މުޅި ދުނިޔެއަށް ނުރައްކާވާ ޙާލަތުގައި އޮތް ކަމަށް މި މަހުގެ 14 ވަނަ ދުވަހު ކަނޑައެޅި އެމްޕޮކްސް ބަލި ފެތުރޭ މައިގަނޑު ސަބަބަކީ ގައިގޯޅިވެ، ހުރަހަކާ ނުލައި ބީހުން ކަމަށް ދުނިޔޭގެ ޞިއްޙަތު ޖަމިއްޔާ، ޑަބްލިޔުއެޗްއޯއިން ބުނެފިއެވެ.
ޑަބްލިޔުއެޗްއޯއިން ބުނީ އެމްޕޮކްސް ޖެހިފައިވާ މީހެއްގެ ހަށިގަނޑުގައި އަތްލައި ގައިގޯޅިކޮށް އުޅުމާ ބަލާއިރު، ވާހަކަ ދައްކާއިރު ބުރައިގެންދާ ކުޅަކީ އެ ބަލި ފެތުރޭ ބޮޑު ސަބަބެއްގެ ގޮތުގައި ނުބެލޭ ކަމަށާއި، އެ ބަލި މައިގަނޑު ގޮތެއްގައި ފެތުރެނީ ބަލި ޖެހިފައިވާ މީހަކާ "ކްލޯޒް ފިޒިކަލް ކޮންޓެކްޓް" ވުމުން ކަމަށެވެ.
މީގެ އިތުރުން، ބަލި ޖެހިފައިވާ މީހަކާއި "ފޭސް ޓު ފޭސް" ކޮށް ބައްދަލުވެ ވާހަކަދައްކައި އަދި ކައިރީގައި ތިބެ ނޭވާ ލުމުންވެސް ބަލީގެ ވައިރަސް ފެތުރުނު ނަމަވެސް، އެއީ ބަލި ފެތުރުމުގެ މައިގަނޑު ސަބަބެއް ނޫން ކަމަށް ޑަބްލިޔުއެޗްއޯއިން ބުންޏެވެ.
Advertisement
ޑަބްލިޔުއެޗްއޯގެ ތަރުޖަމާނު މާގްރެޓް ހެރިސް ވިދާޅުވީ އެމްޕޮކްސް ފެތުރޭ އެންމެ ބޮޑު ސަބަބެއްގެ ގޮތުގައި ފެންނަނީ "ގައިގޯޅިވެ، ހުރަހަކާ ނުލައި ބީހުން" ކަމަށެެވެ. އޭނާ ވިދާޅުވީ މިހާރު އެކި ޤައުމުތަކުން މި ބަލި ފެތުރެމުންދާ ސަބަބު ދެނެގަތުމަށް އިތުރު ދިރާސާތައް ބޭނުންވާ ކަމަށެވެ.
މި ވަގުތު މި ބަލި ހަލުވި ކަމާއެކު ފެތުރެމުން ދަނީ ޑިމޮކްރެޓިކް ރިޕަބްލިކް އޮފް ކޮންގޯ އާއި އެފްރިކާގެ ބައެއް ޤައުމުތަކުގައެވެ. 2022 ވަނަ އަހަރުން ފެށިގެން މި އަހަރުގެ މިހާތަނަށް 116 ޤައުމަކުން މި ބަލީގައި 99000 އަށްވުރެ ގިނަ ކޭސް ވަނީ ފެނިފައެވެ.
އެމްޕޮކްސްގައި އާއްމުކޮށް ފެންނަ އަލާމާތްތަކުގެ ތެރޭގައި ހުން އައުމާއި، ގައިގައި ރިއްސުމާއި، ވަރުބަލިވުމާއި، ގޮށްލުމާއި އަދި ހަމުގައި ބިހި ނެގުން ފަދަ އަލާމާތްތައް ހިމެނެއެވެ. ގިނަ ފަހަރަށް މި ބަލި އަމިއްލަ ޒާތުގައި ރަނގަޅުވީނަމަވެސް ބަލީގެ ހާލަތަށް ބަލާ ހޮސްޕިޓަލުގައި ފަރުވާ ދޭންޖެހޭ ހާލަތު މެދުވެރިވެއެވެ. މި ބައްޔަށް ވަކި ޚާއްސަ ފަރުވާއެއް ހޯދިފައި ނެތް ބައްޔަކަށް ވާއިރު، ބަލި ޖެހިފައިވާ މީހާގެ ފަރާތުން ފެންނަ އަލާމާތްތަކަށް ބަލާ، ފޯރުކޮށްދެވެނީ ސަޕޯޓިވް ފަރުވާއެކެވެ.
