ފީފާ ވޯލްޑް ކަޕްގައި ރޭ ކުޅުނު ހަތަރު މެޗުވެސް އެއްވަރުވެ، ގްރޫޕް 'ޖީ' އަދި 'އެޗް' ގެ ޓީމުތަކުން ޕޮއިންޓަކުން ފުއްދާލަން ޖެހިއްޖެއެވެ. މިއީ މި މުބާރާތުގެ ފޯރި ގަދަވެ، ގިނަ ޓީމުތަކަކަށް މޮޅެއް ނުލިބި ޕޮއިންޓް ބަހާލަން ޖެހުނު ހާއްސަ ރެއެކެވެ.
ސްޕެއިން އަދި ކޭޕް ވާޑް: (ގްރޫޕް އެޗް):
ގްރޭޕް އެޗްގައި ރޭ 21:00 ގައި އެންމެ ފުރަތަމަ ކުޅުނީ މި މެޗެވެ. ވަރުގަދަ ސްޕެއިން ވަނީ ކޭޕް ވާޑްއާ ބައްދަލުކޮށް ލަނޑެއް ނުޖެހި އެއްވަރުވެފައެވެ. ސްޕެއިނުން މެޗުގެ ބޮޑު ބައެއްގައި ބޯޅަ ހިފަހައްޓައިގެން ކުޅުނު ނަމަވެސް، ކޭޕް ވާޑްގެ ވަރުގަދަ ޑިފެންސް ފޫއަޅުވާލެވޭ ގޮތެއް ނުވިއެވެ. މިއީ ކޭޕް ވާޑް ފަދަ ކުޑަ ގައުމަކުން ދުނިޔޭގެ އެންމެ ވަރުގަދަ އެއް ޓީމު އަތުން ހޯދި ތާރީހީ ޕޮއިންޓެކެވެ.
Advertisement
ބެލްޖިއަމް އަދި އީޖިޕްޓް (ގްރޫޕް ޖީ):
ރޭ ރާއްޖެ ގަޑިން 00:00 ގައި ކުޅުނު ގްރޫޕް 'ޖީ' ގެ ފުރަތަމަ މެޗުގައި ބެލްޖިއަމާއި އީޖިޕްޓް ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ. މެޗުގެ 19 ވަނަ މިނެޓުގައި މުހައްމަދު ސަލާހް ތަނަވަސްކޮށްދިން ފުރުސަތަކުން އީޖިޕްޓަށް ލީޑު ނަގައިދިނީ އީ. އަޝޫރެވެ. ނަމަވެސް މެޗުގެ 66 ވަނަ މިނެޓުގައި މުހައްމަދު ހާނީ އަތުން ބައިކޮޅަށް ވަން ލަނޑަކުން ބެލްޖިއަމް ވަނީ ނަތީޖާ ހަމަހަމަކޮށްފައެވެ.
ސައުދީ އަރަބިއްޔާ އަދި އުރުގުއޭ (ގްރޫޕް އެޗް):
ގްރޫޕް 'އެޗް' ގައި ސައުދީ އަރަބިއްޔާ އިން ވަނީ ވަރުގަދަ އުރުގުއޭ ހައިރާންކޮށްލާފައެވެ. މެޗުގެ 41 ވަނަ މިނެޓުގައި އޭ. އަލް-އަމްރީ ޖަހައިދިން ލަނޑާއެކު ސައުދީން ފުރަތަމަ ހާފު ނިންމާލީ ކުރީގައި އޮވެގެންނެވެ. އެހެންނަމަވެސް، މެޗު ނިމެން 10 މިނެޓަށް ވެފައި ވަނިކޮށް އެމް. އަރައުޖޯ ވަނީ އުރުގުއޭއަށް ނަތީޖާ ހަމަހަމަކޮށްދީފައެވެ. މި މެޗު ކުޅުނީ ދަންވަރު 03:00 ގައެވެ.
އީރާން އަދި ނިއުޒީލަންޑް (ގްރޫޕް ޖީ):
މިއަދު އެންމެ ހެނދުނު 06:00 ޖެހި އިރު ފެށި ދިވެހި ސަޕޯޓަރުންގެ މެދުގައި ދެވަނަ ޓީމެއްގެ ގޮތުގައި ބޮޑު މަގްބޫލުކަމެއް އޮންނަ އީރާނާއި ނިއުޒީލަންޑް ބައްދަލުކުރި މެޗު ނިމުނީ 2-2 އިން އެއްވަރުވެގެންނެވެ. ނިއުޒީލަންޑުން ދެ ފަހަރަށް ލީޑު ނެގި ނަމަވެސް، އީރާނުން ވަނީ ހިތްވަރާއެކު ކުޅެ މެޗުގެ ނަތީޖާ ހަމަހަމަކޮށްފައެވެ. އީރާނުގެ ލަނޑުތައް ކާމިޔާބުކޮށްދިނީ އާރް. ރެޒާ އިއާން އަދި އެމް. މުހައްބީއެވެ.
ރޭގެ ނަތީޖާތަކާއެކު ގޯލް ތަފާތާއެކު ގްރޫޕް ޖީގެ އެއްވަނައިގައި އޮތީ އީރާނާއި ނިއުޒީލަންޑެވެ.
