ރާއްޖޭގެ ސިޓީތަކާއި ރަށްރަށުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ތަކުގެ މެންބަރުންގެ މުސާރައިގެ އޮނިގަނޑަށް ބޮޑެތި ބަދަލުތަކެއް ގެނެސް، ސިޓީތަކުގެ ކޮމިޓީ ރައީސުންގެ މުސާރައަކީ 20،000 ރުފިޔާ ކަމަށް ފިނޭންސް މިނިސްޓްރީން މިއަދު ކަނޑައަޅައިފި އެވެ.
ފިނޭންސް މިނިސްޓްރީން މައުލޫމާތު ދެއްވި ގޮތުގައި، މިއީ ލޯކަލް ގަވަމަންޓް އޮތޯރިޓީ (އެލްޖީއޭ) އިން މުސާރަ މުރާޖައާކުރުމަށް އެދި ޕޭ ކޮމިޝަނަށް އެންމެ ފުރަތަމަ ހުށަހެޅި އަދަދުތަކެވެ. އަދި މިއީ މިދިޔަ ދެ ދުވަސް ތެރޭގައި މުސާރައިގެ އޮނިގަނޑަށް ބަދަލު ގެނައި ތިންވަނަ ފަހަރު ކަމަށާއި، މިއީ "ފައިނަލް" ނިންމުން ކަމަށްވެސް އެ މިނިސްޓްރީން ބުނެފައިވެ އެވެ.
މުސާރައަށް ގެނައި މި ބަދަލާއެކު، ސިޓީތަކުގެ ކޮމިޓީ ރައީސުންނަށް މަހަކު 20،000 ރުފިޔާ ލިބޭއިރު، ރަށްރަށުގެ ކޮމިޓީ ރައީސުންނަށް ލިބޭނީ މަހަކު 15،000 ރުފިޔާއެވެ. މީގެ ކުރިން ސަރުކާރުން ނިންމާފައި އޮތީ ސިޓީތަކުގެ ރައީސުންނަށް 41،500 ރުފިޔާ ދިނުމަށެވެ. ނަމަވެސް އެ އަދަދު ބޮޑުވުމުގެ ސަބަބުން އާންމުންގެ ފާޑުކިޔުން ސޯޝަލް މީޑިއާގައި ސަރުކާރަށް ވަރަށް ބޮޑަށް އަމާޒުވި އެވެ. އެއަށްފަހު އެ އަދަދު 33،000 ރުފިޔާއަށް ކުޑަކުރުމަށްފަހު، މިހާރު ވަނީ 20،000 ރުފިޔާއަށް ފައިނަލްކޮށްފަ އެވެ.
މުސާރަ މުރާޖައާކޮށް ގެނައި ބަދަލުތަކުގެ ތަފްސީލު:
ސިޓީ ކައުންސިލް ޑަބްލިއުޑީސީ:
ރައީސް: 20،000 ރުފިޔާ (އަސާސީ މުސާރަ އާއި ލިވިން އެލަވަންސާއެކު)
ނައިބު ރައީސް: 7،000 ރުފިޔާ (އަސާސީ މުސާރަ އާއި ލިވިން އެލަވަންސާއެކު)
މެންބަރުން: 6،000 ރުފިޔާ (އަސާސީ މުސާރަ އާއި ލިވިން އެލަވަންސާއެކު)
ރަށު ކައުންސިލް ޑަބްލިއުޑީސީ:
ރައީސް: 15،000 ރުފިޔާ (އަސާސީ މުސާރަ އާއި ލިވިން އެލަވަންސާއެކު)
ނައިބު ރައީސް: 6،000 ރުފިޔާ (އަސާސީ މުސާރަ އާއި ލިވިން އެލަވަންސާއެކު)
މެންބަރުން: 5،000 ރުފިޔާ (އަސާސީ މުސާރަ އާއި ލިވިން އެލަވަންސާއެކު)
މީގެ އިތުރުން، ކޮމިޓީތަކުގެ ނައިބު ރައީސުންނާއި މެންބަރުންނަށް ލިބޭ ޖުމްލަ މުސާރަ ބިނާވެފައިވަނީ އެ ބޭފުޅުން ބައިވެރިވާ ބައްދަލުވުންތަކުގެ އަދަދަށެވެ. އެގޮތުން ބައިވެރިވާ ކޮންމެ ބައްދަލުވުމަކަށް ސީޓިން އެލަވަންސްގެ ގޮތުގައި 500 ރުފިޔާ ލިބޭނެ އެވެ. ނަމަވެސް، މި އެލަވަންސްގެ ގޮތުގައި މަހެއްގެ މައްޗަށް އެންމެ ގިނަވެގެން ދެވޭނީ 2،000 ރުފިޔާ ކަމަށްވެސް ފިނޭންސް މިނިސްޓްރީން ވަނީ ކަނޑައަޅާފަ އެވެ.
