މޯލްޑިވްސް ފިޝަރީޒް އެގްރިކަލްޗަރަލް އެންޑް މެރިން ރިސޯސަސް ކަމްޕެނީ (މިފްކޯ) އަކީ މިހާރު އަމިއްލަ ފައިމައްޗަށް ތެދުވެފައިވާ ކުންފުންޏެއް ކަމަށާއި، އެ ކުންފުނީގެ ހިންގުމުގެ ހަރަދުތައް ހަމަޖެއްސުމަށް ސަރުކާރުން މިހާރު އެއްވެސް ސަބްސިޑީއެއް ނުދޭކަމަށް ފިޝަރީސް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން މިނިސްޓަރު ޝިޔާމް ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުން ވެރިކަމާ ހަވާލުވިއިރު، މިފްކޯ އޮތީ މަސްވެރިންނަށް ދޭންޖެހޭ ފައިސާ ނުދެވި، މާލީ ގޮތުން ވަރަށް ބޮޑު ގެއްލުމެއްގެ ތެރޭގައިކަމަށެވެ. އެހެންކަމުން، މަސްވެރިކަމުގެ ސިނާއަތުގެ މައްސަލަތައް ހައްލުކުރުމަށް ސަރުކާރުން އެންމެ އިސްކަމެއް ދިނީ މިފްކޯގެ ހިންގުން ހަރުދަނާކޮށް، ދައުލަތުގެ މާލިއްޔާއަށް ބުރަ ނުވާނެ ގޮތަކަށް އެ ކުންފުނި ބައްޓަން ކުރުމަށެވެ.

މިނިސްޓަރު ފާހަގަކުރެއްވި ގޮތުގައި، ރައްޔިތުންގެ ޓެކްސް ފައިސާއިން މިފްކޯ ހިންގުމަކީ ކޮށްގެންވާނެ ކަމެއް ނޫނެވެ. އެކަން އެގޮތަށް ވެއްޖެނަމަ، ރައްޔިތުންގެ ފައިސާ ބިނާކުރަނިވި އެހެން ކަންކަމަށް ހޭދަކުރުމަށް ހުރަސްއެޅޭނެ ކަމަށް މިނިސްޓަރު ވިދާޅުވި އެވެ.

މިދިޔަ ސަރުކާރުން މަހުގެ އަގަށް ގެނައި ބަދަލުގެ ސަބަބުން، މަސް ގަތުމަށްޓަކައި ސަބްސިޑީގެ ގޮތުގައި ކޮންމެ ކިލޯއަކަށް 13 ރުފިޔާގެ ރޭޓުން ސަރުކާރުން މިފްކޯއަށް ފައިސާ ދޭންޖެހުނެވެ. މިއީ އަހަރަކަށް ބަލާއިރު ގާތްގަނޑަކަށް 1.1 ބިލިޔަން ރުފިޔާ ނަމަވެސް، މިހާރު ގެނެވުނު އިސްލާހީ ބަދަލުތަކާއެކު މިފްކޯގެ އޮޕަރޭޝަނަށް ސަބްސިޑީ ދިނުން ހުއްޓާލާފައިވާ ކަމަށް މިނިސްޓަރު ވިދާޅުވި އެވެ.

"މިހާރު މި ސިނާއަތުގައި ސަބްސިޑީ ދެނީ ހަމައެކަނި މަސްވެރިންނަށް ދޫކުރާ ތެލަށް. މިއީ ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން މަސްވެރިކަމުން އާމްދަނީ ހޯދާ 17,000 އާއިލާއަށް އެހީވުމަށް އެޅުނު ހަރުދަނާ ފިޔަވަޅެއް". ޝިޔާމް ވިދާޅުވި އެވެ.

މިނިސްޓަރު އިތުރަށް ވިދާޅުވީ، މަސްވެރިންނަށް ތެލުގެ ސަބްސިޑީ ދިން ނަމަވެސް، މިފްކޯއަށް ތެޔޮ ގަތުމުގައިވެސް ސަރުކާރުން އެއްވެސް އެހީއެއް ނުދޭ ކަމަށެވެ. މިފްކޯއިން ތެޔޮ ގަންނަނީ އެހެން ކުންފުނިތަކެކޭވެސް އެއްފަދައިން އާންމު ރޭޓުގައި ކަމަށާއި، މިއީ ކުންފުނީގެ ހިންގުން ހަރުދަނާވުމުގެ ނަތީޖާ ކަމަށް މިނިސްޓަރު ވިދާޅުވި އެވެ.

މިހާރު މިފްކޯއިން މަސް ގަންނަމުންދަނީ ވާދަވެރި ބާޒާރުގައި މަހުގެ އަގު އަމިއްލައަށް ކަނޑައަޅައިގެން ކަމަށްވެސް ޝިޔާމް ފާހަގަކުރެއްވި އެވެ.