4000 ފްލެޓް ހިމެނޭ ސަރަހައްދުގެ މަގުތައް ހެދުމުގެ މަޝްރޫއު މިއަހަރަށް އެއްކޮށް ނިންމާނެ ކަމަށް ހައުސިންގ ޑިވެލޮޕްމެންޓް ކޯޕަރޭޝަން، އެޗްޑީސީން ވިދާޅުވެއްޖެއެވެ.

އެފްޑީސީން ހުޅުމާލެ ދެވަނަ ފިޔަވަހީގައި ތަރައްޤީ ކޮށްފައިވާ 4000 ހައުސިންގ ޔުނިޓުގެ ތެރޭގައި ހިމެނެނީ، 16 ފަންގިފިލާގެ 32 ޓަވަރެވެ. މީގެތެރޭގައި 2 ކޮޓަރިއާއި، 3 ކޮޓަރީގެ އެޕާޓްމަންޓުތައް ހިމެނެއެވެ. ފްލެޓުތަކުގެ ތަޅުދަނޑި ޙަވާލު ކުރަމުންދަނީ، އެތަންތަނުގެ ފެނާއި ކަރަންޓު ގުޅައިދިނުމަށްފަހުގައެވެ. އެފްޑީސީން ދަނީ، އަލަށް އެ ސަރަޙައްދަށް ބަދަލުވަމުންދާ ފަރާތްތަކަށް ފަސޭހަވާނެހެން އިންތިޒާމުތައް ހަމަޖެއްސުމުގެ މަސައްކަތް ކުރަމުންނެވެ.

މަގު ހެދުމުގެ މަޝްރޫއުގެ ދަށުން ޒޯން 1އިން ފެށިގެން ޒޯން 6 އާ ހަމައަށް ހުރިހާ ޒޯނެއްގެ މަގުތަކުގައި ގައު އެތުރުމުގެ 95 އިންސައްތަ މަސައްކަތް މިހާރު ނިމިފައިވާ ކަމަށާއި ރީތިގަސް މަގު ފޭސް 2 ހިމެނޭ ޒޯން 7ގެ މަސައްކަތުގެ 35 އިންސައްތަ ނިމިފައިވާ ކަމަށް އެޗްޑީސީން ބުނެއެވެ.

އެޗްޑީސީން ބުނީ، ހުޅުމާލޭގެ މަގުބައްތި ހަރުކުރުމުގެ 85 އިންސައްތަ މަސައްކަތް އެއްކޮށް ނިމިފައިވާ ކަމަށާއި މަގުތަކުގެ ދުވާރާއި ވެހިކަލް ޕާކްކުރާ ސަރަޙައްދުތަކުގެ މަސައްކަތްވެސް ކުރިއަށްދާ ކަމަށެވެ.