ކޮވިޑް-19 ގެ ދުވަސްވަރު އަމިއްލަ ފަރާތަކުން ލިއްލާހިއަށްޓަކައި ހުޅުމާލޭގެ ވިނަރެސް ފްލެޓްތައް ހުރި ސަރަހައްދުގައި އިމާރާތް ކުރަން ފެށި މިސްކިތުގެ މަސައްކަތް ވަރަށް ބޮޑަށް ލަސްވެ، އާންމުންގެ ބޮޑެތި ފާޑުކިއުންތަކެއް ފެޑޯ ކޮންސްޓްރަކްޝަން އަށް އަމާޒުވެއްޖެއެވެ.

އެ ސަރަހައްދުގައި ދިރިއުޅޭ ރައްޔިތުންނަށް ނަމާދު ކުރާނެ މިސްކިތެއްގެ ބޭނުން އިންތިހާއަށް ޖެހިފައިވާއިރު، މިސްކިތުގެ މަސައްކަތް މިހާތަނަށް ކުރިއަށް ގޮސްފައިވަނީ އެންމެ 30 އެއްހާ އިންސައްތައަށެވެ.

މިމައްސަލަ އެންމެ ފުރަތަމަ ސަރުކާރުގެ ކަމާބެހޭ ފަރާތްތަކުގެ ސަމާލުކަމަށް ގެނައި ބިތުފަންގި.ކޮމް އޮން ކަށަވަރުކުރި ގޮތުގައި މިސްކިތް ބިނާކުރުމަށްޓަކައި ކޮންޓްރެކްޓަރު ފެޑޯއަށް އެޑްވާންސްގެ ގޮތުގައި އެތައް މިލިއަން ރުފިޔާއެއް (ފުލް ޕޭމެންޓް) އެއްފަހަރާ ވަނީ ހަވާލުކޮށްފައެވެ. އެއީ ކޮވިޑް19 ދުވަސްވަރުގައެވެ.

"ވީ ބިލްޑް ޓްރަސްޓް" ނުވަތަ އިތުބާރު ބިނާކުރާ ކަމުގެ ޝިއާރު ހަރުކޮށްގެން ހިންގާ ފެޑޯ ކުންފުނިން، ފައިސާ ލިބުމުން ވެސް މިސްކިތް ނުނިމި ދިގުލައިގެންދާ މައްސަލައަކީ ދީނީ އަދި އިޖުތިމާއީ ގޮތުން ވެސް ބަލައިގަނެވޭނެ ކަމެއް ނޫން ކަމަށް ބުނެ ގިނަ ބަޔަކު ދަނީ ހިތްހަމަނުޖެހުން ފާޅުކުރަމުންނެވެ.

ފަހުން ފެށި ބޮޑެތި އިމާރާތްތައް ނިމުނުއިރު މިސްކިތް އޮތީ ބިންމަތީގައި!

މިސްކިތުގެ މަސައްކަތް ފެށިފަހުން، ފެޑޯ ކޮންސްޓްރަކްޝަނުން ވަނީ ހުޅުމާލޭގައި އެއަށްވުރެ މާ ބޮޑެތި އަދި މާ ގިނަ ވަގުތު ނަގާނެ މަޝްރޫއުތައް ފަށައި، އެތަންތަން މުޅިން ނިންމާލާފައެވެ. އޭގެ ތެރޭގައި އަހުމަދިއްޔާ ސްކޫލުގެ އައު އިމާރާތް ވެސް ހިމެނޭއިރު، މިސްކިތަށްވުރެ މާ ފަހުން ފެށި ނަމަވެސް، މިހާރު ވަނީ އެއްކޮށް ނިންމާލާފައެވެ. މީގެ އިތުރުން އެޗްޑީސީގެ ބޮޑެތި ޕްރޮޖެކްޓްތަކާއި، ސަރުކާރާއި ކުންފުނިތަކުގެ ބޮޑެތި މަޝްރޫއުތައް ވަނީ ނިންމާފައެވެ. *

އާންމުން ސުވާލު އުފައްދަނީ، (މާފަހުން ފެށި) ވިޔަފާރީގެ އުސޫލުން ބޮޑު ފައިދާލިބޭ މިފަދަ ޓަވަރުތަކާއި ސްކޫލްތައް ނިންމާލިއިރު، މާތްވެގެންވާ މިސްކިތުގެ މަސައްކަތް އެޑްވާންސް ފުލް ޕޭމެންޓް ލިބުމުން ވެސް އަޅާނުލައި ދޫކޮށްލާފައިވަނީ ކީއްވެގެންތޯއެވެ؟

އާންމުންގެ ކަންބޮޑުވުން:

ވިނަރެސް ފްލެޓްތަކުގައި ދިރިއުޅޭ ރައްޔިތުންނާއި ހުޅުމާލޭގެ ގިނަ ބަޔަކު ސިފަކުރާ ގޮތުގައި، މިއީ މިސްކިތް އެޅުމުގެ ނަމުގައި ހިންގާފައިވާ ވަރަށް ބޮޑު އިހުމާލެކެވެ. ދީނީ ބިނާތަކަށް ދޭންޖެހޭ އަހައްމިއްޔަތުކަން ކުޑަކޮށް، އަމިއްލަ ވިޔަފާރީގެ ފައިދާއަށް ކުންފުނިން އިސްކަންދޭ ކަމުގެ ހެއްކެކެވެ. މިސްކިތް ނުނިމި މިހާ ގިނަ ދުވަސްވުމުން، އެ ސަރަހައްދުގެ މީހުން ނަމާދަށް ދިއުމަށް ބޮޑެތި ތަކުލީފުތަކެއް އުފުލަންޖެހެއެވެ. ރައްޔިތުން ގޮވާލަނީ ކަމާބެހޭ މުއައްސަސާތަކުން މި މައްސަލަ ބަލައި، ފެޑޯ ކޮންސްޓްރަކްޝަނުން މިސްކިތުގެ މަސައްކަތް އަވަހަށް ނިންމުމަށް މަޖުބޫރުކުރުވުމަށެވެ.