިތުބާރު ހުރި އަދި ފުރިހަމަ ހިދުމަތެއް ފޯރުކޮށްދިނުން ކަމަށެވެ.