މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މަސްވެރިންގެ އަތުން މަސް ގަންނަ އަގުތަކަށް ބަލާއިރު، މިއަދުވެސް އެ ކުންފުނީގެ ހުރިހާ ސެންޓަރަކުން ކަޅުބިލަމަސް ގަންނަމުންދަނީ ކިލޯއެއް 20 ރުފިޔާގެ މަގުންނެވެ.

މިފްކޯއިން ކޮންމެ ދުވަހަކު އާންމުކުރާ އަގުތަކުގެ ލިސްޓުން އެނގޭ ގޮތުގައި، މިދިޔަ ޖޫން މަހުގެ 9 ވަނަ ދުވަހުން ފެށިގެން ކަޅުބިލަމަސް ކިލޯއެއްގެ އަގު ވަނީ 20 ރުފިޔާގައި ހިފެހެއްޓިފައެވެ.. ރާއްޖޭގެ އެކި ސަރަހައްދުތަކުގައި ގާއިމުކޮށްފައިވާ ފެލިވަރު، ކޫއްޑޫ، އައްޑޫ، ތިނަދޫ، ފަރެސްމާތޮޑާ، ދާންދޫ، އަދި ފުވައްމުލަކުގެ ފެކްޓްރީތަކާއި ސެންޓަރުތަކުން ވެސް މިހާރު މަސްވެރިންގެ އަތުން މަސް ގަންނަމުން އަންނަނީ މި އަގުގައެވެ.

ބޮޑު ކަންނެލީގެ އަގުތަކަށް ބަލާއިރު، އާންމުކޮށް ކިލޯއެއް 20 ރުފިޔާއަށް ގަންނަމުންދާއިރު، 15 ކިލޯއިން މަތީގެ ބޮޑު ކަންނެލި ކިލޯއެއް ގަންނަނީ 25 ރުފިޔާގެ މަގުންނެވެ.

މިކަމާ ގުޅޭގޮތުން މިފްކޯގެ ސީއީއޯ މުހައްމަދު އަނަސް ވިދާޅުވެފައިވަނީ، ރައީސްގެ ވައުދުފުޅާ އެއްގޮތަށް މަސް ކިލޯއެއްގެ އަގު 20 ރުފިޔާއަށްވުރެ ދަށްނުވާނެހެން ހިފެހެއްޓުމުގެ މަސައްކަތް ކުރަމުންދާ ކަމަށެވެ.

މިފްކޯއިން މިގޮތަށް އަގުތައް ކަނޑައަޅާފައިވަނީ ދުނިޔޭގެ ބާޒާރުގައި މަހުގެ އަގަށް އަންނަ ބަދަލުތަކާ ގުޅިގެންނާއި، މަސްވެރިންނަށް އެކަށީގެންވާ އާމްދަނީއެއް ހޯދައިދިނުމުގެ މަގްސަދުގައެވެ. ސަރުކާރުގެ މަސް ކުންފުނީގެ އަމާޒަކީ މަސްވެރިން ބާނާ މަހަށް ހަމަ އަގު ހޯދައިދީ، ރާއްޖޭގެ މަސްވެރިކަމުގެ ސިނާއަތް އިތުރަށް ކުރިއެރުވުމެވެ.