ދިވެހިރާއްޖޭގެ ދަރަނި މެނޭޖުކުރުމާ ގުޅޭގޮތުން ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅުތަކަށް، ފަހި ދިރިއުޅުން ކޯޕަރޭޝަން ލިމިޓެޑް (އެފްޑީސީ)ގެ މެނޭޖިން ޑިރެކްޓަރު ހަމްދާން ޝަކީލް ވަރުގަދަ ރައްދެއް ދެއްވައިފިއެވެ.
ކެމްޕެއިން ހަރަކާތެއްގައި ވާހަކަފުޅު ދައްކަވަމުން ރައީސް ނަޝީދު ތުހުމަތު ކުރައްވާފައިވަނީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ގައުމުގެ ބޮޑު ދަރަނި އަދާކުރުމުގެ ގާބިލުކަން ނެތް ކަމަށެވެ. ގައުމުގެ އުފެއްދުންތެރިކަމަށްވުރެ ދަރަނި ބޮޑުވެފައިވާކަން ފާހަގަކުރައްވައި ނަޝީދު ވިދާޅުވީ، މިއަދު ގައުމު އޮތް ހާލަތުން އަރައިގަތުމަށް ރައީސް މުއިއްޒަށް އެއްވެސް ކަމެއް ނުކުރެއްވޭނެ ކަމަށެވެ.
މި ވާހަކަތަކަށް ރައްދު ދެއްވަމުން ހަމްދާން އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ދަރަނި އިންތިހާއަށް އުފުލިގެންދިޔައީ އެމްޑީޕީގެ ސަރުކާރުތަކުގައި ކަމަށެވެ. އެގޮތުން އެމްޑީޕީގެ ފުރަތަމަ ސަރުކާރުގައި، ދަރަނި ޖީޑީޕީގެ ނިސްބަތުން 55 އިންސައްތައިގައި އޮއްވައި 97 އިންސައްތައަށްވުރެ މައްޗަށް އުފުލައިލިކަން އޭނާ ފާހަގަކުރެއްވި އެވެ. އަދި 2011 ވަނަ އަހަރު 3.5 އިންސައްތައިގައި ޖީއެސްޓީ ތައާރަފުކޮށް، ހަމަ އެ އަހަރުގެ ތެރޭގައި ޓެކްސް 6 އިންސައްތައަށް ބޮޑުކުރިކަންވެސް ހަމްދާން ހަނދާންކޮށްދެއްވި އެވެ.
Advertisement
ހަމްދާން އިތުރަށް ވިދާޅުވީ، އެމްޑީޕީގެ ދެވަނަ ދައުރުގައި ދަރަނި އިތުރު 77 ބިލިއަން ރުފިޔާއަށް ބޮޑުކޮށް، ޖީއެސްޓީ 8 އިންސައްތައަށް އުފުލާފައިވާ ކަމަށެވެ. ނަމަވެސް، ރައީސް ޑރ. މުއިއްޒުގެ ސަރުކާރުން މިވީ ހަ މަސްދުވަހުގެ ތެރޭގައި ރައްޔިތުންނަށް ޓެކްސްގެ އިތުރު ބުރައެއް ޖެއްސުމެއް ނެތި، ކުރީގެ ސަރުކާރުތަކުން ނަގާފައިވާ ލޯނުތަކަށް އެކަނިވެސް 1 ބިލިއަން އެމެރިކާ ޑޮލަރު ދައްކާފައިވާކަން އޭނާ ހާމަކުރެއްވި އެވެ.
"ސިޔާސީ ބޭނުމަށް ވޯޓަރުންނަށް އޮޅުވާލެވިދާނެ، އެކަމަކު މަނިކުފާނުގެ ވެރިކަމުގެ ހިތްދަތި ހަނދާންތައް އަޅުގަނޑުމެންގެ އަދި އެބަހުރި،" ރައީސް ނަޝީދަށް އިޝާރާތް ކުރައްވައި ހަމްދާން ވިދާޅުވި އެވެ.
ރައީސް ނަޝީދުގެ ވެރިކަމުގައި ރާއްޖޭގެ މުހިންމު ކުންފުނިތަކާއި ވަސީލަތްތައް ވިއްކާލި އެވެ. އޭގެ ތެރޭގައި އިންޑިއާގެ ޖީއެމްއާރް ކުންފުންޏަށް ވެލާނާ އިންޓަނޭޝަނަލް އެއާޕޯޓު ދިނުން ފަދަ ކަންކަން ހިމެނެ އެވެ.
ރާއްޖޭގެ އިގްތިސާދީ ހާލަތާ ގުޅޭގޮތުން އިދިކޮޅު ސިޔާސީ ފަރާތްތަކުން ފާޑުކިޔަމުންދާއިރު، ސަރުކާރުން ދަނީ ދަރަނި މެނޭޖުކުރުމުގެ ހަރުދަނާ ފިޔަވަޅުތަކެއް އަޅަމުންނެވެ.
