އެމެރިކާގެ ނިއުޔޯކް ސިޓީގައި ދިރިއުޅޭ މުސްލިމުން ހައްޖާއި އުމްރާގެ މުގައްދަސް އަޅުކަމަށް ދާއިރު، އެކި ކަހަލަ މަކަރާއި ހީލަތްތަކުން އެމީހުން ރައްކާތެރިކުރުމަށްޓަކައި ހާއްސަ ބިލެއް އެ ސިޓީގެ ކައުންސިލުން ފާސްކޮށްފި އެވެ.

މިއީ މިފަދަ ގޮތަކަށް މުސްލިމް ހައްޖުވެރިންގެ ހައްގުގައި ފާސްކުރެވުނު ފުރަތަމަ ބިލެވެ. މި ބިލުގެ މައިގަނޑު މަގްސަދަކީ ހައްޖާއި އުމްރާގެ ދަތުރުތަކާ ގުޅޭގޮތުން ހިންގާ އޮޅުވާލުންތަކާއި، ފޭކު ވިސާ އެޖެންޓުންނާއި، ނުބައި ޓްރެވަލް އެޖެންސީތަކުން އާންމުން، ހާއްސަކޮށް އުމުރުން ދުވަސްވީ މީހުން ހޭލުންތެރިކުރުވައި ރައްކާތެރިކުރުމެވެ.

މި ބިލު ހުށަހެޅުއްވީ ނިއުޔޯކް ސިޓީ ކައުންސިލްގެ މެންބަރު ޔޫސުފް ސަލާމް އެވެ. އޭނާ ފާހަގަކުރެއްވި ގޮތުގައި، ގިނަ އަހަރުތަކެއް ވަންދެން ފައިސާ އެއްކޮށްގެން މި މުގައްދަސް އަޅުކަމަށް ތައްޔާރުވާ މުސްލިމުންނަށް އަމާޒުކޮށްގެން ހިންގާ މަކަރާއި ހީލަތުގެ މައްސަލަތަކަކީ ވަރަށް ބޮޑު ކަންބޮޑުވުމެކެވެ. "ދީނީ އަޅުކަންތައް ފުރިހަމަކުރުމުގެ މިނިވަންކަމަކީ ކޮންމެ މީހަކަށްމެ ލިބިގެންވާ ހައްގެއް. މި ބިލުގެ ސަބަބުން މަކަރުވެރިންގެ ކިބައިން މުސްލިމުން ސަލާމަތްވެ، އެމީހުންގެ ދީނީ ވާޖިބު އަދާކުރުމަށް މަގުފަހިވާނެ،" ޔޫސުފް ސަލާމް ވިދާޅުވި އެވެ.

މި ގާނޫނުގެ ދަށުން، ނިއުޔޯކުގެ ކޮންސިއުމާ އެންޑް ވޯކާ ޕްރޮޓެކްޝަން ކޮމިޝަނަރުގެ އިރުޝާދުގެ ދަށުން، ތަފާތު ބަސްބަހުން ތައްޔާރުކުރެވިފައިވާ މައުލޫމާތުތައް އާންމުންނަށް ފޯރުކޮށްދޭންޖެހޭނެ އެވެ. އަދި ހިއުމަން ރައިޓްސް ކޮމިޝަނާއި، އިމިގްރޭޝަން އޮފީސް އަދި އުމުރުން ދުވަސްވީ މީހުންނާ ބެހޭ އިދާރާތައް ގުޅިގެން މި މައުލޫމާތުތައް ފެތުރުމަށް ވަނީ ހަމަޖެހިފަ އެވެ.

ހައްޖުގެ އަޅުކަމަކީ އިސްލާމްދީނުގެ ފަސްވަނަ ރުކުނެވެ. ކޮންމެ އަހަރަކު މިލިއަނުން މީހުން ސައުދީ އަރަބިއްޔާއަށް މި އަޅުކަމަށް ދާއިރު، މީގެ ތެރޭގައި އެމެރިކާއިންދާ ގިނަ އަދަދެއްގެ މުސްލިމުން ހިމެނެ އެވެ. ހައްޖު ދަތުރަކަށް އާންމުކޮށް 9،000 އާއި 15،000 އެމެރިކާ ޑޮލަރާ ދެމެދުގެ އަދަދެއް ހަރަދުވާއިރު، ގިނަ ބަޔަކު މި ފައިސާ އެއްކުރަނީ މުޅި އުމުރު ދުވަހުގެ މަސައްކަތުންނެވެ.

މި ބިލު ފާސްކުރުމަށް ބާރުލިބުނު އެއް ސަބަބަކީ 2017 ވަނަ އަހަރު ބްރޫކްލިންގައި ހިނގި ބޮޑު މަކަރާއި ހީލަތުގެ މައްސަލައެކެވެ. އެ ފަހަރު ޖުނައިދު މިރްޒާ ކިޔާ ޓްރެވަލް އެޖެންޓަކު ވަނީ ފޭކު ޕެކޭޖުތައް ވިއްކައިގެން މުސްލިމުންގެ އަތުން 350,000 ޑޮލަރު ފޭރިގެންފަ އެވެ. އޭނާ މިހާރު ދަނީ 6 އަހަރުގެ ޖަލު ހުކުމެއް ތަންފީޒުކުރަމުންނެވެ.

ސައުދީ ސަރުކާރުން 2022 ވަނަ އަހަރުން ފެށިގެން 'ނުސުކް' ނަމަކަށް ކިޔާ އޮންލައިން ޕްލެޓްފޯމެއް މެދުވެރިކޮށް ވިސާގެ ކަންކަން ހަމަޖައްސަމުންދާއިރު، މި ބިލުން ބާރުއަޅަނީ ރަސްމީ ނިޒާމުގެ ތެރެއިން ދަތުރުގެ ކަންކަން ހަމަޖެއްސުމަށެވެ. މިއީ މުސްލިމުންގެ މާލީ ރައްކާތެރިކަމާއި ދީނީ އަޅުކަން ފުރިހަމަކުރުމަށް އެޅުނު މުހިންމު ފިޔަވަޅެކެވެ.