ކުރީގެ ތިން ރައީސުން ކަމަށްވާ މުހައްމަދު ނަޝީދާއި، އަބްދުﷲ ޔާމީން އަދި އިބްރާހިމް މުހައްމަދު ސާލިހު އެކުއެކީގައި ސިޔާސީ މަސައްކަތް ކުރެއްވުމަށް މިރޭ ބޭއްވި ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި، ނޫސްވެރިޔަކަށް ފުރައްސާރަކޮށް ބުލީ ކުރި މައްސަލައެއް ފެންމަތިވެއްޖެ އެވެ.

މި ހާދިސާ ހިނގާފައިވަނީ މިރޭ ބޭއްވި ޕްރެސް ކޮންފަރެންސްގައި ނޫސްވެރިޔަކު ސުވާލުކުރަން އުޅުމުގެ ތެރޭގައެވެ. ސުވާލުކުރަން ފެށުމުގެ ކުރިން ދެ ސުވާލެއް އޮތްކަމަށް ބުނެ، ފުރަތަމަ ސުވާލަށްފަހު ދެވަނަ ސުވާލު ކުރަން އުޅުމުން، އެތަނުގައި ތިއްބެވި ބޭފުޅުންގެ ތެރެއިން މުހައްމަދު ޒިޔާދު (ޒިޔައްޓޭ) ވަނީ ނޫސްވެރިޔާގެ ގައިގައި އަތްލައި، ސުވާލުކުރުން ހުއްޓުވަން މަސައްކަތް ކޮށްފައެވެ. މި މަންޒަރު ވަނީ ލައިވް ޕްރޮގްރާމްތަކުން ސާފުކޮށް ފެނިފަ އެވެ. ނޫސްވެރިޔާ ބުނި ގޮތުގައި އޭނާ ދެވަނަ ސުވާލު ކުރަން އުޅުމުން ވަނީ މައިކް ވެސް އަތުލާފަ އެވެ.

މީގެ އިތުރުން، ނޫސްވެރިންގެ ހައްގުތައް ހޯދައިދިނުމަށް ކަމަށް ބުނެ ބޮޑު ޕްރެސްއެއް ބާއްވަމުން ދިޔަ ވަގުތު، ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވަނީ ނޫސްވެރިޔާއަށް ޖޯކުޖަހައި ފުރައްސާރަ ކުރައްވާފަ އެވެ. މިކަން އެ ނޫސްވެރިޔާވެސް ވަނީ ކަށަވަރުކޮށްދީފަ އެވެ.

^{ނޫސްވެރިޔާ ސުވާލުކުރައްވަމުން ގެންދެވި ވަގުތު ޖަމީލާއި ޒިޔައްޓޭ ހުރަސް އަޅާ މަންޒަރު ފެންނަ ފުޓޭޖުގެ ސްކްރީންޝޮޓެއް---}

މިކަމާ ގުޅިގެން ސޯޝަލް މީޑިއާގައި ގިނަ ބަޔަކު ދަނީ ނުރުހުން ފާޅުކުރަމުންނެވެ. އެގޮތުން މީހަކު ބުނެފައިވަނީ، އިތުރަށް ކޮށްފާނެ ސުވާލަކާ މެދު ބިރުން ޒިޔައްޓޭ ނޫސްވެރިޔާގެ ގަޔަށް އަތްލައި މަޑުކުރަން އެންގިއިރު، ނޫސްވެރިންގެ ހައްގުގައި ނުކުމެ ތިބި މީހުންގެ ފެންވަރަކީ މިއީތޯ ސުވާލު އުފެދޭ ކަމަށެވެ.

މިރޭގެ ބައްދަލުވުމުގައި ތިން ރައީސުން އެކުގައި މަސައްކަތް ކުރުމުގެ އެއްބަސްވުމެއްގައި ސޮއިކުރެއްވިއިރު، އެ ބޭފުޅުންގެ އެންމެ ފުރަތަމަ ޑިމާންޑަކީ 'އަދަދު' ނޫހުގެ ދެ ނޫސްވެރިން ދޫކޮށްލުމެވެ. އެ ދެ ނޫސްވެރިންނަށް ޖަލު ހުކުމެއް އައީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ބޮލުގައި ގަޒްފުގެ ތުހުމަތު އަޅުވައި، ކޯޓު އަމުރާ ހިލާފުވުމާ ގުޅިގެންނެވެ.

ފާހަގަކޮށްލެވޭ ގޮތުގައި، މިރޭ އެކީގައި މަސައްކަތް ކުރަން ސޮއިކުރެއްވި ތިން ރައީސުންނަކީ މީގެ ކުރިން އެކަކު އަނެކަކު ޖަލަށްލައި، ކޮރަޕްޝަނާއި އަނިޔާވެރިކަމުގެ ތުހުމަތުތައް އެކަކު އަނެކަކަށް ކުރެއްވި ބޭފުޅުންނެވެ. އަދި މި ބޭފުޅުންގެ ވެރިކަންތަކުގައި ނޫސްވެރިންނަށް ބިރުދައްކައި، ފުރައްސާރަކުރި ކަމުގެ ތުހުމަތުތަކާ ގުޅޭގޮތުން ނޫސްވެރިން ކުރި ސުވާލުތަކަށް އެއްވެސް ރައީސަކަށް ޖަވާބު ދެއްވާކަށް ކެރިވަޑައެއް ނުގަތެވެ. އަދި ތިން ރައީސުންވެސް ވާހަކަފުޅު ދެއްކެވީ އެބޭފުޅުންގެ ރައީސްކަމުގެ ދައުރުގައި ފެއިލްވެފައިވާކަން ދޭހަވާ މޭރުމަކުންނެވެ.