ސަރުކާރުގެ މަސްކުންފުނި މިފްކޯއަށް މަސްގަންނަ ރޭޓު، ކިލޯއަކަށް 20 ރުފިޔާއަށް ވުރެ ދަށްނުކޮށް ހިފެހެއްޓޭނެ ގޮތްތަކެއް ރޭވުމަކީ ސަރުކާރުގެ އަމާޒެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުން ކޮންމެ ހަފުތާއަކު ކުރިއަށްގެންދާ "ދަ ޕަލްސް" ޕްރޮގްރާމްގައި ވާހަކަފުޅު ދައްކަވަމުން ރައީސް ވިދާޅުވީ، މަސްވެރިން ބާނާ މަހަށް ހަމައަގު ހޯދައިދިނުމަށް ސަރުކާރުން އެޅި އެންމެ މުހިންމު ފިޔަވަޅަކީ ދުނިޔޭގެ ބާޒާރުގެ ރޭޓާ އެއްވަރަށް މަހުގެ އަގު ފްލޯޓްކޮށްލުން ކަމަށެވެ. އަދި އޭގެ ނަތީޖާ ރަނގަޅުވަމުން އަންނަކަން އެމަނިކުފާނު ފާހަގަކުރެއްވިއެވެ.

"އިރާދަކުރެއްވިއްޔާ ކުރިއަށް އޮތް ތާނގައި ވެސް އަޅުގަނޑުމެން އުއްމީދުކުރަނީ، އަޅުގަނޑުމެން އެންމެ ބޭނުންވާ ރޭޓްގައި، 20 ރުފިޔާ އެންމެ ކުޑަމިނުން ލިބޭ ވަރުގައި ހިފެހެއްޓޭނެ ގޮތްތައް ރޭވޭނެ ކަމަށްް،"

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

މަހުގެ އަގު ފްލޯޓްކޮށްލި އިރު މަސް ކިލޯއެއްގެ އަގު ހުރީ 16 ރުފިޔާގައެވެ. ނަމަވެސް މިހާރު އެ އަގު 20 ރުފިޔާއަށް އުފުލިފައިވާއިރު، އެ ރޭޓުގައި އަގު ހިފެހެއްޓުމަށްޓަކައި ކުރަންޖެހޭ މުހިންމު ކަންތައްތަކެއް އެބަހުރި ކަމަށް ރައީސް ވިދާޅުވިއެވެ. އެގޮތުން މަސް ރައްކާކުރުމުގެ ގާބިލުކަން އިތުރުކުރުމާއި، މަހަށް ވެލިއު އެޑްކޮށްގެން ނުވަތަ ދަޅުގައި ބަންދުކޮށްގެން އެކްސްޕޯޓް ކުރުމުގެ ގާބިލުކަން އިތުރުކުރުމަކީ ސަރުކާރުގެ މުހިންމު ސިޔާސަތެއް ކަމަށް އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވި ގޮތުގައި، ފެލިވަރު ކޭނިން ފެކްޓްރީގެ ގާބިލުކަން އިތުރުކުރުމަށް ބޭރުގެ އެހީގައި ހިންގާ މަޝްރޫއުތައް ކުޑަކޮށް ލަސްވި ނަމަވެސް، މިހާރު އެކަންކަން ވަނީ ހަމަޖެހިފައެވެ. ސަރުކާރުގެ އަމާޒަކީ މި ދައުރުގެ ތެރޭގައި މަސް ޕްރޮސެސްކުރުމުގެ ގާބިލުކަން ދެގުނަ ނުވަތަ ތިންގުނައަށް އިތުރުކުރުމެވެ.

މިފްކޯއިން މަސްގަންނަ އަގު 20 ރުފިޔާއަށް ބަދަލުކޮށްފައިވަނީ މި މަހުގެ 9 ވަނަ ދުވަހުން ފެށިގެންނެވެ. އެ ކުންފުނީގެ މެނޭޖިން ޑިރެކްޓަރު މުހައްމަދު އަނަސް ވިދާޅުވި ގޮތުގައި، އަގަށް ބަދަލު ގެނައީ މަސްވެރިންނަށް ހިތްވަރު ދިނުމަށާއި ސަޕްލައިއަށް ބަލައިގެންނެވެ. އަދި ކުންފުނީގެ ހިންގުން ހަރުދަނާކޮށް، އިސްރާފު ކުޑަކޮށްގެން މަސް ކިލޯއެއްގެ އަގު 18 ރުފިޔާއަށް ވުރެ ދަށްނުވެ ހިފެހެއްޓޭތޯ މަސައްކަތް ކުރަމުންދާ ކަމަށްވެސް އޭނާ ވިދާޅުވިއެވެ.

މިހާރު އަމަލުކުރަމުންދާ އަގު ލިސްޓަށް ބަލާއިރު، ފެލިވަރު، ކޫއްޑޫ، އަދި އައްޑޫ ފިޝަރީޒް ކޮމްޕްލެކްސްތަކުގެ އިތުރުން ބައެއް ރަށްރަށުގެ ބަނދަރުތަކުން ކަޅުބިލަމަހާއި ވަކި ސައިޒެއްގެ ކަންނެލި ކިލޯއެއް ގަންނަނީ 20 ރުފިޔާއަށެވެ. އަދި 15 ކިލޯއަށް ވުރެ ބަރު ކަންނެލި ކިލޯއެއްގެ އަގަކީ 25 ރުފިޔާއެވެ.