އެލައިޑް އިންޝުއަރެންސާއި އިލީޓް ރަނާސް މޯލްޑިވްސް ގުޅިގެން ބޭއްވި "އެލައިޑް ހުޅުމާލެ ރަން 2026" ގިނަ އަދަދެއްގެ ދުވުންތެރިންނާއި އާއިލާތަކުގެ ބައިވެރިވުމާއެކު، ވަރަށް ފޯރިއާއި ކާމިޔާބީއާއެކު ނިންމާލައިފި އެވެ.

މި މަހުގެ 22 ވީ ހުކުރު ދުވަހު ހުޅުމާލޭގައި ބޭއްވި މި ދުވުމަކީ ދުޅަހެޔޮ ސިއްހަތަކަށް ރައްޔިތުން އަހުލުވެރިކުރުވުމަށާއި، އިޖުތިމާއީ ގުޅުން ބަދަހިކުރުމުގެ މަގްސަދުގައި ބޭއްވުނު ހަރަކާތެކެވެ. މި ދުވުމުގައި ތަފާތު އުމުރުފުރާތަކާއި، އެކި ފެންވަރުގެ ދުވުންތެރިންނަށް ބައިވެރިވެވޭ ގޮތަށް ހަތަރު ކެޓަގަރީއެއް ހިމަނާފައިވެއެވެ. އެއީ 1 މައިލްގެ ފެމިލީ ރަން، 5 ކިލޯމީޓަރު، 10 ކިލޯމީޓަރު އަދި 21.1 ކިލޯމީޓަރުގެ ހާފް މެރަތަން އެވެ.

މި ހަރަކާތުގެ ބައިވެރިންގެ ރައްކާތެރިކަމަށް ހާއްސަ އިސްކަމެއް ދިނުމުގެ ގޮތުން، އެލައިޑް އިންޝުއަރެންސްގެ ފަރާތުން ވަނީ ދުވުމުގައި ރަޖިސްޓްރީވި ހުރިހާ ބައިވެރިންނަށް "ކޮމްޕްލިމެންޓަރީ ގްރޫޕް ޕާސަނަލް އެކްސިޑެންޓް" ކަވަރޭޖެއް ފޯރުކޮށްދީފައެވެ. މި އިންޝުއަރެންސްގެ ދަށުން ދުވުމުގެ ތެރޭގައި ދިމާވެދާނެ ހާދިސާއަކުން ލިބޭ ގެއްލުމަށް 100,000 ރުފިޔާއާ ހަމައަށް ބަދަލު ލިބޭނެ އިންތިޒާމު ވަނީ ހަމަޖައްސާފަ އެވެ. މިއީ ދުވުންތެރިންނަށް އިތުރު ހިތްހަމަޖެހުމާއި ޔަގީންކަން ލިބިގެންދިޔަ ކަމެކެވެ.

މި މުބާރާތުގެ އެކި ކެޓަގަރީތަކުން ވަނަވަނައަށް ދިޔަ ދުވުންތެރިންގެ ކާމިޔާބީ ފާހަގަކޮށް، އެ ފަރާތްތަކަށް ވަނީ އަގުހުރި އިނާމުތަކެއް ދީފައެވެ. އެންމެ ވާދަވެރިވި 21.1 ކިލޯމީޓަރުގެ ހާފް މެރަތަންގެ ފިރިހެން ކެޓަގަރީގެ ނަތީޖާއަށް ބަލާއިރު:

1. އެއްވަނަ: މުހައްމަދު ޝިފާޒް
2. ދެވަނަ: ޔޫސުފް އިބްރާހިމް
3. ތިންވަނަ: ތިޓިވަޓް ކޫސަކުން

މި މުބާރާތުގެ އެހެނިހެން ކެޓަގަރީތަކުން ވަނަތައް ހޯދި ދުވުންތެރިންނަކީ:

ހާފް މެރަތަން (އަންހެން):

1. އެއްވަނަ: ޕެޗަރަތު ޗްލާޑްޓޯއީ
2. ދެވަނަ: އައިޝަތު ޖިނާނީ އިބްރާހިމް
3. ތިންވަނަ: އައިޝަތު ރިޝްމީ

10 ކިލޯމީޓަރު ދުވުން (ފިރިހެން):

1. އެއްވަނަ: ހުސައިން ފަޒީލް
2. ދެވަނަ: މުހައްމަދު އިރުފާން
3. ތިންވަނަ: ސަތަޕޯން އަކަތަމް

10 ކިލޯމީޓަރު ދުވުން (އަންހެން):

1. އެއްވަނަ: ކަންލަޔާ ސަންކޯ
2. ދެވަނަ: ކަމޮންވަން ކޮއެޑްނައިމޮންގްކޮން
3. ތިންވަނަ: އަނާން އަހުމަދު ރަޝީދު

5 ކިލޯމީޓަރު ދުވުން (ފިރިހެން):

1. އެއްވަނަ: އައިދު އަބްދުﷲ ރިފާއު
2. ދެވަނަ: މޫސާ ފަވާޒް
3. ތިންވަނަ: މުހައްމަދު ފަސީލް

5 ކިލޯމީޓަރު ދުވުން (އަންހެން):

1. އެއްވަނަ: ކްލާރާ ސަރީނާ އާސިފް
2. ދެވަނަ: އައިޝަތު ރިޝްމީ
3. ތިންވަނަ: ކިއާރާ އަފްރާ ގާސިމް

މި ހަރަކާތް ނިންމާލުމުގެ ގޮތުން ބޭއްވި ހާއްސަ ރަސްމިއްޔާތުގައި، ދުވުމުގެ ބައިވެރިންގެ މެދުގައި ނެގުނު ގުރުއަތުން ހޮވުނު ނަސީބުވެރި 10 ފަރާތަކަށް، ކޮންމެ ފަރާތަކަށް 2,000 ރުފިޔާގެ ފައިސާގެ އިނާމު ވަނީ ހަދިޔާކޮށްފައެވެ. މިއީ މި ހަރަކާތަށް ބައިވެރިންގެ މެދުގައި އިތުރު ފޯރިއެއް ގެނުވި ކަމެކެވެ.

އެލައިޑް އިންޝުއަރެންސްގެ ފަރާތުން ވަނީ މި ދުވުން އިންތިޒާމުކުރި އިލީޓް ރަނާސް މޯލްޑިވްސްއަށާއި، ހުރިހާ ބައިވެރިންނަށް، ވޮލަންޓިއަރުންނަށް، ޕާޓްނަރުންނަށް އަދި މި ހަރަކާތް ކާމިޔާބުކުރުމުގައި އެކި ގޮތްގޮތުން އެހީތެރިވި ފަރާތްތަކަށް ހާއްސަ ޝުކުރެއް އަދާކޮށްފަ އެވެ.

މި ހަރަކާތުގެ ސަބަބުން ކަސްރަތު ކުރުމަށް ލޯބިކުރާ ފަރާތްތަކަށް އުފާވެރި މާހައުލެއް ލިބިގެންދިޔައިރު، އެލައިޑުން ވަނީ ދުޅަހެޔޮ ދިރިއުޅުމަކަށް ބާރުއެޅުމުގައި އެކުންފުނިން ދޭ އަހައްމިއްޔަތުކަން އަނެއްކާވެސް ހާމަކޮށްދީފަ އެވެ.