ފީފާ ވޯލްޑް ކަޕްގެ ގްރޫޕް ސީގައި ރޭ ކުޅުނު ފޯރިގަދަ މެޗުން ސްކޮޓްލޭންޑް އަތުން 1-0 އިން މޮޅުވެ، މޮރޮކޯއިން މުބާރާތުގެ ދެވަނަ ބުރާ ގާތަށް ޖެހިލައިފިއެވެ.

ބޮސްޓަން ސްޓޭޑިއަމްގައި ކުޅުނު މި މެޗުގެ ހަމައެކަނި ލަނޑު، މެޗު ފެށިގެން ދެވަނަ މިނެޓުގައި ކާމިޔާބުކޮށްދިނީ އިސްމާއީލް ސައިބާރީއެވެ. މެޗުގެ އެންމެ 71 ވަނަ ސިކުންތުގައި ސައިބާރީ މި ގޯލު ޖެހީ ސްކޮޓްލޭންޑުގެ ޑިފެންސަށް ހެދުނު ގޯހެއްގެ ފައިދާ ނަގައިގެންނެވެ.

މި މޮޅާއެކު މޮރޮކޯއަށް ވަނީ ވަގުތީގޮތުން ގްރޫޕްގު އެއްވަނަ ލިބިފައެވެ. ފުރަތަމަ މެޗުގައި ބްރެޒިލްއާ ވާދަކޮށް އެއްވަރުވެގެން އެއް ޕޮއިންޓް ލިބިފައި އޮތް މޮރޮކޯއަށް މިހާރު ވަނީ ޖުމްލަ 4 ޕޮއިންޓް ލިބިފައެވެ. ގްރޫޕް ސްޓޭޖުގެ ފަހު މެޗުގައި ހައިޓީއާ ދެކޮޅަށް ކުޅޭއިރު، އެ މެޗުން މޮޅުވެއްޖެނަމަ މޮރޮކޯއަށް ދެވަނަ ބުރުގެ ޖާގައެއް ކަށަވަރުވާނެއެވެ.

މެޗުގެ ކުރީކޮޅު ލަނޑު ޖެހުމަށްފަހު، ވަލީދު ރެގްރާގީގެ އިރުޝާދުގެ ދަށުން ކުޅޭ މޮރޮކޯ ޓީމުން ފެނުނީ ވަރަށް ބަދަހި ޑިފެންސެކެވެ. އަޝްރަފް ހަކީމީ އިސްވެ ހުރެ މޮރޮކޯގެ ފަހަތް ބަލަހައްޓަމުން ދިޔައިރު، ސްކޮޓްލޭންޑުން ބޯޅަ ހިފަހައްޓައިގެން ކުޅުނު ނަމަވެސް، މޮރޮކޯގެ ގޯލަށް ނުރައްކާ ކުރެވޭގޮތެއް ނުވިއެވެ.

2022 ވަނަ އަހަރުގެ ވޯލްޑް ކަޕްގެ ސެމީ ފައިނަލަށް ދަތުރުކުރި މޮރޮކޯއިން މިފަހަރުވެސް ދަނީ ރަނގަޅު ކުޅުމެއް ދައްކަމުންނެވެ. އަނެއްކޮޅުން، ފުރަތަމަ މެޗުގައި ހައިޓީ އަތުން މޮޅުވި ސްކޮޓްލޭންޑަށް މި ބައްޔާއެކު ދެވަނަ ބުރަށް ދިއުމަށް މިހާރު ވަނީ ގޮންޖެހުންތަކަކާ ކުރިމަތިލާން ޖެހިފައެވެ.

މިރޭ ރާއްޖެ ގަޑިން 05:30 ގައި މި ގުރޫޕުގައި ދެން އޮތް ދެޓީމު ކަމަށްވާ ބްރެޒިލް އާއި ހައިޓީ ބައްދަލުކުރާނެއެވެ.