މިހާރުގެ ސަރުކާރާ ކުރީގެ ނައިބުރައީސް މުހައްމަދު ޖަމީލު އަހްމަދު ހިޔާލު ތަފާތުވި ހިސާބަކީ މި ވެރިކަމުގެ ކެބިނެޓުން ޖާގަ ނުދެއްވުމުން ކަމަށް ބާރަށު ދާއިރާގެ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
އއ. ތޮއްޑޫ އިންތިހާބުވި ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުންގެ ކާމިޔާބީ ފާހަގަ ކުރުމަށް މިރޭ ޕީއެންސީ ހަރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ޝުޖާއު ވިދާޅުވީ، ޖަމީލަކީ ވަރަށް އަމިއްލަ އެދުން ބޮޑު "ހިޔަޅެއް" ކަމަށެވެ. ޖަމީލަށް ކެބިނެޓުން ފުރުސަތު ދިންނަމަ އޭނާ މިއަދު ރައީސް ޔާމީން ކައިރީގައި ނުހުންނާނެ ކަމަށް ޝުޖާއު ވިދާޅުވި އެވެ.
މީގެއިތުރުން ޝުޖާއު ވިދާޅުވީ، ޕީއެންއެފް އިން ބޭއްވި މުޒާހަރާއެއްގެ ތެރެއިން އެއްބަޔަކު "ރައީސް ޔާމީން" އޭ ގޮވުމުން އަނެއް ބަޔަކު "ހައްޔަރުކުރޭ" މިހެން ގޮވަމުންދިޔަ ކަމަށެވެ. އެކަން އެހެން ހިނގަމުންދިޔައިރު ޑރ. ޖަމީލާއި މަލީހު ޖަމާލު ހުރީ ހޭން ކަމަށާއި، މީގެން ދޭހަވަނީ ޖަމީލުގެ ހިތް ރައީސް ޔާމީނަށް އެއްވެސް ވަރަކަށް ސާފު ނޫންކަން ކަމަށް ޝުޖާއު ފާހަގަކުރެއްވި އެވެ.
Advertisement
ރައީސް ޔާމީން ހައްޔަރުކުރަން ގޮވީމާ އެކަމާ ހިނިފުޅުވަޑުވަން ތިއްބެވީ އެމަނިކުފާނުގެ އެންމެ އަރިހުގައި ތިއްބެވި އިސް ގާނޫނީ ވަކީލުން ކަމަށް ޝުޖާއު ވިދާޅުވިއެވެ. ޝުޖާއު އިތުރަށް ވިދާޅުވީ މިއީ މިއަދު އަލަށް ފެންނަ މަންޒަރެއް ނޫން ކަމަށާއި، އިދިކޮޅުގައި ތިބި ދުވަސްވަރު ވެސް ކަންތައްތައް އޮތީ މިފަދަ ގޮތަކަށް ކަމަށެވެ.
ޝުޖާއު ވިދާޅުވީ ކޮންމެ މީހެއްގެ ވެސް އޮންނަނީ އަމިއްލަ އެދުމެއް ކަމަށާއި، ނަމަވެސް ރައީސް ޔާމީނާ މެދުގައި ހެޔޮ ހިތަކައިގެން އެންމެ އޯގާތެރިކަމާއެކު އަދިވެސް ދެކިވަޑައިގެންނަވާ ލީޑަރަކީ ރައީސް ޑރ. މުހައްމަދު މުއިއްޒު ކަމަށެވެ. އަދި ރައީސް ޔާމީނާ ދޭތެރޭ ކުޑައިމީސް ހަޑިކޮށް ބަހެއް ވިދާޅުނުވުމަށް ރައީސް މުއިއްޒު ތަކުރާރުކޮށް އެދިވަޑައިގަންނަވާ ކަމަށާއި، އެއިން ދޭހަކޮށްދެނީ އެމަނިކުފާނުގެ ހިތްޕުޅުގައި ރައީސް ޔާމީނަށް އޮތް އިހުތިރާމާއި އޯގާތެރިކަން ކަމަށް ޝުޖާއު ވިދާޅުވި އެވެ.
މީގެ އިތުރުން ޝުޖާއު ވިދާޅުވީ ރަށްފުށުގެ އާންމު މެމްބަރުން، ރައީސް ޔާމީން ރައީސް މުއިއްޒުއަށް ނިސްބަތްކޮށް ވިދާޅުވާ ބަސްތަކަށް އެއްޗެއް ވިދާޅުނުވާތީ ކަންބޮޑުވެލައްވާ ކަމަށެވެ. ނަމަވެސް ރައީސް ޔާމީން ކިތަންމެ ހަޑިކޮށް އެއްޗެއް ވިދާޅުވި ނަމަވެސް އެއަށް ރައްދު ނުދެއްވަން ރައީސް މުއިއްޒު ވަނީ ސަރުކާރާއި ޕާޓީގެ އިސްބޭފުޅުންނަށް އަންގަވާފައި ކަމަށް އޭނާ ވިދާޅުވި އެވެ.
ރައީސް ޔާމީންގެ ފަހަކަށް އައިސް ދައްކަވާ ވާހަކަފުޅުތަކަށް ފާޑުވިދާޅުވަމުން ޝުޖާއު ވިދާޅުވީ، ކުރީގެ ރައީސް މުހައްމަދު ނަޝީދުއެކޭ އެއްގޮތަށް ރައީސް ޔާމީން ވެސް "ހަމައިން ނެއްޓޭ" ގަޑިތައް މިހާރު އަންނަ ކަމަށް ގަބޫލުކުރައްވާ ކަމަށެވެ. އަދި ރައީސް މުއިއްޒުއަށް ނިސްބަތްކޮށް އެމަނިކުފާނު އެ ދައްކަވަނީ އެފަދަ ގަޑިތަކުގައި ދައްކަވާ ވާހަކަތަކެއް ކަމަށް ބެލެވޭ ކަމަށް ވެސް ޝުޖާއު ވިދާޅުވި އެވެ.
