އީރާނުގެ ނިއުކްލިއާ މައްސަލައިގައި މީގެ ކުރިން ވެފައިވާ ވަގުތީ އެއްބަސްވުންތަކަށް ފުރިހަމައަށް އަމަލުނުކުރަނީސް، އިތުރު އެއްވެސް މަޝްވަރާއެއް ކުރިއަށް ނުގެންދެވޭނެ ކަމަށް އީރާނުމް ބުނެފިއެވެ.

އީރާނުން މިހެން ބުނީ ދުނިޔޭގެ ބޮޑެތި ބާރުތަކާއެކު އަލުން މަޝްވަރާތައް ފެށުމާ ގުޅޭގޮތުން ވާހަކަދައްކަވަމުންނެވެ.

އީރާނުގެ ޚާރިޖީ ވަޒީރު ޢައްބާސް ޢަރާޤްޗީ، މި މައްސަލައިގައި އީރާނުން ގެންގުޅޭ ހަރުކަށި ސިޔާސަތު ހާމަކުރައްވަމުން ވިދާޅުވީ، މަޝްވަރާގެ މޭޒަށް ދިއުމުގެ ކުރިން އީރާނުގެ މައްޗަށް އަޅާފައިވާ ދަތިކުރުމުގެ ފިޔަވަޅުތަކަށް ލުޔެއް ލިބެންޖެހޭނެ ކަމަށެވެ.

އީރާނުގެ ނިއުކްލިއާ ޕްރޮގްރާމަކީ ސުލްހަވެރި ބޭނުންތަކަށް ކުރިއަށްގެންދާ ޕްރޮގްރާމެއްކަން ސާބިތުކޮށްދިނުމަށް އެގައުމުން ތައްޔާރަށް އޮތް ނަމަވެސް، އެމެރިކާ އާއި ވިލާތުގެ ގައުމުތަކުން ކުރިން ވެފައިވާ އިގުރާރުތަކާ އެއްގޮތަށް އަމަލު ނުކޮށް، އެ ފަރާތްތަކުގެ ޒިންމާ އަދާ ނުކުރާ ނަމަ އީރާނުން މަޝްވަރާ ނުކުރާނެ ކަމަށް އޭނާ ވިދާޅުވިއެވެ.