އއ. ފެރިދޫގައި ގާއިމުކުރި ފުލުހުންގެ އައު އިމާރާތް "ފެރިދޫ ޕޮލިސް ސްޓޭޝަން" މިއަދު ރަސްމީކޮށް ހުޅުވައިފިއެވެ. މިކަމަށްޓަކައި މިއަދު ފެރިދޫގައި ބޭއްވި ހާއްސަ ރަސްމިއްޔާތެއްގައި، މި ޕޮލިސް ސްޓޭޝަން ހުޅުވައިދެއްވީ މިނިސްޓަރ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީ ޢަލީ އިޙްސާން އާއި ކޮމިޝަނަރ އޮފް ޕޮލިސް އަލީ މުޙައްމަދުއެވެ.

މި ރަސްމިއްޔާތުގައި ޕޮލިސް ސްޓޭޝަން ހުޅުވައިދެއްވުމަށްފަހު، ގައުމީ ދިދަ ނަންގަވައިދެއްވީ މިނިސްޓަރ ޢަލީ އިޙްސާންއެވެ. އަދި ފުލުހުންގެ ދިދަ ނަންގަވައިދެއްވީ ކޮމިޝަނަރ އޮފް ޕޮލިސް އަލީ މުޙައްމަދުއެވެ. މި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއާއި، ފުލުހުންގެ އެގްޒެކެޓިވް ބައެއް އޮފިސަރުންނާއި، ފެރިދޫ ކައުންސިލުގެ ރައީސް އަންވަރު ސާދާތުގެ އިތުރުން ކައުންސިލް މެންބަރުންނާއި، އެމްޓީސީސީގެ މުވައްޒަފުންނާއި ރަށުގެ ގިނަ އަދަދެއްގެ ރައްޔިތުން ބައިވެރިވިއެވެ.

މި މަޝްރޫޢު ކުރިއަށް ގެންދިއުމުގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި ފެރިދޫ ކައުންސިލުން ވެދެއްވި އެހީތެރިކަމާއި އެއްބާރުލުން ފާހަގަކޮށް، އެ ފަރާތްތަކުގެ އަގުވަޒަންކުރުމުގެ ގޮތުން ހަނދާނީ ލިޔުން ވަނީ އަރުވާފައެވެ. މި ލިޔުންތައް ހަވާލުކޮށްދެއްވީ މިނިސްޓަރ ޢަލީ އިޙްސާންއެވެ.

ޕޮލިސް ސްޓޭޝަން ހުޅުވުމުގެ ރަސްމިއްޔާތަށްފަހު، އެ އިމާރާތުގެ ގޯތިތެރޭގައި ގަސްއިންދުމުގެ ހާއްސަ ހަރަކާތެއްވެސް ވަނީ ކުރިއަށް ގެންގޮސްފައެވެ. ފެރިދޫ ޕޮލިސް ސްޓޭޝަން އިމާރާތްކުރުމުގެ މަސައްކަތް އެމްޓީސީސީއާ ހަވާލުކޮށްގެން ކުރިއަށް ގެންގޮސްފައިވާއިރު، މި އިމާރާތުގެ ބިންގާ އަޅާފައިވަނީ 19 އޮގަސްޓް 2021 ގައެވެ. މި އައު އިމާރާތުގައި އިދާރީ މަސައްކަތްތަކަށް ހާއްސަ ބަޔަކާއި، ފުލުހުން ތިބުމަށް ބޭނުންވާ އެކޮމޮޑޭޝަން ބްލޮކެއް ވަނީ ގާއިމުކޮށްފައެވެ.

މިއަދު ހުޅުވުނު މި ޕޮލިސް ސްޓޭޝަނަކީ ފުލުހުންގެ ހިދުމަތް ފޯރުކޮށްދޭ ތަންތަނަކީ ފުލުހުންގެ އަމިއްލަ އިމާރާތްތަކަށް ހެދުމަށް ސަރުކާރުން ކުރަމުންދާ މަސައްކަތުގެ ދަށުން ނިންމާލެވުނު މުހިންމު މަޝްރޫޢެކެވެ.