ސަރުކާރުން އިންޑިއާއަށް ދާދި ފަހުން އަނބުރާ ދެއްކި 50 މިލިއަން ޑޮލަރަކީ އެއްވެސް އިތުރު ލޯނެއް ނަގައިގެން ދެއްކި ފައިސާއެއް ނޫން ކަމަށް ސަރުކާރުގެ ޗީފް ސްޕޯކްސްޕާސަން މުހައްމަދު ޝަރީފު (މުންދު) ވިދާޅުވެއްޖެ އެވެ.

ސަރުކާރުން ކޮންމެ ހަފްތާއެއްގެ ބުރާސްފަތި ދުވަހު ބާއްވަމުން އަންނަ "ޕްރެސާ ވިތު ސްޕޮކްސް" ނޫސްވެރިންގެ ބައްދަލުވުމުގައި ޚުލާސާގެ ނޫސްވެރިއަކު ކުރި ސުވާލަށް ޖަވާބުދެއްވަމުން މުންދު ވިދާޅުވީ، އިންޑިއާއަށް މިއަހަރުގެ ސެޕްޓެމްބަރު މަހު ދައްކަންޖެހޭ 50 މިލިއަން ޑޮލަރުގެ ލޯނު އަނބުރާ ދައްކަވާނެ ކަމަށާއި އެ ލޯނު ރޯލްއޯވާ ނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރިންވެސް ވަރަށް ސާފުކޮށް ވިދާޅުވެފައިވާ ކަމަށެވެ.

މިދިޔަ ހޯމަ ދުވަހު ނޫސްވެރިންނާ ބައްދަލުކުރައްވައި ރައީސް މުއިއްޒު ވަނީ ކުރީގެ ސަރުކާރުން އިންޑިއާއިން ނަގާފައިވާ ދަރަނިތަކުގެ ތަފްސީލު ހާމަކުރައްވާފަ އެވެ. ރައީސް ވިދާޅުވި ގޮތުގައި ނިމިދިޔަ ސަރުކާރުން ވަނީ ތިން ފަހަރެއްގެ މަތިން، ކޮންމެ ފަހަރަކު 50 މިލިއަން ޑޮލަރުގެ މަގުން ޖުމްލަ 150 މިލިއަން ޑޮލަރު އިންޑިއާ ސަރުކާރުން ނަގާފައެވެ. މި ލޯނުތައް ނަގާފައިވަނީ 17 މާޗު 2019، 26 ޖޫން 2019، އަދި 1 އޮކްޓޫބަރު 2019 ގައެވެ.

ރައީސް ފާހަގަކުރެއްވި ގޮތުގައި، ކުރީ ސަރުކާރުން ކޮންމެ އަހަރަކު މި ލޯނުތައް ރޯލްއޯވާ ކުރަމުން ގެންދިޔަ ނަމަވެސް، މި ސަރުކާރު އައިފަހުން މިދިޔަ ޖެނުއަރީ މަހުގެ 7 ވަނަ ދުވަހު އޭގެ ތެރެއިން 50 މިލިއަން ޑޮލަރު ވަނީ އަނބުރާ ދައްކާފައެވެ.

މީގެ އިތުރުން، ބާކީ އޮތް 100 މިލިއަން ޑޮލަރުގެ ތެރެއިން މިހާރު ދެއްކި 50 މިލިއަން ޑޮލަރު ފިޔަވައި، ދެން އޮތް 50 މިލިއަން ޑޮލަރު ދައްކަންޖެހޭ ތާރީހަކީ 17 ސެޕްޓެމްބަރު 2026 ކަމަށް ރައީސް ވިދާޅުވިއެވެ. އަދި އިރާދަކުރެއްވިއްޔާ އެ ތާރީހަށް އެ ދަރަނިވެސް ސަރުކާރުން އަނބުރާ ދައްކަވާނެ ކަމުގެ ޔަގީންކަން ރައީސް ވަނީ ދެއްވާފަ އެވެ.

މި ލޯނު ދެއްކުމުގައި އިތުރު ދަރަންޏެއް ނުނަގައި، ދައުލަތުގެ އާމްދަނީން އެ ފައިސާ ހަމަޖެއްސުމަކީ އިގްތިސާދީ ގޮތުން ސަރުކާރުން ހޯދި މުހިންމު ކާމިޔާބީއެއްގެ ގޮތުގައި ތަރުޖަމާނު ފާހަގަކުރެއްވި އެވެ.