މިއަދު މާލެއާއި ހުޅުމާލޭގެ ބޮޑު ސަރަހައްދަކުން ކަރަންޓުގެ ހިދުމަތް މެދުކެނޑުމާ ގުޅިގެން، ހުޅުމާލޭގެ ހުރިހާ ސަރަހައްދަކަށް މިހާރު އަލުން ކަރަންޓު ދީ ނިންމާފައިވާ ކަމަށް ސްޓެލްކޯއިން ހާމަކޮށްފި އެވެ.
ސްޓެލްކޯއިން ބުނި ގޮތުގައި، ހުޅުމާލެއަށް މިހާރު ފުރިހަމައަށް ކަރަންޓުގެ ހިދުމަތް އިއާދަކުރެވިފައިވީ ނަމަވެސް، މާލޭގެ ބައެއް ސަރަހައްދުތަކަށް އަދިވެސް ކަރަންޓު ދިނުމުގެ މަސައްކަތް ދަނީ ކުރަމުންނެވެ. މިގޮތުން މާލެއިން ކަރަންޓު މެދުކެނޑުނު ސަރަހައްދުތަކުގެ ތެރެއިން 60 އިންސައްތައަށް މިހާރު ވަނީ ކަރަންޓު ދެވިފަ އެވެ. ކަރަންޓު މެދުކެނޑުމުގެ ސަބަބުން އާންމުންނަށް ދިމާވާނެ ދަތިތަކަށް އެ ކުންފުނިން ވަނީ މައާފަށް އެދިފަ އެވެ.
މިއަދު ކަރަންޓުގެ ހިދުމަތަށް ބުރޫއެރިއިރު، ރޭ މެންދަމު 3:00 އިން ފެށިގެން މިއަދު ހެނދުނު 8:00 އާ ހަމައަށް ހުޅުމާލޭގެ 50 މެގަވޮޓް އިންޖީނުގެ ނިއްވާލައިގެން ސްޓެލްކޯއިން ވަނީ އަޕްގްރޭޑިން މަސައްކަތްތަކެއް ކުރިއަށް ގެންގޮސްފަ އެވެ. އެ މަސައްކަތް ނިންމާލިއިރު މާލެއާއި ހުޅުމާލޭގެ އެއްވެސް ސަރަހައްދަކުން ކަރަންޓު ކަނޑާލާފައެއް ނުވެ އެވެ.
Advertisement
ރޭ ކުރިއަށްދިޔަ މި ބުރަ މަސައްކަތާ ގުޅޭގޮތުން ސްޓެލްކޯއިން ބުނެފައިވަނީ، ހީވާގިކަމާއެކު މަސައްކަތް ކުރި އެ ކުންފުނީގެ މުައްޒަފުންނަށާއި ވަރޓްސިލާގެ އިންޖީނިއަރުންނަށް އިހްލާތެރިކަމާއެކު ޝުކުރު ދަންނަވާ ކަމަށެވެ. އަޕްގްރޭޑިން މަސައްކަތުގެ ފުރަތަމަ މަރުހަލާ މިހާރު ނިމިފައިވާއިރު، ބާކީ ހުރި މަސައްކަތްތައް ކުރިއަށް ގެންދާނެ ތާރީހެއް ކަނޑައެޅުމަށްފަހު ކަސްޓަމަރުންނަށް ދުރާލާ އަންގާނެ ކަމަށްވެސް އެ ކުންފުނިން ބުނެ އެވެ.
ނަމަވެސް، މިހާރު ދިމާވެގެން އުޅޭ ކަރަންޓު ކެނޑުމުގެ މައްސަލައަކީ މިއަދު ހެނދުނު ނިންމާލި އަޕްގްރޭޑިން މަސައްކަތާ ގުޅުންހުރި ކަމެއްކަން ނުވަތަ ނޫންކަން އަދި ސާފެއް ނުވެ އެވެ. ސްޓެލްކޯއިން ދަނީ މާލޭގެ ބާކީ ހުރި ސަރަހައްދުތަކަށް ކަރަންޓުގެ ހިދުމަތް ވީއެންމެ އަވަހަކަށް އިއާދަކުރުމަށް ބާރުސްޕީޑުގައި މަސައްކަތް ކުރަމުންނެވެ.
