އީރާނުގެ ސަރުކާރާ ގުޅުން އޮންނަ ތަސްނީމް ނިއުސް އެޖެންސީން، މެދުއިރުމަތީގައި ގާއިމުވެފައިވާ އެމެރިކާގެ އަސްކަރީ މަރުކަޒުތަކަށް އަމާޒުކޮށް ދިން ވަރުގަދަ މިސައިލް އަދި ޑްރޯން ހަމަލާތަކެއްގެ ވީޑިއޯ ފްުޓޭޖް އާންމުކޮށްފިއެވެ.

ރޭގަނޑުގެ ވަގުތެއްގައި ކޮށްފައިވާ މި ރެކޯޑިންތަކުން ފެންނަނީ ގިނަ އަދަދެއްގެ ބޮޑެތި މިސައިލްތަކާއި އަދި ހަމަލާދޭ ޑްރޯންތައް ފޮނުވާލާ މަންޒަރެވެ. ތަސްނީމް އެޖެންސީން ބުނެފައިވާ ގޮތުގައި މިއީ އެމެރިކާގެ އަސްކަރިއްޔާއިން ކުރިން ހިންގި "އުދުވާނީ އަމަލުތަކަށް" ރައްދު ދިނުމުގެ ގޮތުން ދީފައިވާ ހަމަލާތަކެކެވެ.

މި ހަމަލާތަކާ ގުޅޭގޮތުން ތަސްނީމް އިން އިތުރަށް ހާމަކޮށްފައިވާ ގޮތުގައި، އީރާނުގެ މިސައިލްތަކާއި ޑްރޯންތައް އަމާޒުކޮށްފައިވަނީ އެމެރިކާގެ އަސްކަރި ފްލީޓަށާއި، ވައިގެ ބަނދަރަކަށް އަދި ހެލިކޮޕްޓަރު މަރުކަޒަކަށެވެ. ތަސްނީމް އިން ވަނީ އެމެރިކާގެ އަސްކަރިއްޔާއަކީ "ޓެރަރިސްޓް އަދި ކުޑަކުދިން މަރާ" ބައެއްގެ ގޮތުގައި ސިފަކޮށްފައެވެ. މި ހަމަލާތަކާ ގުޅިގެން އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނެފައިވަނީ، "އަމިއްލަ ދިފާއުގައި" އީރާނުގެ ގޭޝްމް އައިލެންޑްގައި ހުރި ގްރައުންޑް ކޮންޓްރޯލް ސްޓޭޝަނަކަށް ހަމަލާދީފައިވާނެ ކަމަށެވެ.

އަދި އީރާނުން ފޮނުވާލި މިސައިލްތަކާއި ޑްރޯންތައް ހުއްޓުވުމުގައި ކުވެއިތާއި ބަހްރޭނަށް އެހީތެރިކަން ފޯރުކޮށްދީފައިވާނެ ކަމަށްވެސް އެމެރިކާއިން ބުނެއެވެ. މީގެ އިތުރުން، ކުވެއިތުގައި ތިބި އެމެރިކާގެ ސިފައިންނަށް އަމާޒުކޮށް އީރާނުން ފޮނުވާލި އިތުރު ޑްރޯންތަކެއްގެ "ރާޅެއް" ހުއްޓުވާފައިވާ ކަމަށާއި، އެ ހަމަލާތަކުން އެއްވެސް ގެއްލުމެއް ލިބިފައިނުވާ ކަމަށް ސެންޓްކޮމް އިން ވަނީ ހާމަކޮށްފައެވެ.