ކުރީގެ އިމިގްރޭޝަން ކޮންޓްރޯލަރ މުހައްމަދު ޝަމްއާން ވަހީދު، ހޯމް މިނިސްޓަރު އަލީ އިހުސާންގެ މައްޗަށް ކުރައްވަމުން ގެންދަވާ ތުހުމަތުތަކަކީ އެއްވެސް އަސާސެއް ނެތް، ސާބިތު ނުހިފޭ ދޮގުތަކެއް ކަމަށް އެމަނިކުފާނު ވިދާޅުވެއްޖެއެވެ.

ޝަމްއާން ތަކުރާރުކޮށް ކުރަމުންދާ ތުހުމަތުތަކާ ގުޅޭގޮތުން ވާހަކަ ދައްކަވަމުން މިނިސްޓަރު ވިދާޅުވީ، އެ ތުހުމަތުތަކާ ގުޅޭ އެއްވެސް ހެއްކެއް ނުވަތަ ގަރީނާއެއް ނެތް ކަމަށާއި، ޝަމްއާން އެ ހައްދަވަނީ ދޮގުކަން މީގެ ކުރިންވެސް މީޑިއާގައި ހާމަކުރައްވާފައިވާނެ ކަމަށެވެ. އަދި އޭނާ ފްރޭމްކޮށްފައިވާ ކަމަށް ބުނާ ވާހަކައަކީވެސް އެއްވެސް ހަގީގަތެއް އޮތް ވާހަކައެއް ނޫންކަން ފުލުހުން ހޯދާފައިވާ ހެކިތަކުން ސާފުވާ ކަމަށް މިނިސްޓަރު ވިދާޅުވިއެވެ. މި މައްސަލާގައި ކަން ހިނގާފައިވާ ގޮތް ރައްޔިތުންނަށް ތަފްސީލުކޮށް ސާފުކޮށްދިނުމަށް ފުލުހުންގެ މުއައްސަސާގައި އެދިވަޑައިގެންފައިވާނެ ކަމަށްވެސް އިހުސާން ވިދާޅުވިއެވެ.

އިއްޔެ ކޯޓަށް ހާޒިރުވުމުގެ ކުރިން ޝަމްއާން ވަނީ އިހުސާންގެ އިތުރުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްތަށިފުޅުގައިވެސް ކޮރަޕްޝަނުގެ ބޮޑެތި އިލްޒާމްތަކެއް އަޅުވާފައެވެ. ނަމަވެސް، ސަރުކާރުގެ އިސް ތަރުޖަމާނު މުހައްމަދު ޝަރީފް (މުންދު) ވަނީ އެ ހުރިހާ އިލްޒާމްތަކެއް ދޮގުކުރައްވާފައެވެ.

ކްރިމިނަލް ކޯޓުގައި އިއްޔެ ކުރިއަށްދިޔަ ޝަރީއަތުގައި، ގާޒީ އިބްރާހިމް އިހުސާން ވަނީ ޝަމްއާންގެ މައްޗަށް ދައުލަތުން އުފުލި ތިން ދައުވާއެއް ސާބިތުވާ ކަމަށް ނިންމަވައި، 25 އަހަރުގެ ޖަލު ހުކުމެއް އޭނާގެ މައްޗަށް އިއްވަވާފައެވެ. ޝަމްއާންގެ މައްޗަށް ސާބިތުވެފައިވަނީ ފޭރުމުގައި ބައިވެރިވުމުގެ ދައުވާއާއި، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާގެ އިތުރުން މަނީ ލޯންޑްރިންގެ ދައުވާއެވެ.

އަދަބުތަކުގެ ތަފްސީލު:

1. މަނީ ލޯންޑްރިންގެ ދައުވާއަށް: 15 އަހަރުގެ ޖަލު ހުކުމެއް.
2. ފޭރުމުގައި ބައިވެރިވުމުގެ ދައުވާއަށް: 8 އަހަރުގެ ޖަލު ހުކުމެއް.
3. ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާއަށް: 2 އަހަރުގެ ޖަލު ހުކުމެއް.

މީގެ އިތުރުން، ޝަމްއާން 500,000 ރުފިޔާއިން ޖޫރިމަނާކުރުމަށާއި، ބިދޭސީ މީހާގެ އަތުން ފޭރިގަތް 500,000 ރުފިޔާ ތިން މަސް ދުވަހުގެ ތެރޭގައި އެމީހާއަށް ރައްދުކޮށްދިނުމަށް ކޯޓުން ވަނީ އަމުރުކޮށްފައެވެ. އަދި އޭނާގެ ގެއިން ފެނުނު ފައިސާގެ ތެރެއިން 125,000 ރުފިޔާ ދައުލަތަށް ނެގުމަށްވެސް ވަނީ ހުކުމްކޮށްފައެވެ.

ޝަރީއަތަށް ސާބިތުވި ގޮތުގައި، އިމިގްރޭޝަނުން ހިފެހެއްޓި ބިދޭސީއަކު ޝަމްއާންގެ އަމުރަށް ދަންވަރު ދޫކޮށްލާފައިވަނީ އޭނާގެ އަތުން 530,000 ރުފިޔާ އަތުލުމަށްފަހުއެވެ. އޭގެ ތެރެއިން 400,000 ރުފިޔާ ޝަމްއާން ބަހައްޓާފައިވާއިރު، ބައެއް ފައިސާ ބޭނުންކޮށްގެން އޭނާގެ ދެ ސްޓޫޑަންޓް ލޯނަކަށް ފައިސާ ދައްކާފައިވާކަން ވަނީ ކަށަވަރުވެފައެވެ.

ގާޒީ އިހުސާން ވިދާޅުވީ، ޝަމްއާނަށް އެންމެ ބޮޑު އަދަބު ދޭން ނިންމީ އިމިގްރޭޝަންގެ އެންމެ މަތީ ވެރިޔާގެ ގޮތުގައި ހުރެ، ބިދޭސީންނަށް ރައްކާތެރިކަން ދިނުމުގެ ބަދަލުގައި އަމިއްލަ ފައިދާއަށް މަސައްކަތްކޮށް، މުއައްސަސާގެ އަގު ވައްޓާލާފައިވާތީ ކަމަށެވެ. ޝަމްއާން ބަންދުގައި ހޭދަކުރި 9 މަހާއި 10 ދުވަސް ހުކުމުގެ މުއްދަތުން އުނިކުރެވޭނެއެވެ.