މާލޭގެ އުތުރު ފަރާތު ބޮޑުތަކުރުފާނު މަގު ތަރައްގީކުރުމުގެ ފުރަތަމަ ފިޔަވަހީގެ ދަށުން ކުރިއަށްދާ މަސައްކަތްތަކުގެ ބޮޑުބައެއް ނިމި، މަޝްރޫއުގެ ބޮޑު ކުރިއެރުމެއް ހޯދައިފި އެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށްގެންދާ މި މަޝްރޫއުގެ ތެރެއިން، ސެގްމަންޓް 2، 3 އަދި 4 އެއްގެ ކީވޯލް ކޭޕިން ކޮންކްރީޓް މަސައްކަތް މިހާރު ވަނީ ފަށާފަ އެވެ. މީގެ ތެރެއިން 100 މީޓަރުގެ ސަރަހައްދެއްގައި ކޭޕިން ކޮންކްރީޓް އަޅައި މިހާރު ވަނީ ނިންމާފަ އެވެ. އަދި މި ސެގްމަންޓްތަކުގެ ޝީޓް ޕައިލް ކުރުމުގެ މަސައްކަތުގެ 68 އިންސައްތަ މިހާރު ވަނީ ފުރިހަމަކުރެވިފަ އެވެ.
މަގު ހެދުމުގެ މަސައްކަތުގެ އިތުރުން، މި ސަރަހައްދުގެ އިންފްރާސްޓްރަކްޗާ ވަރުގަދަކުރުމުގެ ގޮތުން ގިނަ މަސައްކަތްތަކެއް ދަނީ ކުރެވެމުންނެވެ. އެގޮތުން ނަރުދަމާ ނިޒާމު އަޕްގްރޭޑް ކުރުމާއި، ފެނާއި ނަރުދަމާގެ މައި ހޮޅިތައް އެޅުމުގެ މަސައްކަތް ހިމެނެއެވެ. މީގެ އިތުރުން، ވާރޭފެން ހިންދުމަށްޓަކައި ސްޓޯމް ވޯޓާ ކެޗްޕިޓްތަކާއި ސްޓޯމް ވޯޓާ ވެލްތައް ބެހެއްޓުމާއި، އެންކަރ ބްލޮކްތައް ހަރުކުރުމުގެ މަސައްކަތްވެސް ބާރުސްޕީޑުގައި ކުރިއަށްދާކަމަށް އެމްޓީސީސީން މައުލޫމާތުދެ އެވެ.
Advertisement
ދައުލަތުގެ ބަޖެޓުން 144 މިލިއަން ރުފިޔާ ހަރަދުކޮށްގެން ކުރިއަށްގެންދާ މި ބޮޑު މަޝްރޫއަކީ ޖުމްލަ 455 ދުވަހުގެ ތެރޭގައި ނިންމުމަށް ތާވަލުކުރެވިފައިވާ މަސައްކަތެކެވެ. މި މަޝްރޫއުގެ ދަށުން މިހާތަނަށް ވަނީ ނޯތު ހާބަރު ސަރަހައްދުން ފެށިގެން ރަސްމީ ފާލަމާ ހަމައަށް މަގު ފުޅާކޮށް، ތާރު އަޅައި ބޭނުންކުރެވޭ ފެންވަރަށް ތަރައްގީކޮށްފަ އެވެ.
މި މަޝްރޫއަކީ މާލޭގެ އެންމެ ކެރިބޮޑު އެއް ސަރަހައްދު ކަމަށްވާ އުތުރު ފަރާތުގެ ޓްރެފިކް ތޮއްޖެހުން ކުޑަކުރުމަށާއި، ބަނދަރުގެ ހިދުމަތްތައް ހޯދާ ފަރާތްތަކަށް ލުއިފަސޭހަކޮށްދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަރަށް ބޮޑު އިސްކަމެއްދީގެން ކުރިއަށްގެންދާ މުހިންމު މަޝްރޫއެކެވެ.
