ބޭންކް އޮފް މޯލްޑިވްސް (ބީއެމްއެލް) ގައި މަސައްކަތްކުރާ މުވައްޒަފުންނަކީ ބައިނަލްއަގުވާމީ ފެންވަރުގެ ޕްރޮފެޝަނަލް ސަނަދު ލިބިފައިވާ ފަންނީ ބަޔަކަށް ހެދުމުގެ މަގުސަދުގައި، އެ ބޭންކުން "ޗާޓާޑް ބޭންކާ ޕްރޮގްރާމް" ރަސްމީކޮށް ފަށައިފި އެވެ.
މި ޕްރޮގްރާމަކީ ރާއްޖޭގެ މާލީ ދާއިރާއަށް ބޭނުންވާ މާހިރު ބޭންކަރުން ބިނާކުރުމަށާއި، ފަންނީ ތަރައްގީގެ ފުރުސަތުތައް ފަހިކޮށްދިނުމަށްޓަކައި އޭޝިއަން އިންސްޓިޓިއުޓް އޮފް ޗާޓާޑް ބޭންކާސް (އޭ.އައި.ސީ.ބީ) އާއެކު ޖަނަވަރީ 2026 ގައި ސޮއިކުރި ފަހުމުނާމާ (އެމްއޯޔޫ) ގެ ދަށުން ކުރިއަށްގެންދާ މުހިންމު މަޝްރޫއެކެވެ.
މި ޕްރޮގްރާމްގެ ފުރަތަމަ ބެޗުގައި ބޭންކް އޮފް މޯލްޑިވްސްގެ 30 މުވައްޒަފުން ބައިވެރިވެފައިވެ އެވެ. މި މުވައްޒަފުން ކުރިއަށް އޮތް ދެ އަހަރު ދުވަހުގެ ތެރޭގައި ކޯހުގެ މޮޑިއުލްތައް ފުރިހަމަކޮށް، ޗާޓާޑް ބޭންކިން ކޮލިފިކޭޝަން ހާސިލުކުރާނެ އެވެ.
Advertisement
މިކަމާ ގުޅޭގޮތުން ބޭންކުގެ ސީ.އީ.އޯ އަދި މެނޭޖިން ޑައިރެކްޓަރު މުހައްމަދު ޝަރީފް ވިދާޅުވީ، ބޭންކުގެ އެންމެ ބޮޑު ރައުސްމާލަކީ މުވައްޒަފުން ކަމަށާއި، މެދުނުކެނޑި ފަންނީ ތަރައްގީއަށް ކުރެވޭ މިފަދަ މަސައްކަތްތަކަކީ މުއައްސަސާ ވަރުގަދަކުރުމަށާއި މުސްތަގުބަލުގެ ލީޑަރުން ބިނާކުރުމަށް އެޅޭ މުހިންމު ފިޔަވަޅެއް ކަމަށެވެ.
"މި ޕްރޮގްރާމްގެ ތެރެއިން ލިބޭ އިލްމާއި ތަޖުރިބާއަކީ މުވައްޒަފުންގެ އަމިއްލަ ކުރިއެރުމަށާއި ބޭންކުގެ ދެމެހެއްޓެނިވި ތަރައްގީއަށް ލިބިގެންދާނެ މުހިންމު ބާރެއް ކަމުގެ ޔަގީންކަން އަޅުގަނޑަށް އެބައޮތް،" ޝަރީފް ވިދާޅުވި އެވެ.
މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ މުވައްޒަފުން ތަމްރީނުކުރުމަށް ބޭންކުން ހާއްސަކޮށްފައިވާ ބީއެމްއެލް އެކަޑަމީ މެދުވެރިކޮށެވެ. މިއީ މުވައްޒަފުންގެ ގާބިލުކަން އިތުރުކޮށް، މުޅި ރާއްޖެއަށް ފޯރުކޮށްދޭ ބޭންކިންގ ހިދުމަތުގެ ފެންވަރު މަތިކުރުމަށް ބޭންކުން ކުރާ ބޮޑު އިންވެސްޓްމަންޓެކެވެ.
މި ޕްރޮގްރާމަކީ ބޭންކަށް ގެންނަމުންދާ ޒަމާނީ ބަދަލުތައް ތަންފީޒުކުރުމުގައި މުވައްޒަފުންގެ ދައުރު ހަރުދަނާކުރުމަށް މަގުފަހިވެގެންދާނެ ކަމެކެވެ.
