ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމަށްވާ ފީފާ ވޯލްޑް ކަޕް 2026 ވަނަ އަހަރު ބޭއްވުމަށް ހަމަޖެހިފައިވަނީ އެމެރިކާ، މެކްސިކޯ އަދި ކެނެޑާ ގުޅިގެންނެވެ. ޖޫން 11 އިން ޖުލައި 19 އަށް ކުރިއަށްދާ މި މުބާރާތަކީ 48 ޓީމު ވާދަކުރާ ފުރަތަމަ ވޯލްޑް ކަޕެވެ.

މި މުބާރާތުގެ މެޗުތައް ތިން ގައުމުގެ 16 ސިޓީއެއްގެ 16 ސްޓޭޑިއަމްގައި ކުޅުމަށް ވަނީ ހަމަޖެހިފައެވެ. ތިރީގައި މިވަނީ އެ ސްޓޭޑިއަމްތަކުގެ ތަފްސީލެވެ:

އެމެރިކާގެ ސްޓޭޑިއަމްތައް:

1. އެޓްލާންޓާ ސްޓޭޑިއަމް (ޖޯޖިއާ): 75،000 މީހުންގެ ޖާގައިގެ މި ސްޓޭޑިއަމްގައި ސެމީ ފައިނަލް މެޗަކާއެކު ޖުމްލަ 8 މެޗު ކުޅޭނެއެވެ.
2. ބޮސްޓަން ސްޓޭޑިއަމް (މެސެޗުސެޓްސް): 65،000 މީހުންގެ ޖާގައިގެ މި ދަނޑުގައި 7 މެޗު ކުޅޭނެއެވެ.
3. ޑަލަސް ސްޓޭޑިއަމް (ޓެކްސަސް): މިއީ މުބާރާތުގެ އެންމެ ބޮޑު ދަނޑެވެ. 94،000 މީހުންގެ ޖާގައިގެ މި ދަނޑުގައި އެންމެ ގިނަ މެޗު (9 މެޗު) ކުޅޭނެއެވެ.
4. ހިއުސްޓަން ސްޓޭޑިއަމް (ޓެކްސަސް): 72،000 މީހުންގެ ޖާގައިގެ މި ދަނޑުގައި 7 މެޗު ކުޅޭނެއެވެ.
5. ކެންސަސް ސިޓީ ސްޓޭޑިއަމް (މިސޫރީ): 73،000 މީހުންގެ ޖާގައިގެ މި ދަނޑުގައި ސެމީ ފައިނަލް މެޗަކާއެކު 6 މެޗު ކުޅޭނެއެވެ.
6. ލޮސް އެންޖެލިސް ސްޓޭޑިއަމް (ކެލިފޯނިއާ): 70،000 މީހުންގެ ޖާގައިގެ މި ދަނޑުގައި އެމެރިކާގެ ދެ މެޗު ހިމެނޭހެން 8 މެޗު ކުޅޭނެއެވެ.
7. މިއާމީ ސްޓޭޑިއަމް (ފްލޮރިޑާ): 65،000 މީހުންގެ ޖާގައިގެ މި ދަނޑުގައި ތިންވަނަ ހޮވާ މެޗާއެކު 7 މެޗު ކުޅޭނެއެވެ.
8. ނިއު ޔޯކް/ނިއު ޖާޒީ ސްޓޭޑިއަމް: 82،500 މީހުންގެ ޖާގައިގެ މި ދަނޑަކީ ފައިނަލް މެޗު ކުޅުމަށް ހަމަޖެހިފައިވާ ދަނޑެވެ.
9. ފިލަޑެލްފިއާ ސްޓޭޑިއަމް (ޕެންސިލްވޭނިއާ): 69،000 މީހުންގެ ޖާގައިގެ މި ދަނޑުގައި 6 މެޗު ކުޅޭނެއެވެ.
10. ސެން ފްރެންސިސްކޯ ބޭ އޭރިއާ ސްޓޭޑިއަމް (ކެލިފޯނިއާ): 71،000 މީހުންގެ ޖާގައިގެ މި ދަނޑުގައި 6 މެޗު ކުޅޭނެއެވެ.
11. ސިއެޓްލް ސްޓޭޑިއަމް (ވޮޝިންގްޓަން): 69،000 މީހުންގެ ޖާގައިގެ މި ދަނޑުގައި 6 މެޗު ކުޅޭނެއެވެ.

ކެނެޑާގެ ސްޓޭޑިއަމްތައް:

1. ޓޮރޮންޓޯ ސްޓޭޑިއަމް (އޮންޓޭރިއޯ): 45،000 މީހުންގެ ޖާގައިގެ މި ދަނޑުގައި 6 މެޗު ކުޅޭނެއެވެ. މިއީ ކެނެޑާގައި މެޗެއް ކުޅޭނެ ފުރަތަމަ ދަނޑެވެ.
2. ބީސީ ޕްލޭސް ވެންކޫވަރ: 54،000 މީހުންގެ ޖާގައިގެ މި ދަނޑުގައި ކެނެޑާގެ ދެ މެޗު ހިމެނޭހެން 7 މެޗު ކުޅޭނެއެވެ.

މެކްސިކޯގެ ސްޓޭޑިއަމްތައް:

1. މެކްސިކޯ ސިޓީ ސްޓޭޑިއަމް: 83،000 މީހުންގެ ޖާގައިގެ މި ދަނޑުގައި މުބާރާތް ހުޅުވާ މެޗާއެކު 5 މެޗު ކުޅޭނެއެވެ. މިއީ ތިން ވޯލްޑް ކަޕެއް ބާއްވާ ފުރަތަމަ ދަނޑެވެ.
2. އެސްޓާޑިއޯ ގުއަޑަލަހާރާ: 48،000 މީހުންގެ ޖާގައިގެ މި ދަނޑުގައި 4 މެޗު ކުޅޭނެއެވެ.
3. އެސްޓާޑިއޯ މޮންޓެރޭ: 53،500 މީހުންގެ ޖާގައިގެ މި ދަނޑުގައި 4 މެޗު ކުޅުމަށް ވަނީ ހަމަޖެހިފައެވެ.

މި މުބާރާތަކީ ފުޓްބޯޅައިގެ ތާރީޚުގައިވެސް ބޭއްވޭ އެންމެ ބޮޑު އަދި އެންމެ ފޯރިގަދަ މުބާރާތަށް ވެގެންދާނެއެވެ.