އީރާނުގެ ގައުމީ ފުޓްބޯޅަ ޓީމަށް އެމެރިކާގައި ތިބެވޭނީ ހަމައެކަނި މެޗު ކުޅޭ ދުވަސްތަކުގައި އެކަނި ކަމަށް އީރާނުގެ އޮފިޝަލުންނާއި ބައިނަލްއަގްވާމީ މީޑިއާ ރިޕޯޓްތަކެއް ބުނެފިއެވެ. މުބާރާތުގައި ކުޅޭ ޓީމުތަކުގެ ތެރެއިިން އެމެރިކާގައި ހުރުމުގެ ހުއްދަ ނުދޭ ހަމައެކަނި ޓީމަކީ އީރާނެވެ.

އީރާނުން ފުރަތަމަ ރާވާފައި އޮތީ އެމެރިކާގެ އެރިޒޯނާގައި ވޯލްޑް ކަޕްގައި ކުޅޭ ޓީމު ބޭސްވެ ތިބުމަށެވެ. ނަމަވެސް އެމެރިކާގެ ކަމާބެހޭ ފަރާތްތަކުން ވަނީ އެކަމަށް ދެކޮޅު ހަދާފަ އެވެ. އެހެންކަމުން އީރާނަށް ޖެހުނީ އެ ޓީމުގެ ޓްރެއިނިން ބޭސް މެކްސިކޯގެ ބޯޑަރު ސިޓީ ޓިޖުއާނާއަށް ބަދަލުކުރާށެވެ.

މެކްސިކޯގެ ރައީސް ކްލޯޑިއާ ޝެއިންބަމް ކަށަވަރުކޮށްދެއްވި ގޮތުގައި އީރާނުގެ ޓީމަށް އެކޮމޮޑޭޝަން ދިނުމާ ގުޅޭ ގޮތުން ފީފާއިން މެކްސިކޯއާ ގުޅިއެވެ. މެކްސިކޯއިން ވަނީ އެކަމަށް އެއްބަސްވެފަ އެވެ.

މެކްސިކޯގައި ހުންނަވާ އީރާނުގެ ސަފީރު ވިދާޅުވީ ސްކޮޑް ގޮވައިގެން މެޗުތަކަށް އެމެރިކާއަށް ފުރާނެ ކަމަށާއި އޭގެ ފަހުން އެނބުރި މެކްސިކޯއަށް ދާނެ ކަމަށެވެ. އަދި ކުޅުންތެރިންނާއި ޓީމުގެ މުހިންމު އޮފިޝަލުންނަށް ވިސާ ލިބި، ވާދަކުރުމުގެ ޝަރުތު ހަމަވި ނަމަވެސް، އީރާނުގެ ފުޓްބޯޅަ ފެޑެރޭޝަންގެ ބައެއް އޮފިޝަލުންނާއި ސަޕޯޓް ސްޓާފުންނަށް އެމެރިކާ އާއި ދިޔުމަށް ވިސާ ނުލިބުނު ކަމަށް ރިޕޯޓްތައް ބުނެ އެވެ.

ގްރޫޕް ޖީގެ ތިން މެޗު ވެސް އީރާނަށް ކުޅުމަށް ހަމަޖެހިފައިވަނީ އެމެރިކާގައެވެ. އެއީ ޖޫން 15 ވަނަ ދުވަހު ލޮސް އެންޖެލިސްގައި ނިއުޒީލެންޑާއި، ޖޫން 21 ގައި ލޮސް އެންޖެލިސްގައި ބެލްޖިއަމް އާއި، އަދި އެއަށްފަހު މިސްރާއި ދެކޮޅަށް ނުކުންނަ މެޗެވެ.