ދިވެހިރާއްޖޭގެ ޒުވާނުންނާއި އޮންލައިން ވިޔަފާރިވެރިން އެތައް އަހަރެއް ވަންދެން އިންތިޒާރުކުރަމުން އައި ޕޭޕާލްގެ ޚިދުމަތް ރާއްޖެއަށް ގެނެސްދީފައި ވަނީ ދިވެހި ސަރުކާރުން ކުރި ބުރަ މަސައްކަތުންނެވެ۔ ކުރީގެ ސަރުކާރަށް އެކަން ކުރަން އުޅެއުޅެ ނުކުރެވުނެވެ.

ނަމަވެސް މި ކަމަކީ ކުރީ ސަރުކާރުން ފެށި މަސައްކަތެއް ކަމަށް ބުނެ އިދިކޮޅުން ވާހަކަ ދެއްކި ނަމަވެސް، ޤާނޫނީ އަދި އިދާރީ ހުރަސްތައް ނައްތާލައި މި ޚިދުމަތް އެއްކޮށް ކޮށްނިންމައި ރައްޔިތުންނަށް ފޯރުކޮށްދިނީ މި ސަރުކާރުންނެވެ۔

އެމްޑީޕީގެ ވެރިކަމުގައި އެކަން ކުރަން އުޅުނު ނަމަ އެކަން ވީހެވެ. އެކަމަށް ބޭނުންވާ ޤާނޫނީ ފިޔަވަޅުތަކާއި ސިޔާސަތުތައް އެމްޑީޕީގެ ވެރިކަމުގައި ފުރިހަމަ ކުރާކަށް އެމީހުންނަށް 5 އަހަރު ލިބުނު އިރު، އެމީހުން އުޅުނީ އެހެން ކަންކަމާއިގެންނެވެ. އެހެންވެ ޕޭޕާލް އަށް ބޭނުންވާ މުހިއްމު ކަންކަން އޮތީ ފުރިހަމަ ނުކުރެވިއެވެ.

އެހެންކަމުން، މިސަރުކާރުން އިސްނަގައިގެން ޕޭޕާލާއި އުރީދޫ މޯލްޑިވްސްއާ ގުޅިގެން ކުރެވުނު މަސައްކަތުން، އެމް-ފައިސާގެ ޒަރީއާއިން ޕޭޕާލް ފުރިހަމައަށް އިންޓެގްރޭޓްކޮށް މިހާރު ވަނީ ޚިދުމަތް ފަށާފައެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން މިކަމުގެ ކްރެޑިޓް ހޯދަން މާބޮޑަށް އުޅެނީކީ ނޫނެވެ. ނަމަވެސް އެމަނިކުފާނުގެ ވިޝަންގެ ތެރެއިން ޑިޖިޓަލް އިޤްތިޞާދު ފުޅާކުރުމަށް، އަދި ކުރީ ސަރުކާރަށް ނުކުރެވި އޮތް ބޮޑު މަސައްކަތެއް ފުރިހަމަވުމުން އެކަމުގެ ހައްގު ކްރެޑިޓް މި ސަރުކާރަށް ލިބޭނެއެވެ. ކުރީ ސަރުކާރަށް ނުވީ ކަމެއް މި ސަރުކާރުން ކޮށް ނިންމީމާ، އެކަން ހަޖަމުނުވެގެން "ކްރެޑިޓް ނަގަނީއޭ" ކިޔައި އަނގަ ތެޅިޔަސް، ޙަޤީޤަތެއް ބަދަލެއް ނުވާނެއެވެ.