ލުބުނާނުގެ ވަރުގަދަ ޖަމާއަތެއް ކަމަށްވާ ހިޒްބުﷲ އިން، އިސްރާއީލުގެ އުދުވާނީ ހަމަލާތަކުން އެ ގައުމުގެ ބިމާއި ރައްޔިތުން ދިފާއުކުރާނެ ކަމުގެ ވަރުގަދަ އިންޒާރެއް ދީފިއެވެ.
ހިޒްބުﷲ އިން ނެރުނު ބަޔާނެއްގައި ބުނެފައިވަނީ، އެ ޖަމާއަތުގެ މުޖާހިދުން ތިބީ ކޮންމެ ފަދަ އުދުވާނަކާ ކުރިމަތިލާންވެސް ވަރަށް ފަރުވާތެރިކަމާއެކު ތައްޔާރަށް ކަމަށެވެ. އަދި އޭޕްރީލް 16 އިން ފެށިގެން ގާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުމާ ހިޒްބުﷲ އިން ޚިލާފުވެފައިވާ ކަމަށް ބުނެ އިސްރާއީލުން ކުރާ ތުހުމަތުތައް އެ ޖަމާއަތުން ވަނީ ދޮގުކޮށްފައެވެ.
ހިޒްބުﷲ އިން ބުނި ގޮތުގައި، ހަނގުރާމަ ހުއްޓާލުމުގެ އެއްވެސް އެއްބަސްވުމަކަށް އިސްރާއީލުން ދުވަހަކުވެސް އިހުތިރާމެއް ނުކުރެއެވެ. އަދި އެއްބަސްވުމާ ޚިލާފުވަނީ އިސްރާއީލުން ކަމަށްވެސް އެ ޖަމާއަތުން ބުނެފައިވެއެވެ.
Advertisement
މި މައްސަލައިގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނެފައިވަނީ، "ބޭނުންވާ މިންވަރަކަށް" އިސްރާއީލުގެ ސިފައިން ލުބުނާނުގައި މަޑުކުރާނެ ކަމަށެވެ. އަދި ހިޒްބުﷲ އިން ދެމުންދާ ހަމަލާތަކުގެ ބަދަލުގައި އެ ޖަމާއަތުން "ބޮޑު އަގެއް" ދައްކަން ޖެހޭނެ ކަމަށްވެސް އޭނާ ވަނީ ވިދާޅުވެފައެވެ.
އެމެރިކާއާއި އީރާނާ ދެމެދު ވެފައިވާ އެއްބަސްވުމެއްގެ ދަށުން ލުބުނާނަށް ދޭ ހަމަލާތައް ހުއްޓާލުމަށް ގޮވާލާފައިވީ ނަމަވެސް، އިސްރާއީލުގެ އަސްކަރިއްޔާއިން ބުނަމުންދަނީ ލުބުނާނުގެ ދެކުނުގައިވާ ހިޒްބުﷲގެ މަރުކަޒުތަކަށާއި ހަނގުރާމަވެރިންނަށް އަމާޒުކޮށް ދޭ ހަމަލާތައް ކުރިއަށް ގެންދާނެ ކަމަށެވެ.
މި ހަމަނުޖެހުންތަކުގެ ސަބަބުން މުޅި ސަރަހައްދުގެ މަސްލަހަތު އިތުރަށް ގޯސްވެ، ބޮޑު ހަނގުރާމައަކަށް ބަދަލުވެދާނެ ކަމުގެ ބިރު ވަނީ ހީވެފައެވެ.
