މަސްތުވާތަކެތީގެ މައްސަލައެއްގައި އެމްޑީޕީގެ ގައުމީ މަޖިލީހުގެ ކެންޑިޑޭޓް އައިޝަތު ނަޖުދާ އަލީ ހައްޔަރުކޮށް، އޭނާ ފަސް ދުވަހަށް ހައްޔަރުގައި ބެހެއްޓުމަށް ކްރިމިނަލް ކޯޓުން އަމުރު ކޮށްފިއެވެ.
ނަޖުދާ އަކީ ކުރިއަށް އޮތް އެމްޑީޕީގެ ގައުމީ މަޖިލީހުގެ އިންތިހާބުގައި ކުޅުދުއްފުށީ އުތުރު ދާއިރާގެ ރައީސް ކަމަށް ވާދަކުރައްވާ ކެނޑިޑޭޓެކެވެ.
ކްރިމިނަލް ކޯޓުން ނެރުނު ބަންދު އަމުރުގައި ބަޔާންކޮށްފައިވަނީ، ނަޖުދާގެ މައްޗަށް ތުހުމަތު ކުރެވޭ މިންވަރަށް ފުލުހުން ހެކި ހުށަހަޅާފައިވާ ކަމަށެވެ. އަދި އޭނާ ބަންދުން ދޫކޮށްލައިފި ނަމަ މުޖުތަމައުގެ ސަލާމަތަށް ނުރައްކާވެދާނެ ކަމަށް ފެންނާތީ، ގާނޫނުއަސާސީގެ 49 ވަނަ މާއްދާ އާއި ޖިނާއީ އިޖުރާއަތުގެ ގާނޫނުގެ ދަށުން ބަންދުގައި ބެހެއްޓުމަށް ވަނީ އަމުރުކޮށްފަ އެވެ.
Advertisement
ނަޖުދާ ހައްޔަރުކުރުމުގެ ކަންކަން ކުރިއަށް ގެންގޮސްފައިވަނީ ޖިނާއީ އިޖުރާއަތުގެ ގާނޫނާ އެއްގޮތަށް ކަމަށްވެސް ކޯޓުން ފާހަގަކުރި އެވެ.
ނަޖުދާގެ މައްޗަށް ދައުލަތުން ވަނީ އިތުރު ޖިނާއީ އެހެން ދައުވާއެއް އުފުލާފައެވެ. އެއީ މިދިޔަ އަހަރުގެ އޮކްޓޯބަރު މަހު މާލޭގައި އެމްޑީޕީން ބޭއްވި މުޒާހަރާއެއްގައި، ފުލުހުންގެ އަމުރަށް ނުކިޔަމަންތެރިވެ، ގާނޫނު ތަންފީޒުކުރާ މުވައްޒަފެއްގެ މަސައްކަތަށް ހުރަސްއެޅި ކަމުގެ ދައުވާ އެވެ.
ޕްރޮސެކިއުޓާ ޖެނެރަލްގެ އޮފީހުން މީގެ ކުރިން ބުނެފައިވަނީ، އެ ދައުވާ އުފުލާފައިވަނީ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް އެއްވުން ކުރިއަށް ގެންގޮސް، ފުލުހުންގެ ވާޖިބަށް ހުރަސް އެޅުމުގެ ސަބަބުން ކަމަށެވެ.
