'އަދަދު' ނޫހަކީ ނޫހެއްގެ ގޮތުގައި ރެޖިސްޓްރީވެފައި އޮތް ނަމަވެސް، އެ ނޫހުގެ އަމަލުތައް ހުރީ ސިޔާސީ ޕާޓީއެއްގެ ގޮތުގައި ކަމަށް ވިދާޅުވެ، ފިޝަރީޒް މިނިސްޓަރު އަޙްމަދު ޝިޔާމް އެ ނޫހަށް ވަރަށް ބޮޑަށް ފާޑުވިދާޅުވެއްޖެ އެވެ.

ޝިޔާމް މިހެން ވިދާޅުވީ، ވެރިކަން ކުރާ ޕީ.އެން.ސީގެ އެތެރޭގެ ކަންކަމާ ގުޅޭގޮތުން 'އަދަދު' ނޫހުން ޝާއިއުކުރި ހަބަރަކާ ގުޅިގެން އެކްސްގައި ކުރެއްވި ޕޯސްޓެއްގައެވެ.

ޝިޔާމް ވިދާޅުވީ 'އަދަދު' މިވަނީ ނުބައި މުއައްސަސާއެއްގައި ރެޖިސްޓްރީވެފައި ކަމަށާއި، އެ ނޫސް އަސްލު އޮންނަންޖެހެނީ ސިޔާސީ ޕާޓީއެއްގެ ގޮތުގައި އިލެކްޝަންސް ކޮމިޝަންގައި ކަމަށެވެ. އަދި އަދަދު ނޫހުން ހަބަރު ލިޔާނަމަ ފިތުނަ އުފެއްދުން ނޫން ކަމެއް ނުކުރެވޭ ކަމަށާއި، ވާދަވެރި ސިޔާސީ ޕާޓީތަކެކޭ އެ ނޫހެކޭ އެއްވެސް ތަފާތެއް ނެތް ކަމަށްވެސް ޝިޔާމް ވިދާޅުވި އެވެ.

ޕީ.އެން.ސީގެ ހިންގުމާ ގުޅޭގޮތުން ވާހަކަދައްކަވަމުން ޝިޔާމް ފާހަގަކުރެއްވީ، ޕީ.އެން.ސީ އަކީ ރާއްޖޭގައި މިހާތަނަށް އުފެދުނު އެންމެ މެންބަރުން ގިނަ އަދި އެންމެ ބޮޑު ޕާޓީ ކަމަށެވެ. އަދި ގިނަ ޕާޓީތައް އެކުލެވޭ ނިޒާމެއްގައި، ހާއްސަކޮށް ޕާޓީގެ ވެރިކަމެއްގައި ޑިމޮކްރެސީގެ ހަމަތަކުގެ މަތިން ޕާޓީ ހިންގާތަން ފެންނަނީ ހަމައެކަނި ޕީ.އެން.ސީން ކަމަށް އޭނާ ވިދާޅުވި އެވެ.

ޕާޓީގެ ރައީސް، ޑރ. މުހައްމަދު މުޢިއްޒުގެ މަސައްކަތްޕުޅަށް ތައުރީފު ކުރައްވަމުން ޝިޔާމް ވިދާޅުވީ، ޕާޓީގެ ލީޑަރޝިޕް ބައްދަލުވުމެއްގައި ވިޔަސް އަދި ޕީ.އެން.ސީގެ މެންބަރުން މަޖިލީހުގެ ކަންކަން ނިންމުމަށް ބާއްވާ ބައްދަލުވުމެއްގައި ވިޔަސް، ޕާޓީގެ ރައީސްގެ ނުފޫޒުން ވަކި ގޮތަކަށް ކަމެއް ނިންމަން އެމަނިކުފާނު މަސައްކަތް ކުރެއްވި ތަނެއް ދުވަހަކުވެސް ފެނިފައި ނުވާ ކަމަށެވެ. އޭގެ ބަދަލުގައި، ޕާޓީގެ ހުރިހާ ނިންމުންތަކެއްވެސް ނިންމަނީ އަގުލަބިއްޔަތުން ނުވަތަ އެންމެން އިއްތިފާގުވާ ގޮތަށް ކަމަށް ޝިޔާމް ވިދާޅުވި އެވެ.

ޝިޔާމްގެ މި ރައްދު އައިސްފައިވަނީ ޕީ.އެން.ސީގެ ތެރޭގައި ބައިބައިވުން އުޅޭކަމަށް ދޭހަވާ ގޮތަށް 'އަދަދު' ނޫހުން ފަތުރާފައިވާ ހަބަރަކާ ގުޅިގެންނެވެ.