ވޯލްޑް ކަޕްގައި ފްރާންސް ކުޅުނު ފުރަތަމަ މެޗުގައި، އާޖެންޓީނާ އާއި ބްރެޒިލްގެ ސަޕޯޓަރުން ފްރާންސް ބަލިވާނެ ކަމަށް އުންމީދުކޮށްގެން ތިއްބާ، ކީލިއަން އެމްބާޕޭ ޖެހި ދެ ގޯލާއެކު ސެނެގާލް ބަލިކޮށް ފްރާންސްއިން ފެށުން ރަނގަޅުކޮށްފިއެވެ.
ނިއު ޖާޒީގެ މެޓްލައިފް ސްޓޭޑިއަމްގައި މިރޭ ކުޅުނު ގްރޫޕް 'އައި' ގެ މި މެޗުން ފްރާންސް މޮޅުވީ 3-1 ގެ ނަތީޖާއަކުންނެވެ. މި މެޗުގައި އެމްބާޕޭ ދެއްކި މޮޅު ކުޅުމާއެކު އޭނާ ވަނީ ފްރާންސްގެ ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ރެކޯޑު މުގުރާލާފައެވެ.
މެޗުގެ ފުރަތަމަ ހާފުގައި ސެނެގާލްއިން ވަނީ ފްރާންސްގެ މައްޗަށް ބޮޑު ނުފޫޒެއް ފޯރުވާފައެވެ. ސެނެގާލްގެ ނިކޮލަސް ޖެކްސަން ފޮނުވާލި ހަމަލާއެއް ގޯލުގެ ދަނޑިއަށް އަމާޒުވިއިރު، އިސްމާއީލާ ސާރަށް ލިބުނު ރަނގަޅު ފުރުސަތެއް ވަނީ ބޭކާރުވެފައެވެ. މި ވަގުތުތަކުގައި ފްރާންސްގެ ވާދަވެރި އާޖެންޓީނާ އާއި ބްރެޒިލްގެ ސަޕޯޓަރުން ތިބީ ފްރާންސް ބަލިވެދާނެ ކަމުގެ އުންމީދުގައެވެ.
Advertisement
ނަމަވެސް، ދެވަނަ ހާފުގައި ކޯޗު ދިދިއޭ ޑެޝޯމްޕް ޓީމަށް ގެނައި ބަދަލުތަކާއެކު ފްރާންސްގެ ކުޅުން ރަނގަޅުވިއެވެ. މެޗުގެ 66 ވަނަ މިނެޓުގައި މައިކަލް އޮލީސޭ ތަނަވަސްކޮށްދިން ފުރުސަތަކުން އެމްބާޕޭ ވަނީ ފްރާންސަށް ފުރަތަމަ ލަނޑު ޖަހައިދީފައެވެ. އޭގެ ފަހުން ބަދަލު ކުޅުންތެރިއެއްގެ ގޮތުގައި ކުޅެން އެރި ބްރެޑްލީ ބާކޯލާ ވަނީ ދެވަނަ ލަނޑެއް ޖަހައި ލީޑު ފުޅާކޮށްފައެވެ.
މެޗުގެ އިތުރު ވަގުތުގެ ތެރޭގައި ސެނެގާލްގެ އިބްރާހިމް އެމްބާޔޭ ލަނޑެއް ޖަހައި އުންމީދެއް ހޯދައިދިން ނަމަވެސް، މެޗުގެ 96 ވަނަ މިނެޓުގައި އެމްބާޕޭ ވަނީ ދުރުން ފޮނުވާލި ބާރު ހަމަލާއަކުން ފްރާންސްގެ ތިންވަނަ ލަނޑު ކާމިޔާބުކޮށްދީ، ސަޕޯޓަރުން އުންމީދުކޮށްގެން ތިބި ނަތީޖާ ބަދަލުކޮށްލާފައެވެ.
މި ދެ ލަނޑާއެކު އެމްބާޕޭ ވަނީ ފްރާންސްގެ ގައުމީ ޓީމަށް 58 ލަނޑު ހަމަކޮށްފައެވެ. މީގެ އިތުރުން ވޯލްޑް ކަޕް ތާރީހުގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑާ ހަމަކުރުމަށް އޭނާއަށް މިހާރު ބޭނުންވަނީ އެންމެ ދެ ލަނޑެވެ. މި މެޗަކީ ފްރާންސްގެ ކޯޗު ޑެޝޯމްޕްގެ އިރުޝާދުގެ ދަށުން އެ ޓީމު ކުޅޭނެ ފަހު މުބާރާތެވެ.
